Bu günlər Qusar Rayon İcra Hakimiyyətinin təşkilatçılığı ilə akademik C.Abdullayev adına Elmi-Tədqiqat Kardiologiya İnstitutunun əməkdaşları rayonun mərkəzi xəstəxanasında şəhid ailələri və qazilər üçün tibbi müayinə aksiyası keçiriblər.
Xəstəxanaya gələn onlarla insan müayinədən keçmək üçün həkimlər tərəfindən qeydiyyata alınıblar. Aksiya ilə əlaqədar rayon rəhbərliyi, xəstəxananın əməkdaşları və digər rəsmi şəxslər girəcəkdə şəhidlərimizin xatirəsinə həsr edilmiş guşəni ziyarət edərək, onların şəkilləri önünə gül dəstələri düzüblər. Ziyarətçilərə aksiya ilə bağlı ətraflı məlumat verilərək bildirilib ki, təşəbbüsün əsas məqsədi vətən uğrunda sağlamlıqlarını itirmiş qəhrəmanlarımıza, şəhid ailələrinə peşəkar tibbi xidmət təqdim etməkdir. Bunun üçün rayon üzrə şəhid ailələri və qazilərin siyahısı müəyyənləşdirilib. Yaşlı insanlara xidmət göstərmək üçün səyyar dəstə də yaradılıb. Ucqar dağ kəndlərində yaşayan şəhid ailələri və qazilər də unudulmayıb.
Sonra RİH-in başçısı Sahir Məmmədxanov aksiyada iştirak edən şəhid ailələri və qazilərlə görüşüb, onlarla söhbət edib, problemlərini dinləyib. İştirakçılar xidmətə görə minnətdarlıqlarını bildiriblər.
Aksiya çərçivəsində 23 şəhid və 24 qazi ailəsinin üzvləri, 18 qazi - ümumilikdə 65 nəfər müxtəlif tibbi xidmətlərdən yararlanıb. Onlara laborator analizlər, ultrasəs müayinəsi (USM), elektrokardioqrafiya (EKQ), exokardioqrafiya (EXO-KQ), eləcə də kardioloq, nevropatoloq və endokrinoloq müayinələri aparılıb.
Qeyd etmək lazımdır ki, aksiyada iştirak edən 32 nəfər birbaşa institutun arterial hipertenziya şöbəsinin rəhbəri, Kardiologiya kafedrasının müdiri, professor Tofiq Cahangirov tərəfindən müayinə olunub.
Aksiyanın sonunda ilin sonunadək daha bir neçə dəfə belə tədbirlərin keçirilməsi qərara alınıb.
A.ƏLİYEV,
"Azərbaycan"
jpg_1792100672.jpg)
