Felyeton
Deyir, keçinin əcəli çatanda buynuzunu çobanın çomağına sürtər!
Otuz ildən çoxdur ki, Ermənistan özünü məşhur "O olmasın, bu olsun" filmindəki ərköyün keçi kimi aparır.
Özünə yox, arxasındakı "qoçu"lara - ABŞ-yə, Fransaya, Avropa İttifaqına və digərlərinə güvənir.
44 günlük Zəfər müharibəsində qüdrətli Azərbaycan Ordusu bu keçinin qulağını möhkəmcə buraraq mıqqıltısını dünyaya yaydı!
Sonradan yenə cızıqdan çıxmaq istəyini görərək, uzanmış qulağını 2-3 dəfə də yüngülvari dartdı!
Keçi bir az ağıllanan kimi oldu, hətta "Qarabağ Azərbaycandır!" deyərək həqiqəti boynuna aldı!
Amma keçi keçidir də...
Dərin ağlı olsa, keçilik etməz ki...
Əslində, nə qədər ağıldan kəm olsa da, heç zaman unutmamalıdır ki, "dəmir yumruq" var və o işə düşəndə heç kim dadına çata bilməyəcəkdir!
***
Keçinin yaddaşını təzələməkdən ötrü bəzi məqamları ona xatırlatmaq istərdik.
Ermənistan kimlərinsə köməyi ilə Azərbaycan torpaqlarını işğal etmişdi və lovğalanaraq özünü "qalib dövlət", "qalib millət" adlandırırdı.
O qədər qudurmuşdu ki (qudurtmuşdular ki), nə BMT-ni saya salırdı, nə beynəlxalq hüququ, nə də sülh çağırışlarını.
Gözünə döndüyüm Azərbaycan Ordusu 44 gündə onu elə ağıllandırdı ki, təkcə özü yox, bütün dünya da buna məəttəl qalaraq "afərin" dedi!
Bir balaca özünə gəlib toxtayan kimi yenidən çaşdı:
* Gah Azərbaycan Ordusunun hərbi postuna qumbara tulladı;
* Gah ekofəallarımızın öz mədənlərimizdə monitorinq keçirmələrinə imkan vermədi;
* Gah Ermənistandan Laçın yolu ilə mina daşıyaraq yenidən ərazilərimizdə basdırmağa başladı;
* Gah qondarma qurumlarında təzədən "prezident seçkiləri" keçirdilər.
Hətta dəfələrlə atəşkəsi pozaraq hədlərini aşdılar!
"Dəmir yumruğ"un 2023-cü ildəki iki zərbəsi - 23 mart və 19-20 sentyabr əməliyyatları "axmaq baş sahibinə qapaz yedizdirər" misalının həqiqiliyini də hayların yadına saldı!
"Dəmir yumruğ"un vur-tut 23 saat çəkən əməliyyatı zamanı:
* Ermənilərin otuz il ərzində yaratdıqları müdafiə mövqeləri, bunkerləri və digər gizlinləri darmadağın edildi!
* Azərbaycan ərazilərində qalmış qanunsuz silahlı birləşmələr məsələnin qəlizliyini görən kimi silah-sursatlarını təhvil verərək, əllərini yuxarı qaldırıb təslim oldular!
* Gündüz "sadə əməkçi", ara qarışanda döyüşçüyə çevrilən terrorçular isə silahlarını atıb mülki əhaliyə qoşuldular!
* Azərbaycan vətəndaşlığını qəbul etmək istəməyənlər, çörəyini yeyib suyunu içdikləri dövlətin qanunları ilə yaşamaqdan imtina edənlər şələ-külələrini yığışdırıb Ermənistana üz tutdular!
Azərbaycan Laçın qapısını geniş açaraq bircəsinin burnunu belə qanatmadan hamısını mehribanlıqla yola saldı...
Azərbaycan torpağını Ermənistana birləşdirmək istəyənlər torpaqsız-zadsız özləri Ermənistana birləşdilər...
Beynəlxalq hüquq da, ədalət də, zəfər də təmin olundu!
Necə deyərlər, səninki səndə, mənimki məndə!
***
Bütün bunlardan sonra bir qədər sakitləşdilər!
Hətta Qazax bölgəsindəki 4 kəndimizi dinməz-söyləməz geriyə qaytarmaqla delimitasiya və demarkasiya prosesinə də başladılar.
Sonra yenə fitə getdilər...
* AŞPA oradan bir kağız parçası yazdı...
* Fransa "əlidurbinli" casus dəstəsi göndərdi...
* "Böyük bacı"sı ona bir qədər köhnə - kürüş texnika, silah-sursat verdi...
* Özü Hindistandan nisyə silahlar aldı...
* Dartılmış qulağına kimlərsə "qorxma" - deyə pıçıldadı...
Yenə ağlını itirərək cızığından çıxmağa başlayır...
