Prezident İlham Əliyevin Yeni Azərbaycan Partiyasının VIII Qurultayında çıxışı Azərbaycanın keçdiyi tarixi yolun nəticələrinin qiymətləndirilməsi ilə yanaşı, yeni geosiyasi reallıqlar şəraitində qarşıda duran vəzifələrin aydın şəkildə müəyyənləşdirilməsi ilə diqqət çəkdi. 1992-ci ildə yaradılan Yeni Azərbaycan Partiyasının siyasi fəaliyyəti ölkəmizin müstəqillik tarixi ilə birbaşa bağlıdır. Siyasi və iqtisadi sabitliyin təmin olunması, güclü dövlət institutlarının formalaşdırılması, milli maraqlara əsaslanan xarici siyasət kursunun həyata keçirilməsi və Azərbaycanın beynəlxalq mövqelərinin möhkəmləndirilməsi bu mərhələnin əsas istiqamətlərini təşkil edib.
Milli Məclisin deputatı Nigar MƏMMƏDOVA qəzetimizə açıqlamasında deyib ki, bu gün isə Azərbaycanın qarşısında tamamilə yeni imkanlar açılıb: "2020-ci ilin 44 günlük Vətən müharibəsində əldə olunan tarixi Zəfər və 2023-cü ilin sentyabrında həyata keçirilən lokal antiterror tədbirləri Azərbaycanın ərazi bütövlüyünün və suverenliyinin tam bərpasını təmin etdi. Bununla da regionda erməni separatizminin kökü kəsildi, yeni siyasi reallıq yarandı. Bu reallıq Azərbaycanın regional və beynəlxalq mövqelərinin daha da güclənməsi üçün geniş imkanlar yaradıb. Hazırkı mərhələdə əsas vəzifələrdən biri əldə edilmiş Zəfərin siyasi, iqtisadi və diplomatik dividendlərinin təmin edilməsidir", - deyə o əlavə edib.
Deputat qeyd edib ki, Azərbaycan artıq regionda baş verən proseslərin mühüm təşəbbüskarına çevrilib. Rəsmi Bakının həyata keçirdiyi enerji, nəqliyyat, logistika və kommunikasiya layihələri ölkəmizin geosiyasi əhəmiyyətini artırıb. Şərqlə Qərbi, Şimalla Cənubu birləşdirən nəqliyyat dəhlizlərinin inkişafında Azərbaycanın fəal iştirakı ölkəmizi Avrasiya məkanında mühüm bağlantı mərkəzlərindən birinə çevirib. Bu baxımdan, Bakı-Tbilisi-Qars dəmir yolu, "Cənub qaz dəhlizi", Trans-Xəzər Beynəlxalq Nəqliyyat Marşrutu və "Şimal-Cənub" nəqliyyat dəhlizi kimi layihələr Azərbaycanın regional təhlükəsizlik və əməkdaşlıq sistemində rolunu da gücləndirib. Nəqliyyat və enerji infrastrukturu üzərindən formalaşan qarşılıqlı asılılıq dövlətlər arasında siyasi dialoqun və əməkdaşlığın genişlənməsinə şərait yaradır.
N.Məmmədova deyib ki, Azərbaycanın enerji diplomatiyası da ölkəmizin beynəlxalq mövqelərinin möhkəmlənməsində mühüm amillərdən biridir: "Azərbaycanın Avropanın enerji təhlükəsizliyinə verdiyi töhfə ölkəmizin etibarlı tərəfdaş kimi nüfuzunu artırır. Eyni zamanda bərpaolunan enerji mənbələrinin inkişaf etdirilməsi, "yaşıl enerji" layihələrinin həyata keçirilməsi və elektrik enerjisinin ixracı istiqamətində yeni imkanların yaranması Azərbaycanın enerji siyasətinin növbəti mərhələsini müəyyənləşdirir. Azərbaycanın regional siyasətində mühüm məqamlardan biri də müxtəlif güc mərkəzləri ilə balanslaşdırılmış və milli maraqlara əsaslanan münasibətlərin qurulmasıdır. Qlobal sistemdə geosiyasi rəqabətin kəskinləşdiyi, beynəlxalq münasibətlərdə yeni qarşıdurma xətlərinin yarandığı bir dövrdə Azərbaycanın praqmatik və çoxvektorlu xarici siyasət yürütməsi ölkəmizin strateji manevr imkanlarını genişləndirir".
Deputat vurğulayıb ki, bu siyasətin əsas xüsusiyyəti ondan ibarətdir ki, Azərbaycan öz milli maraqlarını qorumaqla yanaşı, qarşılıqlı faydaya əsaslanan əməkdaşlıq formatlarının yaradılmasında maraqlıdır. Avropa ilə enerji əməkdaşlığı, Mərkəzi Asiya ilə nəqliyyat və iqtisadi əlaqələr, türk dövlətləri ilə strateji tərəfdaşlıq, regional dövlətlərlə qarşılıqlı münasibətlər bu çoxşaxəli siyasətin müxtəlif istiqamətlərini təşkil edir. Xüsusilə Zəngəzur dəhlizi ilə bağlı perspektivlər Azərbaycanın regional nəqliyyat və logistika imkanlarını daha da genişləndirəcək. "Azərbaycan-Ermənistan münasibətlərinin normallaşdırılması istiqamətində atılan addımlar da yeni regional reallıq yaradır. Sülh və əməkdaşlığın təmin olunması, bütövlükdə, Cənubi Qafqazda iqtisadi və nəqliyyat əlaqələrinin inkişafına yeni imkanlar yaradır. Bu baxımdan, Azərbaycan regionda sülh gündəliyinin formalaşdırılmasında əsas tərəflərdən biri kimi çıxış edir. Ermənistandan da eyni yanaşmanı sərgiləməsi gözlənilir. Bütün bunlarla yanaşı, müasir dünyada dövlətlərin beynəlxalq mövqeyini hərbi və iqtisadi güclə yanaşı, informasiya təhlükəsizliyi, ideoloji dayanıqlılıq, texnoloji inkişaf, rəqəmsal transformasiya, insan kapitalı və milli həmrəylik də möhkəmləndirir. Hazırda bunlar dövlət gücünün əsas prioritetlərinə çevrilib. Prezident İlham Əliyevin YAP-ın VIII Qurultayında səsləndirdiyi mesajlar da Azərbaycanın qarşıdakı mərhələdə məhz bu istiqamətlərdə inkişafını davam etdirməsinin vacibliyini göstərir", - deyə deputat qeyd edib.
Əsmər QARDAŞXANOVA,
"Azərbaycan"
jpg_1790976482.jpg)
