Yaxın Şərq Sülh Sammitində iştirak ölkəmizin diplomatiyasının növbəti qələbəsidir
Nə qədər ki, qlobal geosiyasət var, bir o qədər də şəxsiyyətlərin tarixdəki rolu müzakirə olunacaq. Bu fenomenə baxışlar, əlbəttə ki, müxtəlifdir, amma bir fakt danılmazdır: istənilən dövləti irəliyə cəmiyyətdaxili birliyin möhkəmləndirilməsinə əsaslanan siyasi liderin müdrikliyi aparır. Biz hamımız bunun təsdiqini günahsız qanların tökülməkdə davam etdiyi, dağıntıların ardınca fəlakətlərin gəldiyi, insanların dəfələrlə evlərini tərk etməyə məcbur olduğu dünyada aydın görürük. Bununla yanaşı, hər zaman özünü ən firavan ölkələr kimi göstərən dövlətlər bu gün qaynayır və sabitsizliklə üzləşirlər. Bu problemlərə daha dərindən baxsaq, belə ölkələrdə müdrik siyasi yanaşmanın olmamasını aydın görə bilərik, çünki həmin dövlətlərin başçıları və ya hakimiyyət komandaları vəziyyətin nəinki yaxın bir neçə il, hətta yaxın gələcək üçün inkişaf perspektivlərini proqnozlaşdıra bilmirlər.
Milli Məclisin deputatı Kamran Bayramov qəzetimizə açıqlamasında bildirib ki, bu baxımdan Azərbaycan son illər ərzində Prezident İlham Əliyevin həyata keçirdiyi və dövlətin milli maraqlarının müdafiəsinə, beynəlxalq hüquq normalarının aliliyinə əsaslanan və üçüncü dövlətlərə xələl gətirmədən formalaşdırılan xarici siyasətə dönməz sadiqliyini inamla nümayiş etdirib: "Bu unikal təməl Ümummilli Lider Heydər Əliyev tərəfindən qoyulub və Prezident İlham Əliyev bu siyasəti zəmanəmizin sürətlə dəyişən tendensiyalarına uyğun inkişaf etdirir. Bu siyasətin kökündə isə Azərbaycanın milli maraqlarının qorunmasının sarsılmaz prinsipi dayanır. Azərbaycanın xarici siyasətinin və beynəlxalq fəaliyyətinin çoxtərəfliliyinin uğuru və müsbət təsirləri təkcə ölkə rəhbərinin mühüm beynəlxalq sammitlərdə iştirakı ilə deyil, həm də onun irəli sürdüyü ideyalar, o cümlədən Bakının sülh quruculuğu sahəsində öz təcrübəsini bölüşmək niyyəti ilə bir daha nümayiş etdirildi. Buna görə də ABŞ və Misir liderlərinin Prezident İlham Əliyevi bütün planetin izlədiyi Yaxın Şərq Sülh Sammitinə dəvət etmələri təəccüb doğurmamalıdır, Azərbaycanın uğurlu diplomatiyasının növbəti qələbəsi kimi qəbul edilməlidir".
Deputat qeyd edib ki, bu kontekstdə ölkə rəhbərinin cəmi 20 ölkənin iştirakı ilə keçirilən ən mühüm qlobal zirvə toplantısına iki prezidentdən dəvət alması, əlbəttə ki, əlamətdardır. Bu ilin avqustunda Donald Tramp İlham Əliyevi böyük lider kimi xarakterizə etdiyini və BMT Baş Assambleyasının 80-ci sessiyası ilə bağlı rəsmi qəbulda iki prezident arasında baş tutmuş dialoq zamanı Azərbaycan rəhbərini özünün dostu adlandırdığını və ictimaiyyət qarşısında "Sizinlə fəxr edirəm, siz çox gözəl insansınız" dediyini xatırlamaya bilmərik. Öz növbəsində 2024-cü ildə Azərbaycan-Misir danışıqlarından sonra Əbdülfəttah əs-Sisi heyrətamiz Şərq üslubunda müxtəlif sahələrdə ikitərəfli münasibətlərin möhkəmləndiyini və bu məqsədə doğru yeni yolun açıldığını qeyd etdi. O həmçinin vurğuladı ki, Bakı və Qahirə qarşılıqlı maraq doğuran regional və beynəlxalq məsələlərə diqqət yetirir. İlham Əliyev isə bu mövzunu genişləndirərək beynəlxalq məsələlərdə fikir ayrılığının olmadığını bildirdi. Qəzzadakı faciəyə tezliklə son qoyulmasının vacibliyini vurğulayan və Qahirənin bu səylərə dəstəyini etiraf edən Azərbaycan Prezidenti Misirin təşəbbüslərinin nəzərə alınmasının vacibliyini qeyd etdi.
