Bu gün Azərbaycanın Xalq yazıçısı, görkəmli dövlət və ictimai xadim Elçin Əfəndiyevin anım günündə Fəxri xiyabanda onun qəbirüstü memorial abidəsinin açılışı olub. Elçin Əfəndiyevin vəfatından sonra onun memorial abidəsinin hazırlanması ilə bağlı müraciət Azərbaycan Rəssamlıq Akademiyasının rektoru, Xalq rəssamı, professor Natiq Əliyevə ünvanlanıb.
AZƏRTAC-ın müxbiri ilə söhbətində abidənin müəllifi Natiq Əliyev bildirib ki, uzun illər tanıdığı Elçin Əfəndiyev onun yaddaşında yalnız böyük yazıçı və dövlət xadimi kimi deyil, həm də yaradıcı insanlara daim diqqət və qayğı göstərən, sadə, səmimi və yüksək mənəvi keyfiyyətlərə malik şəxsiyyət kimi qalıb.
“Onun obrazını işləmək mənim üçün çətin olmadı. Çünki Elçin müəllimin siması, xarakteri və insan kimi xüsusiyyətləri daim yaddaşımda idi”, - deyə Natiq Əliyev qeyd edib.
O bildirib ki, memorial abidənin hazırlanması uzunmüddətli və məsuliyyətli yaradıcı proses olub. Abidənin ərsəyə gətirilməsi zamanı müxtəlif materiallardan istifadə edilib, eyni zamanda, Elçin Əfəndiyevin ailə üzvlərinin fikirləri və seçimləri nəzərə alınıb.
“Abidənin forması və kompozisiyası üzərində uzun müddət çalışdım. Səkkizdən artıq variant hazırladım, müxtəlif eskizlər işlədim. Təxminən üç-dörd ay ərzində plastilin eskizlər üzərində işləyərək Elçin müəllimin obrazını və abidənin ümumi bədii həllini ən dolğun şəkildə ifadə etməyə çalışdım. Ümumilikdə isə bu əsər üzərində iş təxminən bir il davam etdi”, - deyə Xalq rəssamı vurğulayıb.
Natiq Əliyev Elçin Əfəndiyevlə uzun illər davam edən yaradıcılıq münasibətlərini də xatırlayıb. Onun sözlərinə görə, Xalq yazıçısı onun kiçikhəcmli heykəltaraşlıq əsərlərinə xüsusi maraq göstərib və bir neçə əsərini şəxsi kolleksiyasında qoruyub saxlayıb.
“Elçin müəllim kimi yüksək zövqə və sənətə dəyərvermə bacarığına malik bir insanın yaradıcılığıma bu cür qiymət verməsi mənim üçün böyük fəxr idi. O, sənətin mahiyyətini anlayan, sənətkar əməyinə hörmətlə yanaşan və yaradıcı insanları daim dəstəkləyən şəxsiyyətlərdən biri idi”, - deyə Xalq rəssamı bildirib.
