Beşinci sosial paket 3 milyon vətəndaşı əhatə edir
Azərbaycanda əhalinin sosial təminatının gücləndirilməsinin dövlət siyasətinin prioritet istiqaməti olduğu Prezident İlham Əliyevin növbəti fərmanı ilə bir daha təsdiqini tapdı. İmzalanan sənədə əsasən, iyul ayından etibarən sosial müavinətlər və təqaüdlər artırılacaq. Bura əlilliyə görə müavinətlər, müxtəlif təqaüdlər, fəxri adlara görə verilən aylıq təqaüdlər daxildir.
Üç milyon insanı əhatə edən beşinci sosial paket ümumilikdə əhalinin rifahının yaxşılaşdırılmasına xidmət edəcək.
Milli Məclisin deputatı Vüqar Bayramov "Azərbaycan" qəzetinə açıqlamasında bildirib ki, sosial müavinətlərin və təqaüdlərin artırılması Azərbaycanda 5-ci sosial paketin daha da dərinləşdiyindən xəbər verir. Bu sosial paket 3 milyon vətəndaşı əhatə edir. "Ümumilikdə bu istiqamətə 1.4 milyard manat əlavə vəsait ayrılıb, eyni zamanda dövlət büdcəsindən 2025-ci il üçün sosial istiqamətə ayrılan vəsaitin həcmi 16.9 milyard manatdır. Bu da ümumi büdcə xərclərinin 41 faizini təşkil edir. Cənab Prezident tərəfindən sosial müavinət və təqaüdlərin artırılması ilə bağlı fərmanın imzalanması dövlət siyasətinin əsas hədəfinin vətəndaşlarımızın sosial təminatının daha da yaxşılaşdırılması olduğunu bir daha təsdiq edir", - deyə deputat əlavə edib. Qeyd edib ki, bu gün Azərbaycanda həm sosial qayğıya ehtiyacı olan vətəndaşlarımızın, həm də sosial müavinət, təqaüd alanların təminatının yaxşılaşdırılması prioritet məsələlərdəndir. Son fərman da nəticə etibarilə əhalinin sosial rifahının yüksəldilməsinə xidmət edir. Bu baxımdan 5-ci sosial paket, həmçinin bu istiqamətə ayrılan vəsaitlər, artımlar bir daha göstərir ki, bu il də sosial müdafiə tədbirlərinin dərinləşməsi ili kimi yadda qalacaq.
V.Bayramov bildirib ki, bütövlükdə fiskal imkanlar çərçivəsində vətəndaşlarımızın sosial təminatının daha da yaxşılaşdırılması, rifahının gücləndirilməsi hər zaman sosial siyasətin əsas hədəflərindən hesab olunur: "Son fərman eyni zamanda minumum əməkhaqqı və minumum pensiyalarla bağlı Prezident İlham Əliyevin sərəncamları, dövlət qurumlarında çalışanların əməkhaqlarının artırılması istiqamətində imzalanan sənədlər 2025- ci ilin sosial tədbirlərin genişləndiyi il olduğunu bir daha təsdiq edir".
Əsmər QARDAŞXANOVA,
"Azərbaycan"
jpeg_1765975443.jpeg)