K.Bayramov xatırladıb ki, bu ilin yanvarında Prezident İlham Əliyev Bakının İsrail-Fələstin məsələsində dəyişməz mövqeyini bir daha bəyan edərək Azərbaycanın "iki dövlət" prinsipini dəstəklədiyini bildirib: "Dövlət başçısı qeyd edib ki, müstəqil Fələstin dövlətinin yaradılması bu münaqişəyə son qoyacaq. İyun ayında Fələstinin yeni təyin olunmuş fövqəladə və səlahiyyətli səfiri Əhməd Metaninin etimadnaməsini qəbul edən İlham Əliyev xalqlarımız arasındakı əlaqələri dövlətlərarası münasibətlərdə mühüm amil kimi qeyd edərək, Azərbaycanın Fələstin xalqının haqlı tələbini, İsrail-Fələstin münaqişəsinin "iki dövlət prinsipi" və BMT-nin müvafiq qərarları əsasında həllini dəstəklədiyini bildirib".
Azərbaycanın qlobal islam birliyi ilə əlaqələrin inkişafına həmişə xüsusi önəm verdiyini vurğulayan K.Bayramov deyib ki, hələ 2023-cü ildə "Euronews" telekanalına müsahibəsində Prezident İlham Əliyev Bakının müsəlman ölkələri ilə münasibətlərini həmrəylik və tərəfdaşlıq nümunəsi adlandıraraq ölkəmizin İslam Əməkdaşlıq Təşkilatının (İƏT) ən fəal üzvlərindən biri hesab edildiyini vurğulamışdı. Elə həmin il o, ölkəmizin İƏT çərçivəsində bütün sahələrdə əməkdaşlığın inkişafına dəstək verdiyini açıqladı. Bu xüsusda vurğulanmalıdır ki, Azərbaycan-Misir danışıqlarından sonra Prezident İlham Əliyev BMT Təhlükəsizlik Şurasının genişləndirilməsi məsələsini gündəmə gətirərək İƏT üzvü də daxil olmaqla, bir daimi yerin ayrılmasının zəruri olduğunu qeyd edib. Bundan başqa, dövlət başçısı bildirib ki, namizədin irəli sürülməsi məsləhətləşmələr əsasında birbaşa İƏT tərəfindən həyata keçirilməlidir. Onun sözlərinə görə, bu cür islahatlar daha ədalətli və təhlükəsiz dünyanın yaradılmasına töhfə verəcək. Azərbaycan Prezidenti bu fikri dəfələrlə dilə gətirib.
Deputat qeyd edib ki, bu kontekstdə Bakının vasitəçilik səyləri üçün platforma kimi tez-tez istifadə edilməsini qeyd etmək vacibdir: "Konkret olaraq, Azərbaycan Suriya və İsrail rəsmiləri arasında danışıqlara vasitəçilik edib, məqsəd iki ölkə arasında münasibətlərin normallaşmasına kömək etmək və proqnozlaşdırıla bilən şərait yaratmaq olub. Türkiyə ilə İsrail arasındakı gərginlik kontekstində Prezident İlham Əliyev vurğulayıb ki, əgər Bakıdan vəziyyətin sabitləşməsinə müdaxilə etmək istənilirsə, biz bunu edəcəyik. Əks halda biz ümumi dil tapmağa kömək etmək üçün bir sıra diplomatik səylər göstərməyə çalışacağıq. Bu məqamda xüsusi qeyd edilməlidir ki, islam dünyası ilə qarşılıqlı anlaşmanın xüsusi formatı Azərbaycan və İsrail arasında münasibətlərə əngəl törətmir ki, bu da ölkəmizin çoxşaxəli xarici siyasətinin unikal cəhətlərindən biridir. İsrail Prezidenti İsxak Hersoq ölkəsinin Azərbaycanla strateji tərəfdaşlığa verdiyi yüksək qiyməti, "həm İsrail, həm də regionumuz üçün sabitlik çırağı" olduğunu vurğuladı. Hersoqun sözlərinə görə, İlham Əliyev regionda sülhə nail olmaq üçün səyləri prioritetləşdirdi və bu, Azərbaycanı dialoq və diplomatiya üçün mühüm platformaya çevirdi. Prezident İlham Əliyev öz növbəsində Azərbaycan ilə İsrail arasında dostluq və əməkdaşlıq münasibətlərinin yüksək səviyyəsini xalqlarımız arasında möhkəm qarşılıqlı etimad və dəstəyə əsaslanan tarixi əlaqələrin və qarşılıqlı hörmətin parlaq ifadəsi kimi dəyərləndirdi".
K.Bayramov bildirib ki, göstərilən məqamlar Azərbaycanın xarici siyasətinin çoxşaxəliliyini əyani şəkildə nümayiş etdirir ki, bu da Prezident İlham Əliyevin fikrincə, ölkəmizə hadisələrin mərkəzində olmağa imkan verir. Ona görə də ABŞ və Misir prezidentlərinin Sülh Sammitində iştirak etmək üçün Azərbaycan rəhbərini dəvətləri tamamilə təbiidir. Bu, Prezidentin diqqətlə düşünülmüş addımlarının Azərbaycanın imicini qlobal miqyasda necə gücləndirdiyini, ölkəmizin yeni geosiyasi səviyyəyə yüksəlməsinə kömək etdiyini təsdiqləyir.
Əsmər QARDAŞXANOVA,
"Azərbaycan"
