Birjalarda xam neft qiymətləri Yaxın Şərqdəki müharibədənəvvəlki səviyyələrə geri qayıdıb.
AZƏRTAC xəbər verir ki, “Brent” markalı xam neftin qiyməti gün ərzində 3 faizdən çox ucuzlaşaraq 75 dollardan aşağı düşüb. Bu rəqəm müharibə başlamadan öncəki gündən bəri ən aşağı göstəricidir. Hazırda “Brent”in bir bareli 74,6 dollara, “Light” markalı xam neftin bir bareli isə 71 dollara satılır. Neft qiymətləri münaqişənin ən qızğın dövründəki pik hədlə müqayisədə hazırda təxminən 40 faiz ucuzlaşıb.
Ekspertlərin fikrincə, Yaxın Şərqdəki son inkişaflar neft bazarlarında geosiyasi riskin azalmasına və neft qiymətlərini müharibədənəvvəlki səviyyələrə qayıtmasına səbəb olub. Enerji qiymətlərinin ucuzlaşması Hörmüz boğazından neft tankerlərinin hərəkətinin artması fonunda baş verir. Eyni zamanda, ABŞ və İranın münaqişənin sona çatması istiqamətində irəliləyişlərə işarə edən açıqlamaları da qiymətin aşağıistiqamətli dəyişməsinə təsir göstərir. Hörmüzdə gəmi trafikinin davamlı artması münaqişənin ən qızğın dövründə boğazda yaranan fasilələri aradan qaldırmaq üçün tətbiq edilən alternativ həllərin effektivliyini də artırıb.
Bundan başqa, Beynəlxalq Dəniz Təşkilatı yüzlərlə gəminin Körfəzdən çıxmasına imkan verən təhlükəsizlik zəmanətləri aldığını açıqlayıb.
Qeyd edək ki, Yaxın Şərqdəki 100 gündən çox davam edən münaqişə müddətində birjalarda neft qiyməti 75 ilə 126 dollar arasında kəskin dalğalanmalar nümayiş etdirib. “Brent”in fyuçers qiymətləri münaqişədənəvvəlki son ticarət günündə - fevralın 27-də 72,48 dollar idi. Geosiyasi narahatlıqlar səbəbindən martın 2-də “Brent”in qiyməti 82,37 dollara, martın 6-da isə 90 dollara yüksəlib və həftəni 92,69 dollarda tamamlayıb. Bu, 2020-ci ilin aprel ayından bəri neft qiymətlərində təxminən 27,9 faizlə ən sürətli həftəlik artım olub.
Qiymətdəki dalğalanmalar martın ikinci həftəsində güclənib və martın 9-da “Brent” 119,5 dollara satılıb. Aprelin 8-də qiymət kəskin, təxminən 17,3 faiz azalaraq 90,40 dollar təşkil edib. “Brent”in qiyməti aprelin 30-da 126,41 dollara yüksəlib və münaqişənin başlanğıcından bəri ən yüksək səviyyəyə çatıb. Bu qiymət təxminən son 4 ildə ən yüksək səviyyə kimi qeydə alınıb. “Brent”in qiyməti aprel ayı ərzində 86-126 dollar arasında kəskin dalğalanmalar yaşayıb. May ayı ərzində qiymətlər 91-115 dollar arasında dəyişib.
jpeg_1782301011.jpeg)
