Azərbaycan xalqının Ümummilli Lideri Heydər Əliyevin xatirə gününün 22-ci ildönümü ilə əlaqədar Misirin Qalubiyyə vilayətinin əl-Qanatır əl-Xeyriyyə şəhərində yerləşən Misir-Azərbaycan Dostluq Parkında tədbir keçirilib.
AZƏRTAC xəbər verir ki, tədbirdə Qalubiyyə vilayətinin qubernatoru Əymən Atiyyə, Azərbaycanın Misirdəki səfiri Elxan Poluxov, Misirdəki Azərbaycan icmasının rəhbəri Seymur Nəsirov, eləcə də əl-Qanatır əl-Xeyriyyə şəhərinin meri Əbduləzim Səid, Azərbaycan icmasının üzvləri, yerli mətbuat nümayəndələri iştirak ediblər.
Ümummilli Liderin əziz xatirəsinə ehtiram əlaməti olaraq onun heykəlinin önünə Qalubiyyə vilayətinin qubernatorluğu, Azərbaycan səfirliyi və Azərbaycan icmasının adından əklillər qoyulub və gül dəstələri düzülüb.
Misir-Azərbaycan Dostluq Parkında yerləşən kitabxanada Ulu Öndər Heydər Əliyevə və Azərbaycana həsr edilmiş materiallarla tanışlıq olub.
Burada çıxış edən səfir Elxan Poluxov Ümummilli Lider Heydər Əliyevin həyat və fəaliyyəti haqqında danışıb. Misir-Azərbaycan Dostluq Parkındakı Ümumilli Liderin abidəsinin iki dövlət arasında dostluq münasibətlərinin şahidi olduğunu qeyd edən səfir Qalubiyyə qubernatorluğunun bu abidənin qorunub saxlanmasında göstərdiyi səyləri yüksək qiymətləndirib.
Azərbaycanla Misir arasında münasibətlərə toxunan diplomat əlaqələrin inkişafına töhfə verəcək hadisələrin bu il daha zəngin olduğunu diqqətə çatdırıb. Qeyd olunub ki, Prezident İlham Əliyevin Misirin Şarm əl-Şeyx şəhərində Yaxın Şərq Sülh Sammitində iştirak etməsi hər iki ölkənin öz regionlarında sülh gündəliyində aparıcı rol oynadıqlarını və sadiqliyi qoruduqlarını bir daha göstərir.
Eyni zamanda, Azərbaycanın D-8 qrupuna üzv dövlətlərin nazirlərinin iclaslarında təmsil olunması və bu çərçivədə keçirilən görüşlər ölkələrimiz arasında müxtəlif sahələrdə ikitərəfli əlaqələrin inkişafına töhfə verir. Bildirilib ki, bu yaxınlarda Qahirədə Azərbaycan Respublikası və Misir Ərəb Respublikası arasında Hökumətlərarası iqtisadi, texniki və elmi əməkdaşlıq üzrə Müştərək Komissiyanın 6-cı iclası müxtəlif sahələrdə əməkdaşlıq imkanlarının üzə çıxarılması və inkişafı baxımından mühüm tədbir olub.
Bundan başqa, səfir Misirin Qalubiyyə qubernatorluğunun əl-Ubur şəhərinin Misir-Azərbaycan dostluğu adını daşıyan məktəbdə Azərbaycan dilinin tədrisinə başlanılmasının xalqlarımız arasında mədəni əlaqələrin dərinləşməsi baxımdan əhəmiyyətini qeyd edib.
Qalubiyyə vilayətinin qubernatoru Əymən Atiyyə çıxışında ölkələrimiz arasında əməkdaşlığın yüksək səviyyədə olduğunu qeyd edərək əlaqələrin inkişafında Heydər Əliyevin xüsusi rol oynadığını, buna görə də onun Misirdə həmişə xoş xatirələrlə yad edildiyini vurğulayıb. Qubernator, Dostluq Parkında Azərbaycan mədəniyyətinin tanıdılmasına xidmət edəcək müxtəlif tədbirlərin təşkilinə dəstək verməyə hazır olduğunu vurğulayıb.
Daha sonra qubernator iki ölkə arasında dostluq və əməkdaşlığın möhkəmləndirilməsinə verdiyi davamlı dəstəyə görə, Azərbaycanın Misirdəki səfiri Elxan Poluxova vilayətin fəxri nişanını təqdim edib. O, Misirin gözəl turizm məkanlarından biri olduğunu bildirərək yaxın günlərdə Azərbaycandan gələn turistlərin sayının artacağına ümid etdiyini bildirib.
Daha sonra Azərbaycan səfiri və Qalubiyyə vilayətinin qubernatoru yerli mediaya müsahibələr veriblər. Tədbir bir çox yerli mətbuat orqanları tərəfindən geniş işıqlandırılıb.
