Bu brend altında dünyanın 70-dən çox ölkəsinə məhsul ixrac olunur
Bu gün dünyada iqtisadi rəqabət təkcə təbii sərvətlərlə deyil, əlverişli biznes mühiti, etibarlı investisiya siyasəti və güclü nəqliyyat-logistika imkanları ilə də müəyyən edilir. Son illər Azərbaycan məhz bu istiqamətlərdə əldə etdiyi uğurlarla regionun iqtisadi xəritəsində mövqeyini əhəmiyyətli dərəcədə möhkəmləndirib. Sahibkarlığın inkişafına verilən dəstək, xarici investorlar üçün yaradılan əlverişli şərait, şəffaf və çevik idarəetmə mexanizmləri ölkəmizi beynəlxalq biznes dairələrinin diqqət mərkəzinə gətirib.
Təbii ki, bu ümumi iqtisadi dinamika fonunda Azərbaycanın əldə etdiyi uğurlar təsadüfi deyil, əksinə, düşünülmüş dövlət siyasətinin və sistemli islahatların nəticəsidir. Xüsusən son zamanlar biznes və investisiya mühitinin davamlı olaraq təkmilləşdirilməsi, iqtisadiyyatın açıq və rəqabətqabiliyyətli modelə transformasiyası ölkənin investisiya cəlbediciliyini bir qədər də artırıb. Məhz bu strateji yanaşma nəticəsində Azərbaycan həm yerli, həm də xarici investorlar üçün etibarlı və sabit iqtisadi məkan kimi formalaşıb.
Ölkəmizin investisiya cəlbediciliyini artıran mühüm amillərdən biri investorlar üçün cəlbedici olan etibarlı və sabit mühitdir. Məsələn, Ələt Azad İqtisadi Zonasında tətbiq olunan xüsusi hüquqi rejim, vergi və gömrük güzəştləri, müasir infrastruktur və beynəlxalq bazarlara çıxış imkanları xarici investorlar üçün əlverişli şərait yaradır. Eləcə də sənaye parklarında rezidentlərə təqdim olunan güzəştlər innovativ istehsalın və ixracyönümlü məhsulların həcminin artmasına mühüm töhfə verir.
Azərbaycanın əlverişli biznes mühiti və investisiya imkanları beynəlxalq platformalarda da geniş təqdim olunur. Bu, ölkənin qlobal iqtisadi əməkdaşlığa verdiyi önəmin və xarici investorlarla əlaqələrin daha da genişləndirilməsi istiqamətində həyata keçirilən ardıcıl siyasətin bariz nümunəsidir. Bu günlər Çinin Urumçi şəhərində keçirilən 9-cu Çin-Avrasiya Sərgisində Azərbaycanın vahid ölkə stendi ilə təmsil olunması da bunun növbəti təsdiqidir. Sərgi çərçivəsində ölkəmizin əlverişli biznes və investisiya mühiti, nəqliyyat-logistika və tranzit potensialı, eləcə də "Made in Azerbaijan" brendi altında istehsal edilən məhsullar nümayiş olunub.
Paralel olaraq Azərbaycanın Çində ticarət nümayəndəsi tərəfindən keçirilən təqdimatda investorlar üçün yaradılmış imkanlar, ölkəmizin regionun mühüm nəqliyyat və logistika mərkəzi kimi rolu, həmçinin Azərbaycan-Çin iqtisadi-ticarət əməkdaşlığının perspektivləri barədə ətraflı məlumat verilib. Bu cür beynəlxalq tədbirlər Azərbaycanın etibarlı investisiya tərəfdaşı kimi nüfuzunun möhkəmlənməsinə, yeni biznes əlaqələrinin qurulmasına və xarici investisiyaların cəlb edilməsinə mühüm töhfə verir.
Məlumat üçün bildirək ki, 2011-ci ildən keçirilən Çin-Avrasiya Sərgisi Çinin önəmli beynəlxalq iqtisadi-ticarət platformalarından hesab olunur. Sərgi Asiya və Avropa ölkələri arasında ticarət, investisiya və sənaye tərəfdaşlığının genişləndirilməsinə xidmət edir. 9-cu sərgidə 27 ölkə, region və beynəlxalq təşkilatdan, eləcə də Çinin bütün əyalətlərindən 2 mindən artıq şirkət və qurum iştirak edib. Bu platforma iştirakçı ölkələr arasında yeni əməkdaşlıq imkanlarının yaradılması, mövcud iqtisadi əlaqələrin möhkəmləndirilməsi və birgə investisiya layihələrinin müzakirəsi baxımından mühüm əhəmiyyət daşıyır.
