"Orta dəhlizin inkişafı Qazaxıstan, Özbəkistan, Türkmənistan və digər Mərkəzi Asiya ölkələrinə ixrac marşrutlarını şaxələndirmək, yeni bazarlara çıxmaq və Avropa ilə ticarət əlaqələrini genişləndirmək imkanı yaradır. Xəzər dənizi üzərindən Azərbaycan, daha sonra Gürcüstan və Türkiyə vasitəsilə Avropa bazarlarına çıxış region ölkələri üçün əlavə logistika imkanları formalaşdırır".
Bunu AZƏRTAC-a açıqlaması zamanı türk iqtisadçı ekspert Canip Nuray bildirib.
C.Nurayın sözlərinə görə, Orta dəhliz Mərkəzi Asiyanın Avropa ilə iqtisadi əlaqələrində yeni imkanlar açır.
"Burada söhbət yalnız yükdaşımaların həyata keçirilməsindən getmir. Marşrutun inkişafı ticarət əlaqələrinin genişlənməsinə, ixrac coğrafiyasının şaxələndirilməsinə və region ölkələrinin beynəlxalq təchizat zəncirlərinə daha fəal qoşulmasına şərait yaradır. Dəhlizin inkişafı Mərkəzi Asiya ölkələri üçün logistika xərclərinin və daşınma müddətlərinin optimallaşdırılması baxımından da əhəmiyyətlidir. Marşrut boyunca infrastrukturun modernləşdirilməsi, liman və dəmir yolu imkanlarının genişləndirilməsi, sərhəd-keçid prosedurlarının sadələşdirilməsi və rəqəmsal həllərin tətbiqi Avropa bazarlarına çıxışı daha səmərəli edə bilər. Orta dəhliz ətrafında əməkdaşlığın genişlənməsi region ölkələri arasında yeni iqtisadi tərəfdaşlıqların yaranmasına da təkan verə bilər. Nəqliyyat və logistika sahəsində qurulan əlaqələr zamanla ticarət, investisiya, sənaye, enerji, rəqəmsal texnologiyalar və xidmət sektorlarında əməkdaşlığın inkişafına zəmin yaradır. Azərbaycan bu prosesdə mühüm əlaqələndirici mövqeyə malikdir. Azərbaycanın Xəzər dənizi ilə Mərkəzi Asiya, Cənubi Qafqaz və Türkiyə arasında yerləşməsi, nəqliyyat infrastrukturu və logistika imkanlarının inkişaf etdirilməsi ölkənin Orta dəhlizdə rolunu daha da artırır. Azərbaycanın Orta dəhlizdəki mövqeyi Mərkəzi Asiya ölkələri üçün Avropa bazarlarına çıxış baxımından mühüm əhəmiyyət daşıyır. Azərbaycan və Türkiyənin nəqliyyat imkanlarının Mərkəzi Asiya ölkələrinin ixrac potensialı ilə əlaqələndirilməsi regionda yeni iqtisadi əməkdaşlıq imkanları yaradır", - deyə C.Nuray bildirib.
Ekspertin sözlərinə görə, Orta dəhliz boyunca yalnız tranzit infrastrukturunun deyil, logistika mərkəzlərinin, anbar komplekslərinin, istehsal və emal müəssisələrinin inkişaf etdirilməsi də vacibdir. Bu, marşrut üzərində əlavə iqtisadi dəyərin yaradılmasına və yeni investisiyaların cəlb edilməsinə imkan verə bilər: "Gələcəkdə Orta dəhliz ölkələri arasında daha sıx koordinasiyanın təmin edilməsi, vahid logistika standartlarının formalaşdırılması və rəqəmsal məlumat mübadiləsinin genişləndirilməsi dəhlizin səmərəliliyini artıracaq. Orta dəhlizin inkişafı nəticəsində Mərkəzi Asiya ölkələri ilə Azərbaycan, Türkiyə və Avropa arasında iqtisadi əlaqələr daha çoxşaxəli xarakter ala bilər. Bu baxımdan, dəhliz yalnız Şərqlə Qərbi birləşdirən nəqliyyat marşrutu deyil, həm də yeni ticarət və investisiya əlaqələrinin formalaşdığı iqtisadi əməkdaşlıq platformasına çevrilə bilər".
jpg_1790976482.jpg)
