Fransada lisey şagirdlərinin daha yaxşı təhsil və iş şəraiti tələbi ilə keçirdiyi etiraz aksiyaları oktyabrın 5-də davam edib. Milli təhsil naziri bildirib ki, ölkə üzrə 3700 liseydən 400-500-də dərslər “tamamilə və ya qismən” dayandırılacaq.
AZƏRTAC xəbər verir ki, İle-de-Frans regionunda isə liseylərin üçdəbirindən çoxunun bazar ertəsi fəaliyyətini dayandıracağı açıqlanıb. Regionun prezidenti Valeri Pekressin sözlərinə görə, bir sıra təhsil müəssisələrində giriş qapıları bağlı qalacaq.
Fransanın Baş naziri Sebastyan Lökornü hökumət üzvlərinə, o cümlədən milli təhsil, səhiyyə və daxili işlər nazirlərinə beş istiqamətdən ibarət fəaliyyət planı göndərib. Baş nazir ayın sonunadək konkret qərarların qəbul olunmasını tələb edib və təhlükəsizlik şəraitinin imkan verdiyi bütün məktəblərdə dərslərin bərpasına çağırıb.
Lisey Şagirdləri Həmkarlar İttifaqı çərşənbə axşamı, oktyabrın 6-da “III akt” adlandırılan genişmiqyaslı aksiya keçirilməsinə çağırış edib. Təşəbbüsə təhsil sahəsində fəaliyyət göstərən bir sıra həmkarlar ittifaqları da dəstək verib. CGT həmkarlar ittifaqı isə nümayişlər zamanı şagirdlərin yanında olacağını və aksiyaların təhlükəsiz keçirilməsinə kömək edəcəyini bildirib.
Etirazlar fonunda Marseldə 15 yaş yarımlıq yeniyetmə barəsində də məhkəmə qərarı verilib. O, lisey şagirdlərinin nümayişləri zamanı yoldan keçən qadının üzünə alışan sprey püskürtməkdə şübhəli bilinir. Marsel prokurorunun məlumatına görə, yeniyetmə “barbarlıq aktı” ittihamı ilə təqsirləndirilərək ilkin həbsə göndərilib.
Fransanın daxili işlər naziri Loran Nünez polis və jandarm qüvvələrinin etirazlar zamanı “qeyri-mütənasib” hərəkətlərə yol verdiyi barədə ittihamları rədd edib. Nazir bildirib ki, polis əməkdaşları və jandarmlar dağıntıların, zorakılıq və digər qanun pozuntularının qarşısını almaq üçün “qətiyyətlə və gecikmədən” müdaxilə edirlər. Onun sözlərinə görə, bu müdaxilələr rəhbərliyin nəzarəti altında və zərurət yarandıqda məhkəmə orqanlarının nəzarəti ilə mütənasiblik prinsipi əsasında həyata keçirilir. Bu açıqlama Fransanın Hakimlər Həmkarlar İttifaqının gənclərə qarşı repressiyalara son qoyulması çağırışından sonra səsləndirilib.
