Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin İnnovasiyalar Mərkəzinin rəsmi tərəfdaşlığı, Kiçik və Orta Biznes Subyektləri və Klubları Assosiasiyasının (KOBSKA) təşkilatçılığı ilə ölkəmizdə ilk "iFest" innovasiya və texnologiya festivalı keçirilib.

Dövlət Agentliyindən AZƏRTAC-a bildirilib ki, əsas məqsəd texnologiya şirkətlərinin tanıtımı, startapların inkişafına dəstək, onların maliyyə imkanlarına çıxışının təmini və nümayişidir. Açılış mərasimində İnnovasiyalar Mərkəzinin direktoru Vüsal Rüstəmov "yaşıl iqtisadiyyat"ın genişləndirilməsi istiqamətində həyata keçirilən bu kimi tədbirlərin əhəmiyyətindən, enerji səmərəliliyinə malik "yaşıl texnologiya"ların tətbiqindən söz açıb. Həmçinin Dövlət Agentliyi və İnnovasiyalar Mərkəzinin həyata keçirdiyi layihələri diqqətə çatdırıb.

Tədbirdə "INNOLAND" İnkubasiya və Akselerasiya Mərkəzinin rezidenti "iLab" startapı tərəfindən istehsal olunan "Charge Box" elektrik qidalanma stansiyaları barədə məlumat verilib. Bildirilib ki, elektromobil sahiblərinin işini asanlaşdırmaq məqsədilə istifadəyə verilən "Charge Box" mobil tətbiqi enerjidoldurma stansiyalarını axtarmaq, ödənişlər etmək və seansları idarə etmək üçün əsas interfeys rolunu oynayır. Belə ki, yerli ödəniş sistemlərinə inteqrasiya olunan bu tətbiq vasitəsilə istifadəçilər ödənişdən əlavə stansiya və ya məntəqədə, yerində nağdsız ödəniş, tam və saatlıq doldurma kimi seçim imkanlarını əldə edirlər. Həmin stansiyalar artıq bir çox "ASAN xidmət" mərkəzində və yanacaqdoldurma stansiyasında quraşdırılıb.

Sonra "Gələcəyin innovasiyası: texnologiyaya istiqamət verən trendlər və strategiyalar" və "COP29 və innovasiya: dayanıqlı gələcək üçün innovativ həllər" mövzularında panel müzakirələr start götürüb.