Hər il Yeni il ərəfəsində Bakının digər küçə və meydanları kimi, Fəvvarələr meydanı da öz libasını dəyişərək bizi nağıllar aləminə aparır. Artıq 11 ildir ki, bayram günlərində fəaliyyətinə başlayan "Soyuq əllər, isti ürək" xeyriyyə yarmarkası bu meydanın bəzəyinə çevrilir. Böyükdən kiçiyə hər kəsin səbirsizliklə gözlədiyi yarmarka paytaxt sakinlərinin və şəhərimizin qonaqlarının üzünə açıqdır.
"Soyuq əllər, isti ürək" yarmarkası yeni qurulmuş 64 böyük və 20 balaca ev, 3 ədəd ikimərtəbəli restoran, oyun zonası, fotozona, 4D kinoteatr, qorxu otağı, kiçik köşklər, müxtəlif tematik guşələr, labirint otağı, Santa evi və böyük Yeni il ağacından ibarətdir. Ərazidə quraşdırılmış iki böyük monitorda yarmarka haqqında ətraflı məlumat və xəritə nümayiş olunur. Qonaqlar məkandakı köşklərdən maraqlı Yeni il hədiyyələri, suvenirlər, kitablar, geyimlər ala, tematik və digər guşələrə baş çəkə, müxtəlif isti və ya soyuq içkilərdən içə, Qərbin və Şərqin unikal ləzzətli təamlarını kəşf edə, maraqlı oyunlar oynaya bilərlər.
"Soyuq əllər, isti ürək"də müasirliklə ənənəviliyin ahəngdar əvəzlənməsi könülləri oxşayır. Avropa modernizmi ilə Şərq üslubu harmoniya təşkil edir, insanlar yarmarkada gəzərkən qeyri-ixtiyari bayram əhvali-ruhiyyəsinə köklənir, yorğunluğunu, gündəlik qayğılarını unudurlar.
Yeni il sehrini kəşf etmək istəyənlər mütləq bu məkana baş çəkməlidirlər. Şam ağacının ətrafında qaçışan uşaqlar, Şaxta baba ilə rəsm çəkdirmək üçün növbə gözləyən balacalar, övladlarının sevincinə baxıb qürurlanan valideynlər, pavilyonların qarşısında əllərində isti içkilər söhbət edib gülüşən gənclər sanki sulu boya ilə çəkilən rəsm əsərinə bənzəyir. Bu mənzərəyə tamaşa etmək insanın üzündə xoş gülüş yaradır.
Havanın çox soyuq olmasına baxmayaraq, yarmarkaya maraq yüksək səviyyədədir. Köşklərin hər biri qonaq-qaralıdır, insanlar şəkillər çəkdirir, Yeni il ağacının ətrafına toplaşıb musiqilərin fonunda gəzişir və alış-veriş edirlər. Bir sözlə, burada insanların əylənməsi üçün, demək olar ki, hər cür şərait yaradılıb.
Bu ünvanda həm milli, həm xarici təamları dadmaq mümkündür. Maraqlısı isə odur ki, ətrafa yayılan yeməklərin qoxusu bir-birinə qarışsa da, heç kəsi narahat etmir, əksinə, evlərin qarşısında hər kəs iştahla növbə gözləyir. Növbədə dayananlar da əliboş deyil, kiminin əlində xırtıldayan kartof, kiminin əlində fərqli markalarda qəhvə fincanları var, kimlərsə də qovrulmuş şabalıd və südlü qarğıdalı yeyirdi.
Yarmarkada yerli sakinlərlə yanaşı, çoxsaylı turistə də rast gəlmək mümkündür. İş ilə əlaqədar ölkəmizdə qonaq olan amerikalı Rachel Harris deyir ki, hər il yaşadığı şəhərdə Yeni il yarmarkasını mütləq ziyarət edir: "Bütün ilboyu bu dövrü gözləyirəm. Uşaqlıqdan ən sevdiyim bayramdır. Bu il ziyarət edə bilməyəcəyim üçün çox üzülmüşdüm, ta ki təsadüfən burdan keçəndə yarmarkanı görənə qədər. Yarmarka yüksək səviyyədə, əsl bayram ab-havasında təşkil olunub. Milli təamlarınızı dadmaq üçün səbirsizlənirəm".
Yarmarkada gəzərkən ən böyük növbənin Santa evinin qarşısında olduğunu gördük. Uşaqların gözlərindən, üzlərindəki təbəssümdən Santa Klaus ilə şəkil çəkdirmək üçün necə səbir və həvəslə gözlədikləri hiss olunur. Nəvələri ilə yarmarkaya gələn Bəyim nənə deyir ki, bu növbədə gözləmək onun üçün ənənəvi hala çevrilib: "Nəvələrim neçə gündür yarmarkanın açılmasını gözləyirlər. Ona görə də elə açılışın ilk günü buradayıq. Hər il mütləq Santa Klaus ilə şəkil çəkdiririk. Belə bir izdiham gözləmirdim. Hava soyuq olduğu üçün deyirdim burada insan az olar".
Oyun zonasının yanından keçdikdə uşaqların həvəslə yarışdıqlarını müşahidə edirik. Övladlarının yanında dayanan valideynlərə yaxınlaşırıq. Oyunda ciddi mübarizə aparan Seymur və Turanın anası Şəlalə xanım gülərək deyir ki, uşaqlar ilboyu bu yarmarkanın açılmasını gözləyirlər: "Buradakı oyunlar da, yeməklər də onlara ayrı bir zövq verir. Nə evdə, nə də digər kafe və restoranlarda yemədikləri təamlar burada onlara çox dadlı və maraqlı görünür. Bayram ərəfəsində fürsət tapdıqca yenə gələcəyik".
Böyük şam ağacının yanından keçərkən bir əli ilə babasının əlindən tutub, digər əli ilə yolkanın oyuncaqlarına toxunan balaca qızcığazın səsini eşidirik: "Baba, baba, bura elə gözəldir ki, elə bil nağıllar aləmidir".
Doğrudur, bura nağıllar aləminə bənzəyir. Bu bənzərlik yalnız "Soyuq əllər, isti ürəy"in bəzənməsində, ab-havasında deyil, həm də nəcib missayasındadır. Belə ki, Yeni il yarmarkası nəinki Azərbaycanda, həm də regionda keçirilən ən böyük xeyriyyə layihələrindən biridir. 2013-cü ildən etibarən bu layihə Nərgiz Fondu tərəfindən həyata keçirilir. Hər il olduğu kimi, builki yarmarkada da toplanan vəsait müxtəlif xəstəliklərdən əziyyət çəkən uşaqların müalicə və əməliyyat xərclərinin qarşılanmasına sərf ediləcək. "Soyuq əllər, isti ürək" yarmarkası sayəsində ağır xəstəliklərlə mübarizə aparan uşaqlar sağlamlıqlarına qovuşurlar.
Bu il yarmarka yanvarın 15-dək davam edəcək. Burada iştirak etməklə hər birimiz həm əfsanəvi "Qış nağılı"nın parçası ola, həm də dəstəyimizə ehtiyacı olan uşaqlara əsl möcüzə bəxş edib, bu körpələrimizin əllərini də qəlbləri kimi isidə, onlara yeni nəfəs verə bilərik.
Ülkər XASPOLADOVA,
"Azərbaycan"
jpg_1793653540.jpg)
