Qazaxda kənd təsərrüfatının, demək olar ki, bütün sahələri üzrə hər il yüksək göstəricilərə nail olunur. Rayonda heyvandarlıq, taxılçılıq, kartofçuluq, meyvəçilik, baramaçılıq inkişaf edir.
Rayon üzrə bu ilin məhsulu üçün payızlıq və yazlıq olmaqla 11732,8 hektarda taxıl əkilmişdir. Onun 6950 hektarı arpa, 4782,8 hektarı buğdadır. Artıq taxıl biçini başa çatıb, zəmilərdən 39 min 214,5 ton məhsul yığılmışdır. Bunun 16 min 835,5 tonu buğda, 22 min 379 tonu arpadır.
Qazaxda meyvəçiliyə maraq çoxdur. 1672 hektardan 432,3 hektarı fındıq, 40,8 hektarı albalı, 42,6 hektarı alça, 152,8 hektarı alma, 86,5 hektarı armud, 14 hektarı badam, 24,6 hektarı əncir, 28,3 hektarı heyva, 239,4 hektarı ərik, 8,9 hektarı əzgil, 93,5 hektarı nar, 75,5 hektarı gilas, 47,8 hektarı qoz, 76,1 hektarı şaftalı, 157,8 hektarı xurma, 60,6 hektarı zoğal, 48 hektarı gavalı, 33,1 hektarı isə giləmeyvə bağlarıdır. Həmin bağlardan da hər il bol məhsul götürülür. Bağbanların qazancları da az olmur. O üzdən təkcə bu ilin 6 ayı ərzində 84,8 hektar olmaqla 7,5 hektar ərik, 30 hektar xurma, 20 hektar şaftalı, 2 hektar armud, 17 hektar fındıq, 2 hektar qoz, 2 hektar gilas, 4,3 hektar yeni üzüm bağı salmışlar. Yeni salınmış meyvə və üzüm bağlarının 38,63 hektarı müasir suvarma sistemləri ilə təchiz edilmişdir. Yeri gəlmişkən qeyd edək ki, 9 sahibkar tərəfindən 8,9 hektarda müasir konstruksiyalı istixanalar yaradılmışdır. Onlar bu işə qol qoymalarından peşman deyillər. Deyirlər ki, belə getsə, işlərini genişləndirəcəklər.
Son illər rayonda baramaçılıq da inkişaf edir. Kümçülər keçən il 1200 kiloqram əvəzinə, 1455,8 kiloqram barama istehsalına nail olmuşlar. Onlar cari il bu rəqəmi hətta 1833,8 kiloqrama çatdırmışlar.
Cari ilin 6 ayına olan son məlumata görə, rayon üzrə qaramalın baş sayı 29,5 minə, davarın baş sayı isə 128 minə çatmışdır. Bu dövrdə 2597,7 ton ət (diri çəkidə), 16471,6 ton süd istehsal olunmuşdur. Heyvanların cins tərkibinə gəldikdə, 6 ayda 113 baş heyvanda süni mayalanma aparılmış, 84 baş sağlam bala alınmışdır.
Sabir ƏLİYEV,
"Azərbaycan"
