- Bilmək istəyirəm, media orqanı hansı hallarda təkzib verməyə borcludur?
Kamran HƏSƏNOV,
Sumqayıt şəhəri
- Sualınıza cavab olaraq bildiririk ki, qaldırdığınız məsələ "Media haqqında" qanun, Mülki və İnzibati Xətalar məcəllələri ilə tənzimlənir. Belə ki, əgər mediada fiziki şəxsin şərəf və ləyaqətini, fiziki və hüquqi şəxsin işgüzar nüfuzunu ləkələyən, böhtan və təhqir xarakterli məlumatlar yayıldıqda, yaxud fikirlər təhrif olunduqda, həmin şəxs və ya nümayəndəsi media subyektindən həqiqətə uyğun olmayan məlumatın təkzib olunmasını tələb edə bilər və media subyekti bu tələbi yerinə yetirməyə borcludur. Bundan əlavə, cinayət işləri üzrə icraatın mahiyyəti və nəticələri barədə həqiqətə uyğun olmayan və ya təhrif edilmiş məlumatlar verildikdə, cinayət prosesini aparan orqan da təkzib tələb edə bilər və media subyekti bu tələbi icra etməlidir. Mülki Məcəlləyə əsasən, əgər fiziki şəxsin şərəfini, ləyaqətini və ya işgüzar nüfuzunu ləkələyən məlumatlar mediada yayılmışsa, həmin mediada təkzib edilməlidir. Təkzibin verilməməsi və ya qanunla müəyyən edilmiş qaydalara əməl edilməməsi inzibati məsuliyyət yaradır və media subyektləri cərimə (vəzifəli şəxslər üç yüz manatdan altı yüz manatadək məbləğdə, hüquqi şəxslər min manatdan min beş yüz manatadək məbləğdə) oluna bilər. Praktikada, təkzib tələbi daxil olduqda media orqanı bir ay müddətində bu tələbi yerinə yetirməlidir və təkzib, cavab və ya düzəliş üçün ödəniş tələb etmək qadağandır.
- Tanışlarımdan birinə iki ilə yaxındır ki, borc pul vermişəm, amma indiyə qədər qaytarmayıb. İstəyəndə də deyir ki, isbat elə ki, mənə pul vermisən. Kiminsə mənə olan borcunu necə sübut edə bilərəm?
Mehdi HƏŞİMOV,
Hacıqabul rayonu
- Qaldırdığınız məsələ ilə bağlı bildiririk ki, borcun mövcudluğunu sübut etmək üçün əsas vasitə yazılı borc müqaviləsi, borc sənədi və ya pulun verilməsi faktını təsdiqləyən digər sənədlərdir. Borcun qaytarılması və ya verilməsi nağdsız qaydada baş veribsə, bank çıxarışları və ya hesabdan çıxarışlar da sübut kimi istifadə oluna bilər. Əgər yazılı sənəd yoxdursa, məhkəmədə şahid ifadələri və digər sübutlar təqdim oluna bilər. Amma yazılı sübutlar üstün hesab olunur və məhkəmə əsasən bu cür sənədlərə istinad edir. Praktikada, borcun sübutu üçün ən etibarlı yol yazılı müqavilə və ya ödənişi təsdiq edən bank sənədləridir.
Sualları cavablandırdı:
Fərhad NƏCƏFOV,
Azərbaycan Respublikası Vəkillər Kollegiyasının üzvü
jpg_1782946307.jpg)
