Strateji Kommunikasiyalar Mərkəzi (SKM) tərəfindən hazırlanmış “Erməni orta məktəblərində nifrət nitqi və tarixi faktların saxtalaşdırılması” adlı kitabın təqdimat mərasimi keçirilib.
AZƏRTAC xəbər verir ki, hesabat xarakterli nəşrdə Ermənistanın orta məktəb dərsliklərində yer alan nifrət nitqi nümunələri, tarixi hadisələrin təhrif olunması halları, eləcə də bunun regional sülh və qarşılıqlı etimad mühitinə təsirləri araşdırılıb.
SKM sədrinin köməkçisi, layihə rəhbəri Əli Abdullayev bildirib ki, araşdırma həmin materiallarda nifrət nitqinin, etnik və milli qruplara münasibətin, tarixi faktların mümkün təhriflərinin və stereotiplərin formalaşdırılması hallarının müəyyən edilməsidir.
Onun sözlərinə görə, araşdırma Qarabağda fəaliyyət göstərmiş təhsil müəssisələrində aşkar olunmuş materiallar əsasında aparılıb.
“Dərsliklər, plakatlar, tədris vəsaitləri və arxiv materialları toplanaraq sistemli şəkildə təhlil olunub. Hesabatın nəticələrinə əsasən, təhlil edilmiş materialların bir hissəsində “düşmən obrazı”nın formalaşdırılması, etnik qarşıdurmanın gücləndirilməsi və tarixi hadisələrin siyasi məqsədlərlə təqdim olunması halları mövcuddur. Araşdırma zamanı istifadə edilən 1000-dən çox materialda 3000-ə yaxın belə hal aşkarlanıb. Həmin faktlar QR kod vasitəsilə kitabda yerləşdirilib. Müəlliflər təhsil məzmununun beynəlxalq standartlara uyğun yenidən qiymətləndirilməsini və daha obyektiv yanaşmaların tətbiqini tövsiyə edirlər”, – deyə Əli Abdullayev vurğulayıb.
AMEA-nın Tarix və Etnologiya İnstitutunun Qərbi Azərbaycan tarixi şöbəsinin müdiri Cəbi Bəhramov Ermənistanın tədris materiallarında yer alan tarixi narrativlərin elmi yanaşma ilə ziddiyyət təşkil edən məqamlarına toxunub.
O bildirib ki, azərbaycanlıların təqdimatı və regionun tarixi irsi ilə bağlı bəzi məzmunlar elmi faktlardan uzaq interpretasiyalara əsaslanır və bu cür yanaşmalar tarixi həqiqətlərin obyektiv şəkildə öyrənilməsinə mane olur.
Milli Məclisin deputatı Rizvan Nəbiyev qeyd edib ki, xalqlar arasında düşmənçilik yalnız hərbi müstəvidə formalaşmır, bunun ideoloji və informasiya mərhələləri də mövcuddur. Onun sözlərinə görə, uşaqlara erkən yaşlardan nifrət düşüncəsinin aşılanması gələcək nəsillərin dünyagörüşünə və davranış modelinə ciddi təsir göstərir.
Azərbaycan Milli Qeyri-Hökumət Təşkilatları Forumunun İdarə Heyətinin sədri Ramil İsgəndərli isə vurğulayıb ki, kitabda təqdim olunan faktlar epizodik deyil, sistemli xarakter daşıyır: “Məktəb dərsliklərində nifrət və düşmənçilik məzmununun yer alması gələcək nəsillərin şüurunun məqsədyönlü şəkildə formalaşdırılmasına xidmət edir və bu, regionda davamlı sülhün qurulmasına mane olan amillərdən biridir.
Beynəlxalq Münasibətlərin Təhlili Mərkəzinin nümayəndəsi Fuad Abdullayev də kitabın beynəlxalq auditoriyaya çatdırılmasının, elmi müzakirəyə çıxarılmasının və mövzu ilə bağlı araşdırmaların genişləndirilməsinin vacibliyini qeyd edib.
Tədbir çərçivəsində SKM tərəfindən hazırlanmış xüsusi sərgi də nümayiş olunub. Sərgidə erməni dərsliklərində yer alan nifrət nitqi elementləri və tarixi saxtakarlıqları əks etdirən faktlar vizual materiallar vasitəsilə təqdim edilib.
Təqdimat mərasimində dövlət qurumlarının nümayəndələri, ekspertlər, tədqiqatçılar, media təmsilçiləri və ictimaiyyət nümayəndələri iştirak ediblər.
