İndi də Fransaya gələn əcnəbi jurnalistlər həbs edilir

Sabah Fransanın paytaxtı Parisdə start götürəcək XXXII Yay Olimpiya Oyunları başlayacaq. Oyunlar zamanı siyasi sabitliyi pozmaq üçün müəyyən hərəkətlər hazırlamaqda şübhəli bilinən şəxs saxlanılıb. 
Jurnalistlərin məlumatına görə, Parisdə 40 yaşlı bir kişi Daxili Təhlükəsizlik Baş İdarəsi tərəfindən Olimpiya Oyunları zamanı ölkədə guya sabitliyi pozmağa yönəlik hərəkətlər planlaşdırmaqda şübhəli bilinib. Onun mənzilində axtarış aparılıb.
Dünən saxlanılan şəxs Fransada daxili gərginliyi qızışdırmaq üçün xarici dövlətə işləməkdə ittiham olunub və qabaqlayıcı tədbir olaraq həbs edilib. İstintaqı Paris prokurorluğu həyata keçirir.
İddia edilir ki, həmin şəxsdə Rusiyanın maraqlarına uyğun əməliyyatlar hazırladığına dair "işarə"lər görüblər...
Daxili işlər naziri Jerald Darmanenin sözlərinə görə, xarici dövlətin maraqlarına müdaxilədə şübhələr yaranan minə yaxın şəxs Olimpiadanın təşkilində iştiraka buraxılmayıb.
Bu onu göstərir ki, Fransa Olimpiada ərəfəsində "casus ovu"na başlayıb. Ölkə hakimiyyəti rəsmi olaraq bildirir ki, Rusiyadan olan jurnalistləri xüsusi xidmət orqanlarının nümayəndələri kimi gördükləri üçün oyunlara buraxmırlar. 
Əlbəttə ki, bu, ilk növbədə, insan haqlarının pozulması faktıdır. Jurnalistlərin Olimpiya Oyunlarına buraxılmaması heç bir çərçivəyə sığmayan hərəkətdir. 
Qeyd edək ki, bir müddət əvvəl Fransa Daxili İşlər Nazirliyinin rəhbəri Jerald Darmanen heç bir dəlil-sübut olmadan bəyan etmişdi ki, onlar jurnalistlər adı altında Parisə gəlmək istəyən "casus"ları yaxalayıblar. Əslində, nazirin bu sözləri "əcinnə ovu"nun elan olunduğunu bildirir: "Onlar yəqin ki, terror hücumlarında iştirak etmirlər. Lakin kəşfiyyat və ənənəvi casusluqdan əlavə, kiberhücum etmək üçün kompüter şəbəkələrinə çıxış əldə etmək mümkündür".
Ümumilikdə, Darmanenin dediyinə görə, yarış üçün mümkün təhlükə səbəbindən 4355 nəfər Olimpiadaya buraxılmayıb.
Rusiya Xarici İşlər Nazirliyinin rəsmi nümayəndəsi Mariya Zaxarova Fransa hakimiyyətinin hərəkətləri ilə bağlı son xəbərləri şərh edib: "Jurnalistlərin hüquqlarına hörmət etmək və söz azadlığını təmin etmək Makron və onun dəstəsi üçün boş ifadədir. Makron vədini yerinə yetirib Sena çayında çimməyənə qədər bu rejimdən həqiqətə, şərəfə və qanuna hörmət gözləmək olmaz". 
Rusiya Jurnalistlər Birliyinin rəhbəri Vladimir Solovyov isə qeyd edib ki, fransızlar özləri söz azadlığı və məlumat yayma prinsiplərini pozurlar: "Təəssüf ki, onlar özlərini inandırdıqlarına inanırlar və yəqin ki, Parisdə mövcud olan bəzi problemləri gizlətməyə çalışırlar. İndi təkcə bizim jurnalistlər deyil, başqa ölkələrin jurnalistləri də Parisdəki siçovullardan, bitlərdən və Olimpiya Oyunlarına çox zəif hazırlığın müşahidə edildiyindən yazırlar". 
Xatırladaq ki, Fransa XIV əsrin birinci yarısında "əcinnə ovları"nın başladığı ilk ölkələrdən biri idi. İndi isə Makron hökuməti keçmiş təcrübədən müasir formada yararlanmaq qərarına gəlib.

Rizvan CƏFƏROV,
"Azərbaycan"