9-cu sərgi beynəlxalq biznes dairələri üçün yeni bazarlara çıxış, təcrübə mübadiləsi və strateji tərəfdaşlıqların qurulması baxımından da əlverişli imkanlar yaratdığı üçün deyə bilərik ki, Çin-Avrasiya Sərgisi regionlararası iqtisadi inteqrasiyanı gücləndirən mühüm əməkdaşlıq mərkəzi kimi çıxış edir. Belə beynəlxalq platformalarda ölkələrin iqtisadi potensialının nümayişi ilə yanaşı, onların ixrac imkanlarının və milli brendlərinin tanıdılması da xüsusi önəm daşıyır. Bu kontekstdə Azərbaycanın neftdənkənar sahəsinin inkişafında və ixrac potensialının artırılmasında "Made in Azerbaijan" brendi xüsusi əhəmiyyət daşıyır. Bu təşəbbüs yerli məhsulların beynəlxalq bazarlarda tanıdılması, onların rəqabət qabiliyyətinin artırılması və milli istehsalçıların xarici bazarlara çıxışının genişləndirilməsi məqsədilə həyata keçirilir. Dövlət tərəfindən ixrac missiyalarının təşkili, beynəlxalq sərgilərdə vahid ölkə stendi ilə iştirak, xarici bazarların araşdırılması, marketinq fəaliyyətinin dəstəklənməsi, eləcə də yerli şirkətlərin beynəlxalq sertifikat və patentlər əldə etməsinə göstərilən maliyyə dəstəyi "Made in Azerbaijan" brendinin dünya bazarlarında mövqeyinin möhkəmlənməsinə xidmət edir.
Bu gün "Made in Azerbaijan" nişanı altında istehsal olunan məhsullar dünyanın 70-dən çox ölkəsinə ixrac edilir. Qida və kimya sənayesi, kənd təsərrüfatı məhsulları, tikinti materialları, tekstil, maşınqayırma və digər sahələri əhatə edən məhsullar xarici bazarlarda Azərbaycan istehsalının keyfiyyətini və rəqabət üstünlüyünü nümayiş etdirir. Sənaye parklarında fəaliyyət göstərən müəssisələrin əhəmiyyətli hissəsinin ixracyönümlü istehsalla məşğul olması da bu brendin uğurunun mühüm göstəricilərindən biridir. "Made in Azerbaijan" artıq təkcə məhsulun mənşəyini ifadə edən nişan deyil, həm də ölkənin iqtisadi potensialını, milli istehsal mədəniyyətini, istehsala innovativ yanaşmasını və etibarlı biznes tərəfdaşı imicini beynəlxalq auditoriyaya çatdıran strateji brenddir. Bu baxımdan Azərbaycanın beynəlxalq sərgilərdə, o cümlədən 9-cu Çin-Avrasiya Sərgisində vahid milli stendlə iştirak etməsi "Made in Azerbaijan" brendinin qlobal miqyasda tanıdılması və yeni ixrac bazarlarının qazanılması istiqamətində həyata keçirilən məqsədyönlü siyasətin mühüm tərkib hissəsidir.
Azərbaycanın beynəlxalq iqtisadi platformalarda fəal iştirakı, ixracyönümlü siyasəti və "Made in Azerbaijan" brendinin uğurlu təşviqi ölkənin qlobal iqtisadi sistemdə mövqeyini daha da gücləndirir. 9-cu Çin-Avrasiya Sərgisi kimi nüfuzlu tədbirlər isə yeni tərəfdaşlıqların qurulmasına və qarşılıqlı investisiya imkanlarının genişlənməsinə mühüm töhfə verir. Bütün bunlar Azərbaycanın dayanıqlı inkişaf yolunda inamla irəlilədiyini və regionun aparıcı iqtisadi mərkəzlərindən biri kimi mövqeyini möhkəmləndirdiyini bir daha təsdiqləyir.
Züleyxa ƏLİYEVA ,
"Azərbaycan"
jpg_1782946307.jpg)
