“Rəqəmsal inkişaf Azərbaycan üçün kompleks strateji prioritetdir”

Xəbər verildiyi kimi, Birinci vitse-prezident Mehriban Əliyevanın sədrliyi ilə Rəqəmsal İnkişaf Şurasının ilk iclası keçirilib. Şura Azərbaycanın regionda rəqəmsal transformasiya və innovasiya sahəsində lider mövqeyini daha da möhkəmləndirməyi hədəfləyir. Dövlət xidmətlərinin tam rəqəmsallaşdırılması, xidmət təminatında innovasiyanın, süni intellektin tətbiq edilməsi ilə vətəndaşlara göstərilən xidmətlər asanlaşacaq, vətəndaş məmnunluğu artacaq və vətəndaş-məmur təması minimuma enəcək. 

Milli Məclisin deputatı Pərvanə VƏLİYEVA qəzetimizə müsahibəsində bildirib ki, Prezident İlham Əliyevin təsdiq etdiyi "Azərbaycan Respublikasında rəqəmsal inkişafın sürətləndirilməsinə dair 2026-2028-ci illər üçün Fəaliyyət Planı" bu istiqamətdə ölkənin strateji yol xəritəsini müəyyən edir: "Eyni zamanda Azərbaycanda 2025-2028-ci illər üçün "Süni İntellekt Strategiyası" da təsdiq edilib. Həmçinin qanunvericilikdə dəyişikliklər üçün yeni paket hazırlanıb və müəyyən qanunlara dəyişikliklər edilib. Buna nümunə olaraq son dövrlər "İnformasiya, informasiyalaşdırma və informasiyanın mühafizəsi haqqında" qanuna edilən mütərəqqi dəyişiklikləri göstərə bilərik".

Deputat qeyd edib ki, dövlət xidmətlərinin rəqəmsallaşma sahəsində əsas yeniliklərindən biri vahid "mygov" ekosisteminin tətbiqidir və bu yanaşma xidmətlərin daha operativ və rahat şəkildə təqdim olunmasını təmin edəcək, həmçinin proaktiv dövlət xidmətlərinin genişləndirilməsi nəticəsində bir sıra xidmətlər vətəndaşın əlavə müraciətinə ehtiyac olmadan avtomatik təqdim olunacaq. "O cümlədən, sürücülük vəsiqəsinin dəyişdirilməsi üçün müraciətin "mygov" üzərindən həyata keçirilməsi, ali təhsil müəssisələrinə qəbul olan şəxslərin qeydiyyatını onlayn tamamlaya bilməsi, azyaşlının ölkəni tərk etməsi üçün razılıq ərizəsinin əldə edilməsi, eləcə də tərcümə sənədlərinin təsdiqi kimi daha bir çox xidmətin artıq "mygov" üzərindən aparıla bilməsi vətəndaşlara operativ və keyfiyyətli xidmətin göstərilməsini və məmnunluğun daha da artırılmasını təmin edir. Qeyd edim ki, bu, həm də ekologiyamıza müsbət təsir edir, kağızdan, nəqliyyatdan istifadə, yol xərcləri xeyli azalır, vaxta qənaət olunur. Artıq evdən, iş yerindən ayrılmadan vətəndaş bir çox problemini rəqəmsal mühitdə həll edə biləcək", - deyə o əlavə edib.

P.Vəliyeva bildirib ki, sahibkarların da rəqəmsal mühitə əlçatanlığı təmin ediləcək,  "mygov biznes" platforması onların işlərini asanlaşdıracaq, vahid platforma təklif edəcək ki, bu da səmərəliliyi artıracaq. 

Deputat deyib ki, dövlət xidmətlərində süni intellekt əsaslı həllərin tətbiqi, virtual köməkçilərin istifadəsi, milli hesablama infrastrukturunun yaradılması və tənzimləyici test mühitinin formalaşdırılması bu sahədə Azərbaycanın yeni inkişaf mərhələsinə qədəm qoyduğunu göstərir: "Bütün bu proseslər milli maraqların qorunması və məlumat suverenliyinin təmin edilməsi prinsipləri əsasında həyata keçirilir. Milli Kibertəhlükəsizlik Agentliyinin yaradılması, informasiya infrastrukturunun qorunması, süni intellekt əsaslı kibermüdafiə mexanizmlərinin tətbiqi və kibergigiyena üzrə maarifləndirmə tədbirləri Azərbaycanın rəqəmsal təhlükəsizlik sistemini yeni səviyyəyə yüksəldəcək". 

Rəqəmsal transformasiyanın mühüm istiqamətlərindən birinin təhsil olduğunu diqqətə çatdıran müsahibimiz qeyd edib ki, yeni nəsil arasında rəqəmsal kompetensiyaların formalaşdırılması, tədris prosesində süni intellekt texnologiyalarının tətbiqi və insan kapitalının gücləndirilməsi gələcəyin rəqabətqabiliyyətli cəmiyyətinin qurulmasına xidmət edir: "Həyata keçirilən islahatlar göstərir ki, Azərbaycan üçün rəqəmsal inkişaf texniki bir məsələ deyil, dövlət idarəçiliyinin modernləşdirilməsi, iqtisadi şaxələndirmə, milli təhlükəsizlik və insan kapitalının inkişafını əhatə edən kompleks strateji prioritetdir".

Əsmər QARDAŞXANOVA,

"Azərbaycan"