- Mən öz ərizəmlə işdən çıxmışam. Bu halda işsizlik müavinəti almaq hüququm varmı?
Sevinc QƏDİMOVA,
Qobustan rayonu
- Sualınıza cavab olaraq bildiririk ki, öz ərizəsi ilə işdən çıxan şəxsə işsizlikdən sığorta ödənişi verilməsi qanunla nəzərdə tutulmur.
İşsizlikdən sığorta ödənişi yalnız əmək münasibətlərinə "İşsizlikdən sığorta haqqında" Qanunun 13.1-ci maddəsində göstərilən aşağıdakı əsaslarla xitam verilmiş və "Məşğulluq haqqında" Azərbaycan Respublikası Qanununun 5-ci maddəsinə uyğun olaraq işsiz kimi qeydiyyata alınmış şəxslərə şamil edilir:
* dövlət orqanı və ya hüquqi şəxs ləğv edildikdə ("Dövlət qulluğu haqqında" Azərbaycan Respublikası Qanununun 33.1.2-ci maddəsinə və ya Azərbaycan Respublikasının Əmək Məcəlləsinin 70-ci maddəsinin a) bəndi);
* işçilərin və ya dövlət qulluqçularının sayı və ya ştatları ixtisar edildikdə ("Dövlət qulluğu haqqında" Azərbaycan Respublikası Qanununun 33.1.3-cü maddəsinə və ya Azərbaycan Respublikasının Əmək Məcəlləsinin 70-ci maddəsinin b) bəndi);
* əmək müqaviləsinin müddəti qurtardıqda (Azərbaycan Respublikasının Əmək Məcəlləsinin 68-ci maddəsinin 2-ci hissəsinin b) bəndinə, 73-cü maddəsinin 1-ci və ya 2-ci hissəsi);
* müəssisənin mülkiyyətçisi dəyişdikdə (Azərbaycan Respublikası Əmək Məcəlləsinin 68-ci maddəsinin 2-ci hissəsinin ç) bəndi);
* əvvəllər müvafiq işdə (vəzifədə) çalışan işçinin işinə (vəzifəsinə) bərpa edilməsi barədə məhkəmənin qanuni qüvvəyə minmiş qətnaməsi (qərarı) olduqda (Azərbaycan Respublikası Əmək Məcəlləsinin 74-cü maddəsinin 1-ci hissəsinin b) bəndi);
* əvvəllər həmin müəssisədə çalışan işçi müddətli həqiqi hərbi xidmətdən ehtiyata buraxıldıqdan sonra öz iş yerinə (vəzifəsinə) qayıtmaq hüququndan istifadə etdikdə (Azərbaycan Respublikası Əmək Məcəlləsinin 74-cü maddəsinin 1-ci hissəsinin ə) bəndi).
Öz ərizəsi ilə işdən çıxmaq bu əsaslara daxil deyil və belə şəxslər işsizlikdən sığorta ödənişi almaq hüququna malik deyillər.
- Fərdi yaşayış evimin qarşısında avtomobil saxlamaq üçün yer var. Qonşular daim orada maşınlarını saxlayır. Mən buna qadağa qoya bilərəmmi?
Səxavət CƏLİLOV,
Xırdalan şəhəri
- Azərbayan Respublikasının Mənzil və Mülki məcəllələrinin tələbinə görə, fərdi yaşayış evinin qarşısında yerləşən ərazi, əgər həmin torpaq sahəsi ev sahibinin xüsusi mülkiyyətindədirsə və dövlət qeydiyyatına alınmışsa, ev sahibi bu ərazidən istifadə qaydalarını özü müəyyən edə və başqalarının orada avtomobil saxlamasına qadağa qoya bilər. Lakin əgər sözügedən yer ümumi istifadədə olan yol, küçə və ya bələdiyyə mülkiyyətindədirsə, bu halda ev sahibi qonşuların avtomobil saxlamasına qadağa qoymaq hüququna malik deyil. Çünki yaşayış sahəsindən istifadə qonşuların hüquq və qanuni mənafelərinə müdaxilə etməməlidir və ümumi istifadədə olan yerlərdən istifadə qaydaları qanunvericiliklə tənzimlənir. Əgər qonşuların hərəkətləri ev sahibinin hüquqlarını və qanuni mənafelərini pozursa, ev sahibi əvvəlcə xəbərdarlıq etməli, pozuntu davam edərsə, məhkəməyə müraciət edə bilər. Praktikada, torpaq sahəsinin hüquqi statusu (xüsusi mülkiyyət və ya ümumi istifadə) əsas meyardır və bu, dövlət reyestrindən çıxarışla təsdiqlənməlidir.
Sualları cavablandırdı:
Fərhad NƏCƏFOV,
Azərbaycan Respublikası Vəkillər Kollegiyasının üzvü
jpg_1775472819.jpg)
