Azərbaycan qlobal enerji liderlərinin bir araya gəldiyi "Bakı Enerji Həftəsi"nə" növbəti dəfə evsahibliyi etdi. Həm regional, həm də beynəlxalq səviyyədə etibarlı enerji platforması kimi formalaşan "Bakı Enerji Həftəsi" özündə 31-ci Beynəlxalq Xəzər Neft və Qaz Sərgisi, 14-cü Xəzər Beynəlxalq Energetika və "Yaşıl Enerji" Sərgisi və 31-ci "Baku Energy Forum"nu birləşdirir. Builki enerji həftəsində 46 ölkədən 270-dən çox şirkət iştirak etdi. Bu, sözün əsl mənasında, böyük bir göstəricidir.
Milli Məclisin deputatı Müşfiq CƏFƏROV qəzetimizə açıqlamasında deyib ki, bu beynəlxalq platforma Azərbaycanın enerji sahəsində əldə etdiyi uğurları nümayiş etdirməklə yanaşı, yeni çağırışlara uyğun təşəbbüslərin, texnologiyaların və əməkdaşlıqların müzakirə olunduğu mühüm bir mərkəzdir: "Azərbaycanın müasir enerji siyasətinin təməli 1994-cü ildə Ulu Öndər Heydər Əliyevin rəhbərliyi ilə imzalanmış "Əsrin müqaviləsi" əsasında qoyulub. Bu müqavilə yalnız bir neft sənaye layihəsi deyil, həm də ölkənin beynəlxalq enerji bazarına inteqrasiyasının başlanğıcı idi. Bu hadisə Azərbaycanın iqtisadi müstəqilliyini və siyasi suverenliyini gücləndirməyə xidmət etdi".
Deputat qeyd edib ki, Prezident İlham Əliyevin bu tədbirin açılış mərasimində çıxışı zamanı səsləndirdiyi fikirlər Azərbaycanın enerji sahəsindəki gələcək prioritetlərini də aydın şəkildə göstərir. Dövlət başçısının vurğuladığı kimi, Azərbaycan enerji siyasətini təkcə neft və qaz hasilatı ilə məhdudlaşmır, həm də "yaşıl enerji" keçidi, təchizatın şaxələndirilməsi və dayanıqlı infrastrukturun qurulması kimi vacib layihələrin icrasını da həyata keçirir. Azərbaycanın uzun illər uğurla həyata keçirdiyi enerji layihələri onun regionda sabitliyin təminatçısına çevrilməsini təmin edib.
M.Cəfərov bildirib ki, "Bakı Enerji Həftəsi" Azərbaycanın yalnız enerji siyasətini deyil, həm də qlobal əməkdaşlıq mədəniyyətini, dayanıqlı inkişaf prinsipini, iqtisadi suverenliyini və müasir dövlətçiliyini nümayiş etdirir: "Bu tədbir Azərbaycanın enerji strategiyasının nümayiş platformasıdır. Layihə çərçivəsində təşkil olunan tədbirlər həm keçmişin uğurlarını xatırladır, həm bu günün reallıqlarını təqdim edir, həm də gələcəyi aydın şəkildə göstərir.
Deputat vurğulayıb ki, Prezident İlham Əliyevin "Bakı Enerji Həftəsi"ndəki çıxışı Azərbaycanın qlobal enerji siyasətinin ənənəvi enerji ehtiyatlarından "yaşıl enerji"yə keçid strategiyasını və artan regional liderlik rolunu təsdiqləməklə yanaşı, ölkəmizlə ABŞ arasındakı strateji münasibətlərin inkişafının da təsdiqi oldu.
Əsmər QARDAŞXANOVA,
"Azərbaycan"
677jpg_1781134810.jpg)
jpg_1781266648.jpg)
jpg_1781269651.jpg)
