Avropa İttifaqının ali nümayəndəsi Kaya
Kallasın Azərbaycana səfəri Bakı ilə Brüssel arasında münasibətlərin davamlı və
etimadlı əsaslar üzərində inkişaf etdiyini bir daha nümayiş etdirdi. Bu səfər tərəflər
arasında strateji tərəfdaşlığın dərinləşməsinin göstəricisidir.
Son illər ərzində Avropa İttifaqı ilə Azərbaycan
arasında əməkdaşlıq çoxşaxəli xarakter alıb. Hər nə qədər Avropa Parlamenti
daxilində bəzi siyasi qruplar münasibətlərə qərəzli yanaşmalar sərgiləsələr də,
Aİ-nin icraedici strukturu – xüsusilə Avropa Komissiyası ilə Bakı arasında
konstruktiv və davamlı əməkdaşlıq xətti qorunub saxlanılır. Bu isə tərəflərin
uzunmüddətli maraqlarının üst-üstə düşdüyünü göstərir.
Prezident İlham Əliyevlə görüşdə də bu mövqe
açıq şəkildə bəyan olundu. Bundan əvvəlki görüşlərdə əldə olunmuş razılaşmalar
və imzalanmış sənədlər Azərbaycan–Aİ münasibətlərinin artıq strateji mərhələyə
qədəm qoyduğunu təsdiqləyir. Bu kontekstdə siyasi dialoq, enerji təhlükəsizliyi
və nəqliyyat kimi sahələrdə formalaşdırılmış enerji, nəqliyyat və təhlükəsizlik
dialoqu kimi üç əsas mexanizm əməkdaşlığın institusional əsasını təşkil edir.
Məlum olduğu kimi, enerji sahəsində Azərbaycan
Avropa üçün etibarlı tərəfdaş kimi mövqeyini gücləndirib. Bu gün Azərbaycan
qazının 10-dan çox Avropa ölkəsinə ixracı, o cümlədən Almaniya və Avstriyanın
timsalında yeni bazarların bu əməkdaşlığa qoşulması enerji təhlükəsizliyi
baxımından mühüm əhəmiyyət kəsb edir. Aİ rəsmilərinin, o cümlədən K. Kallasın
Azərbaycanı vacib enerji tərəfdaşı kimi qiymətləndirməsi də bu reallığın təsdiqidir.
Digər tərəfdən, nəqliyyat və regional
bağlantılar sahəsində Azərbaycanın oynadığı rol getdikcə artır. Xəzər və Qara dəniz
hövzələrini birləşdirən layihələr, o cümlədən TRİPP təşəbbüsü Aİ tərəfindən dəstəklənir
və regionun iqtisadi əhəmiyyətini artırır.
Regionda sülh və sabitlik gündəliyinin təşviqi
də Azərbaycanın prioritet istiqamətlərindəndir. Xüsusilə cənab Prezidentin
Avropa Siyasi Birliyinin 8-ci sammiti çərçivəsində etdiyi çıxış bu baxımdan
mühüm əhəmiyyət daşıyır və beynəlxalq səviyyədə diqqətlə qarşılanır. Azərbaycanın
təşəbbüsləri regionda iqtisadi əməkdaşlığın genişlənməsinə və
kommunikasiyaların açılmasına zəmin yaradır.
Azərbaycan və Ermənistan arasında iqtisadi əlaqələrin
tədricən inkişafı da regionda sabitliyin möhkəmlənməsinə xidmət edir. Enerji
sahəsində Azərbaycanın oynadığı rol təkcə Avropa üçün deyil, region ölkələri
üçün də strateji əhəmiyyət kəsb edir.
Nigar Məmmədova,
Milli Məclisin deputatı
