Qazaxda 27 Sentyabr – Anım Gününə həsr olunmuş “Can verənlər, can qurtaranlar - Şəhidlər unudulmur!” adlı tədbir keçirilib.
AZƏRTAC xəbər verir ki, Qazax Rayon İcra Hakimiyyəti və “Qazax Rayon Mərkəzi Xəstəxanası” PHŞ-nin birgə təşkilatçılığı ilə keçirilən tədbirdə rayon rəhbərliyi, səhiyyə işçiləri, şəhid ailələri və media nümayəndələri iştirak ediblər.
Əvvəlcə xəstəxananın qarşısında Vətən müharibəsi şəhidi, tibb xidməti leytenantı Adil Əfəndiyevin adını daşıyan bulaq kompleksi önünə gül dəstələri düzülüb, şəhidin xatirəsi ehtiramla anılıb.
Tədbirdə Dövlət himni səsləndirilib, şəhidlərin və Ümummilli Lider Heydər Əliyevin xatirəsi birdəqiqəlik sükutla yad olunub, Anım Gününə dair videoçarx nümayiş etdirilib.
PHŞ-nin direktoru Afiq Fərruxov çıxışında Vətən müharibəsi zamanı xəstəxananın döyüş rejimində fəaliyyət göstərdiyini, tibb işçilərinin həm ön, həm də arxa cəbhədə yaralılara tibbi yardım göstərdiyini bildirib. Qeyd olunub ki, müharibə zamanı xəstəxanada yüzlərlə yaralıya tibbi xidmət göstərilib.
Qazax Rayon İcra Hakimiyyətinin başçısı Rəcəb Babaşov Vətən müharibəsində Azərbaycan Ordusunun qazandığı tarixi Qələbədən danışıb. Bildirib ki, şəhidlərin xatirəsi daim ehtiramla anılır, qazilərə və şəhid ailələrinə göstərilən diqqət və qayğı davam etdirilir. İcra başçısı müharibə zamanı tibb işçilərinin yaralı hərbçilərin müalicəsində böyük fədakarlıq göstərdiyini qeyd edib.
Tədbirdə 44 günlük Vətən müharibəsində könüllü həkim kimi fəaliyyət göstərmiş Vasif Məmmədov və Həsən Məmmədov müharibə günlərində yaşadıqları hadisələr və yaralı hərbçilərə göstərilən tibbi yardımla bağlı xatirələrini bölüşüblər.
Şəhid Adil Əfəndiyevin atası Qədir Əfəndiyev şəhid ailələrinə və qazilərə göstərilən diqqət və qayğıya görə minnətdarlığını bildirib.
Çıxış zamanı PHŞ-də müharibə iştirakçıları ilə iş üzrə mütəxəssis Gülən Muradova görülən işlər barədə məlumat verib. Bildirilib ki, indiyədək 1077 qaziyə və 955 şəhid ailəsinə stasionar və ev şəraitində tibbi xidmət göstərilib.
677jpg_1790033437.jpg)
