Göygöl fermerləri yaz-tarla işlərini ləngitməməyə çalışırlar
Göygöl təkcə füsunkar təbiəti ilə deyil, işgüzar insanları ilə də seçilir. Hər ili uğurlu göstəricilərlə yola salan rayonun fermerləri cari ilin təsərrüfat işlərinə də həvəslə başlamışlar.
Keçən ilin payızında cari ilin məhsulu üçün rayon üzrə 5369,5 hektarda dən və yaşıl yem üçün payızlıq, eləcə də 82 hektarda (aprel ayının 1-nə kimi) dənli bitkilərin səpini aparılmışdır. Ümumiyyətlə, bahar girəndən tarlalarda yazlıq bitkilərin kütləvi əkininə başlanılmışdır. Əldə etdiyimiz son məlumata görə, bu dövr 73,3 hektarda yazlıq arpa, 1,6 hektarda yazlıq buğda, 7,1 hektarda vələmir, 1,5 hektarda yem çuğunduru, 42,5 hektarda yem bitkiləri, 1 hektarda günəbaxan, 82 hektarda kartof, 64 hektarda tərəvəz əkilmişdir. Aprelin 1-nə kimi 5642,5 hektarda payızlıq və yazlıq bitkilərin əkini aparılmışdır ki, bu da aparılacaq əkinin 10,4 faizi qədərdir.
Hazırda 908,2 hektar meyvə və giləmeyvə, 717,7 hektar üzüm bağlarında aqrotexniki tədbirlər həyata keçirilir - ağaclar budanır, torpaq yumşaldılır, gübrələmə və zərərvericilərə qarşı profilaktik tədbirlər görülür.
Kənd təsərrüfatının digər sahələrində də işlər davam edir. Xüsusən heyvandarlığın inkişafına diqqət artırılır. Bu ilin yanvar-mart aylarında quş əti də daxil olmaqla rayon üzrə diri çəkidə 1232,7 ton ət, 6469,8 ton süd, 4 milyon 314 min ədəd yumurta istehsal edilmişdir. Bu, 2025-ci ilin müvafiq dövrünə nisbətən ət istehsalı üzrə 1,1, süd istehsalı üzrə 0,8 faiz artım deməkdir. Onu da qeyd edək ki, aprelin 1-nə olan vəziyyətə görə rayon üzrə 21 min qaramal (onun 10,1 min başı inək və camışdır), 123,4 min baş qoyun və keçi var.
Əkin sahələrinin genişlənməsi, yazlıq səpin işlərinin vaxtında aparılması aqrotexniki tədbirlərin həyata keçirilməsi və heyvandarlıq sahəsində olan artım rayonun aqrar sektorunda işlərin yaxşı getdiyini göstərir. Bu inkişaf tempi ilin növbəti aylarında da məhsuldarlığın artacağına və kənd təsərrüfatında ümumi göstəricilərin daha da yaxşılaşacağına əsaslı zəmin yaradır.
İndi rayonda onlarca fermer təsərrüfatı var ki, onlar hər il nümunə gəstərirlər. Belə fermerlərdən biri Rəfail Mustafayevdir. Uzun illərdir taxılçılıq sahəsində yüksək göstəricilər əldə edən fermer bu mövsüm 203 hektarda “Qırmızı gül-1” buğda sortu yetişdirir. Hər hektardan 45-50 sentner məhsul götürən Rəfail Mustafayev dövlət tərəfindən verilən subsidiyaların hesabına təsərrüfatını daha da genişləndirmişdir. Hazırda fermerin təsərrüfatında xeyli sayda texnika, cümlədən taxılbiçən kombayn, şum traktoru, taxılsəpən və digər avadanlıqlar var.
Rayonda fərqlənən fermerlərdən biri də Mollacəlilli kənd sakini Mübariz Əliyevdir. O, uzun illərdir ki, heyvandarlıq sahəsində fəaliyyət göstərir. Ailə təsərrüfatına başçılıq edən fermer hazırda 50 baş yerli qaramal bəsləyir. O, hər il süni mayalama yolu ilə cins düyələr əldə edir. Dövlətin heyvandarlıq sahəsinə göstərdiyi dəstəkdən yararlanan M.Əliyev daha çox məhsuldarlığa fikir verir.
Fermer Fuad Abbasov isə təsərrüfatında moruq yetişdirməklə məşğuldur. Fəaliyyətə 1 hektar sahədə moruq əkini ilə başlayan təsərrüfat sahibinin indi 7,3 hektarda intensiv moruq bağı var. İl ərzində hər hektardan orta hesabla 8 tona yaxın məhsul götürülən təsərrüfatda hazırda 20-25 nəfər işçi çalışır.
Sabir ƏLİYEV,
“Azərbaycan”
jpeg_1776839986.jpeg)
