İqlim dəyişikliklərinin təsirləri artıq bütün dünyada olduğu kimi, Xəzər regionunda da daha aydın hiss olunur. Temperatur artımı, su ehtiyatlarının azalması, ekstremal hava hadisələrinin intensivləşməsi, urbanizasiya təzyiqləri və xüsusilə Xəzər dənizinin səviyyə tərəddüdləri region ölkələri qarşısında yeni çağırışlar formalaşdırır.
AZƏRTAC xəbər verir ki, bunu ekologiya və təbii sərvətlər nazirinin müavini Rauf Hacıyev "Xəzər regionunda iqlimədavamlı şəhərlər və icmalar: Şəhər uyğunlaşması üçün şaquli iqlim maliyyələşdirilməsi" mövzusunda yüksəksəviyyəli dialoqda çıxışı zamanı deyib.
"Bu gün artıq aydındır ki, iqlim adaptasiyası yalnız ayrıca ekoloji tədbirlər toplusu kimi qiymətləndirilə bilməz. Bu məsələ şəhərsalma, su ehtiyatlarının idarəolunması, sahilyanı ərazilərin planlaşdırılması, ekoloji təhlükəsizlik, biomüxtəlifliyin qorunması, infrastruktur dayanıqlılığı və insanların həyat keyfiyyəti ilə birbaşa bağlıdır. Xəzər regionu bu baxımdan xüsusi həssas ərazilərdən biridir. Xəzər dənizi dünyanın ən böyük qapalı su hövzəsi olmaqla unikal ekosistemdir. Qapalı su hövzəsi olması səbəbindən onun səviyyə tərəddüdləri təbii prosesdir. Lakin son illərdə müşahidə olunan dəyişikliklərin miqyası və sürəti bu məsələyə daha sistemli və elmi əsaslı yanaşmanı zəruri edir. Xəzər dənizinin səviyyə dəyişiklikləri yalnız hidrometeoroloji göstərici kimi deyil, daha geniş ekoloji, sosial-iqtisadi və şəhər dayanıqlılığı məsələsi kimi qiymətləndirilməlidir. Bu proses sahilyanı ərazilərdə ekosistemlərin vəziyyətinə, su bioresurslarına, sahilboyu infrastrukturun təhlükəsizliyinə, liman və nəqliyyat-logistika fəaliyyətinə, turizm və rekreasiya imkanlarına, eləcə də şəhər və yaşayış məntəqələrinin uzunmüddətli inkişaf planlarına təsir göstərir. Bu baxımdan əsas yanaşma ondan ibarətdir ki, uyğunlaşma tədbirləri yalnız artıq baş vermiş nəticələrə reaksiya verməklə məhdudlaşmamalıdır. Risklər əvvəlcədən müəyyən edilməli, qərarlar etibarlı məlumatlara əsaslanmalı və adaptasiya tədbirləri qabaqlayıcı planlaşdırma prinsipi ilə hazırlanmalıdır. Burada prinsipial məsələ ondan ibarətdir ki, Xəzər üzrə qərarlar epizodik müşahidələrə deyil, uzunmüddətli məlumat sıralarına, elmi təhlillərə, müqayisəli modelləşdirməyə və regional məlumat mübadiləsinə əsaslansın", - deyə nazir müavini bildirib.
png_1779198832.png)
