- On il əvvəl birinə zamin olmuşdum. Həmin şəxs kreditlə maşın almışdı, amma ödəyə bilmədiyi üçün icra işi açıldı və üzərimə öhdəlik qoyuldu. İndiyə qədər bu məsələ bitməyib və yenə rayon icra şöbəsinə çağırılmışam. Getməsəm, məcburi gətirmə tədbiri görüləcəyi barədə bildiriş almışam. Bu icra işindən birdəfəlik necə qurtula bilərəm?
Süleyman MƏMMƏDOV,
Bakı şəhəri
- Sualınıza cavab olaraq bildiririk ki, mülki və icra haqqında qanunvericiliyin tələbinə əsasən, icra işindən birdəfəlik qurtulmaq üçün əsas yollar:
* borcun tam ödənilməsi,
* zaminlik müddətinin bitməsi və kreditorun iddia müddətini keçirməsi,
* yaxud icra sənədinin ləğvi üçün məhkəməyə müraciət etməkdir.
Zaminlik müqaviləsinin müddətini və şərtlərini dəqiqləşdirin, əgər müddət bitibsə və kreditor iddia irəli sürməyibsə, zaminliyə xitam verilməsi barədə məhkəməyə müraciət edə bilərsiniz. Əks halda, borc ödənilməyənədək icra tədbirləri, o cümlədən məcburi gətirmə və inzibati məsuliyyət tətbiq oluna bilər.
- Yetkinlik yaşına çatmayan şəxs hansı hallarda mülki müqavilə bağlaya bilər və bunun üçün hansı qanuni prosedurlar mövcuddur?
Nazilə VƏLİXANLI,
Qəbələ rayonu
- Azərbaycan Respublikasının Mülki Məcəlləsinə əsasən, yetkinlik yaşına çatmayan şəxs dedikdə bir qayda olaraq 18 yaşı tamam olmamış şəxslər başa düşülür və qanunvericilik belə şəxsləri bir neçə kateqoriyalara bölür:
* 14 yaşı tamam olmamış yetkinlik yaşına çatmayanlar (azyaşlılar):
* yalnız xırda məişət əqdləri,
* əvəzsiz fayda götürməyə yönəlmiş və notariat təsdiqi və ya dövlət qeydiyyatı tələb olunmayan əqdləri,
* habelə qanuni nümayəndənin verdiyi vəsaitlə bağlı əqdləri müstəqil bağlaya bilərlər.
Digər bütün əqdləri yalnız valideynləri, övladlığa götürənləri və ya qəyyumları onların adından bağlaya bilər və ya sonradan onların tərəfindən bəyənildikdə etibarlıdır.
* 14-18 yaş arası yetkinlik yaşına çatmayanlar:
* valideynlərinin, övladlığa götürənlərin və ya himayəçinin yazılı razılığı ilə müqavilə bağlaya bilərlər;
* yalnız öz qazancı, təqaüdü və digər gəlirləri,
* eləcə də xırda məişət əqdləri üzrə müstəqil sərəncam vermək hüquqları var.
Notariat qaydasında müqavilə bağlanarkən, yetkinlik yaşına çatmayanın yaşı və müqaviləni onun adından bağlayan şəxsin səlahiyyəti təsdiqlənməli, razılıq notarius tərəfindən qeydiyyata alınmalı və müqavilə imzalanmalıdır. Əks halda müqavilə etibarsız sayılacaqdır.
Sualları cavablandırdı:
Fərhad NƏCƏFOV,
Azərbaycan Respublikası Vəkillər Kollegiyasının üzvü
677jpg_1781134810.jpg)