Həm də, deyəsən, unudur: cızığından çıxanda Azərbaycan qulağını elə burur ki, zoqqultusu uzun müddət davam edir!
Növbəti dəfə Ermənistanı yenidən qudurtmaq istəyirlər:
* Avropa Sülh Fondu cibinə bir on milyon avro basdı!
* ABŞ gəlib birgə təlimlər keçirdi.
* KTMT-dən çıxacağı ilə hədələdi.
Gördü hələ ki, qulağına əl atan yoxdur, yenidən ürəklənərək Rusiyaya dirsək göstərməyə başladı!
Üstəlik, yenidən iriçaplı silahlardan atəş açmaqla Azərbaycanla şərti sərhəddə sülh sükutunu pozdu.
Kvadrokopter vasitəsilə ərazilərimizə uçuşlar keçirərək kəşfiyyat aparmağa cəhd etdi.
Əvvəlcə Rusiya Prezidentinin mətbuat katibi Dmitri Peskov dolaqvari ifadə ilə başlarını sığalladı: "Ermənistan suveren ölkədir, bizim üçün qardaş ölkədir, biz Ermənistanın siyasi müdrikliyinə ümid edirik".
Sözünün mabədində isə xəbərdarlıqlarını etdi: "Biz sadəcə olaraq istəmirik ki, onlar Kiyevin bir vaxtlar seçdiyi alternativsizliyi seçsinlər".
Bu diplomatik ifadənin açması belədir ki, gör Rusiya ordusu arxasında NATO-nun durduğu Ukraynanı o günə qoyubsa, bapbalaca Ermənistanın başında necə turp əkər!
Ardınca Azərbaycan Respublikası Müdafiə Nazirliyi də öz xəbərdarlığını bəyanat şəkilində açıqladı:
"Azərbaycan Respublikasının Müdafiə Nazirliyi son günlərdə Ermənistanın Kəlbəcər istiqamətində ağır silahlar və Tovuz istiqamətində kvadrokopter tətbiq etməklə təxribatlar törətməsi barədə məlumatlar verib.
Qeyd edək ki, Ermənistan tərəfindən bu kimi təxribatların törədilməsi birinci hal deyil və davamlı xarakter daşıyır. Amerika Birləşmiş Ştatlarının Ermənistanda keçirdiyi hərbi təlimlər, Fransanın Ermənistanı öldürücü silahlarla təchiz etməsi və Avropa İttifaqı tərəfindən "Avropa Sülh Fondu" adı altında Ermənistana ilkin mərhələdə on milyon avro dəyərində hərbi yardımın göstərilməsi işğalçı Ermənistanı bu kimi təxribatlar törətməyə həvəsləndirir və Azərbaycana qarşı növbəti müharibəyə hazırlaşdırılmasına dəlalət edir.
Müdafiə Nazirliyi bir daha xəbərdarlıq edir ki, Ermənistan və onun havadarları Cənubi Qafqaz regionunda yeni müharibə ocağı yaratmaq kimi niyyətlərindən çəkinməlidirlər. Ölkəmizə qarşı bu kimi təxribat əməlləri dayandırılmadığı təqdirdə, Azərbaycan Respublikası Silahlı Qüvvələrinin arsenalında olan bütün vasitələrdən istifadə etməklə özünü müdafiə məqsədilə lazımi cavab tədbirləri görüləcək.
Bildiririk ki, regionda vəziyyətin gərginləşməsinə görə bütün məsuliyyət Ermənistanın hərbi-siyasi rəhbərliyinin və onun havadarlarının üzərinə düşəcək".
***
Otuz il ərzində Ermənistan kimlərəsə arxalandı (onların sırasında bu gün arxa çevirdiyi də var) və sülhə gəlmədi!
Özünə pis oldu:
* Beynəlxalq transmilli layihələrdən kənarda qaldı.
* Ayaq tutan vətəndaşı xaricə qaçdığından ölkəsi boşaldı.
* Əhalisi yoxsullaşdı, dilənçi gününə düşdü.
* Yerablur adlı "geniş ərazi" yiyəsi oldu.
Bütün bunları bir daha təkrarlamaq istəyirsə, qoy silahlansın, təlimlər keçirsin, pul yığsın, atəşkəsi pozsun, dron uçursun.
44 günlük müharibənin dərslərini bir daha xatırladırıq:
Yenidən hərbi əməliyyatlara başlasa, qisas almaq istəsə, bu gün onu qızışdıranların, təhrik edənlərin əsgərləri forpost ölkə uğrunda vuruşub özünü qurban verməyəcəkdir!
Azərbaycan Ordusu ilə təkbətək qalmalı olacaqdır!
Nəticəsi nə olacaq, bunu dünya bilir, özü də növbəti dəfə görəcəkdir!
Keçiliyin sonu qəssabın bıçağında tamamlanır!
Bəxtiyar SADIQOV
