Torpaqlarımızın azadlığı uğrunda gedən döyüşlərdə böyük igidlik göstərərək şəhidlik zirvəsinə yüksələn, hünəri ilə adını qəhrəmanlıq tariximizə yazan igidlərimizdən biri də baş çavuş Nahid Musa oğlu Ağalarovdur.
Qısa, amma şərəfli döyüş yolu keçən Nahid 19 dekabr 1983-cü ildə Goranboyun Xan Qərvənd kəndində anadan olub. Orta təhsilini başa vuran Nahid 2002-ci ildə ordu sıralarına çağırılıb. O, kiçik yaşlarından erməni işğalçılarına qarşı nifrət hissi ilə böyümüşdü və bu, səbəbsiz deyildi. Çünki böyük qardaşı Yaşar Ağalarov Birinci Qarabağ müharibəsində Şuşa uğrunda gedən döyüşlərdə şəhid olmuşdu. Erməni işğalçıları torpaqlarımıza hücum çəkəndə Yaşar könüllü yurdumuzun müdafiəsinə yollanmışdı. Bir çox çətin əməliyyatlarda iştirak edən Yaşar Daşaltı əməliyyatında itkin düşmüşdür.
Həm də bu səbəbdən Nahid ordu sıralarına çağırılanda ürəyi erməni qəsbkarlarna qarşı nifrət hissi ilə döyünürdü. Düşmənlərdən Vətənin və qardaşının qisasını almaq üçün Qarabağın azadlığı uğrunda müharibənin başlamasını gözləyirdi. Nahid Ağalarov xidmətə başladığı ilk günlərdən silahların dilini dərindən öyrənməyə çalışırdı. Yaxşı bilirdi ki, hazırlıqlı əsgər düşmənin qənimidir.
2003-cü ildə xidmətini başa vurub doğmalarının yanına qayıdan Nahid başqa sahələrdə işləsə də, fikri ordu sıralarında qalmışdı. Yenidən ömrünü hərbi xidmətə bağlamaq istəyirdi. Bu arzusunu 2014-cü ildə həyata keçirdi. Ordu sıralarına qayıtdı, Vətənə əsgər oldu, torpaqlarımızın müdafiəsində dayandı.
Nəhayət, hamı kimi Nahid Ağalarovun da gözlədiyi gün - 27 sentyabr 2020-ci il qapımızı döydü. Qarabağın və Şərqi Zəngəzurun erməni işğalçılarından azad olunması uğrunda müharibə başladı. Baş çavuş Nahid əməliyyatların ilk günlərindən döyüşlərə atıldı. Onların bölüklərinin şəxsi heyəti əvvəlcə Füzulinin, sonra Xocavəndin azadlığı uğrunda vuruşdu. Neçə-neçə qanlı döyüşlərdə iştirak edən Nahid Ağalarov üzərinə düşən tapşırıqların öhdəsindən bacarıqla gəldi. Dəqiq atəşlə onlarla düşməni məhv etdi, həm qardaşı Yaşarın, həm də başqa şəhidlərimizin intiqamını aldı.
Baş çavuş Nahid Ağalarov döyüşə-döyüşə Şuşaya qədər gedib çıxdı. Başqa əsgərlər kimi, düşmən üzərində qazanılan Zəfərdə onun da payı oldu. Müharibə başlayandan sona qədər əldə silah işğalçılara qarşı vuruşdu, bir an, bir gün olsun belə, silahını yerə qoymadı.
İkinci Qarabağ müharibəsi Zəfərlə başa çatsa da, qarşıda işğalçılardan azad edilməli olan Xankəndi, Xocalı, Ağdərə, Əsgəran və başqa şəhər və kəndlər var idi. O üzdən Nahid vuruşmaq, torpaqlarımızı erməni işğalçılarından tamamilə təmizləmək arzusu ilə yaşayırdı. Amma təəssüflər olsun ki, Nahid Ağalarov 23 noyabr 2020-ci ildə Şuşa yolu ətrafında komandirin verdiyi döyüş tapşırığını yerinə yetirərkən düşmənlərin basdırdığı minaya düşərək həlak oldu. Şəhid ölümündən sonra "Vətən uğrunda" və "Xocavəndin azad olunmasına görə" medalları ilə təltif edildi.
Nahidin xanımı Tinatin Ağalarova deyir ki, həyat yoldaşı çox qayğıkeş idi: "2018-ci ilin noyabr ayında qızımız Zəhra dünyaya gəldi. Valideyn olduğumuz üçün çox sevinirdik. Böyük sevinc içində olan Nahid deyirdi ki, Zəhra balamı ürəyimdən keçən kimi böyüdəcəyəm, əlindən tutub məktəbə aparacağam. Təəssüf ki, Nahid həmin günü görə bilmədi. Müharibəyə yola düşəndə Zəhra balamızla bağlı olan arzularını mənə tapşırdı. Torpaqlarımızı düşmən tapdağından azad edəcəyini, şəhidlərin intiqamını alacağını dedi. Şəhidliyi bahasına olsa da, dediyini etdi. Nahidi sonuncu dəfə noyabrın 10-da gördüm. İkigünlük icazə alıb evə gəlmişdi. Axırıncı dəfə noyabrın 23-də zəng vurmuşdu, xeyli danışdıq. Deyirdi ki, qızımı da, səni də çox sevirəm, özünüzə yaxşı baxın. Balamı sənə əmanət edirəm. Elə həmin gün də şəhid xəbərini eşitdik. Demə, şəhid olacağı ürəyinə damıbmış. Gözüm həmişə, hər yerdə onu axtara-axtara ömür yoluma davam edirəm. Qızım Zəhranı Nahidin adına, göstərdiyi qəhrəmanlığa layiq böyüdəcəyəm".
Bir ailədən iki oğul - Yaşar və Nahid Ağalarov qardaşları şəhiddirlər. İkisi də Qarabağın azadlığı uğrunda gedən əməliyatlarda həlak olublar - Yaşar birinci, Nahid isə ikinci Qarabağ müharibəsində. Ayrı-ayrı vaxtlarda şəhid olsalar da, bir amal, bir məqsəd uğrunda, ölkəmizin ərazi bütövlüyü və suverenliyi naminə eyni məkanda - Şuşada canlarından keçiblər. Hər birinin ömrü bir qəhrəmanlıq dastanı olan belə igid oğulları xalqımız heç vaxt unutmur, xatirələrini ehtiramla yad edir, onlarla qürur duyur!
Vahid MƏHƏRRƏMOV,
"Azərbaycan"
