“Avropa Parlamenti növbəti dəfə ölkəmizə qarşı qərəzli, saxta qətnamə qəbul etdi. Ümumiyyətlə, Avropa Parlamentinin qəbul etdiyi bu qətnamənin heç bir əhəmiyyəti yoxdur və beynəlxalq hüquqa zidd bir sənəddir. Azərbaycanın bu qurum qarşısında heç bir öhdəliyi yoxdur və Avropa İttifaqının Parlamentinin İttifaqa üzv olmayan dövlət haqqında qətnamə çıxarmaq mandatı da yoxdur”.
Bu fikirləri qəzetimizə açıqlamasında Bakı Dövlət Universitetinin kafedra müdiri, professor Kamilə Əliyeva deyib. O bildirib ki, bu qətnamənin qəbul edilməsində fəal iştirak edən qüvvələr hər kəsə, hətta bu quruma rəhbərlik edən şəxslərə də məlumdur. Avropa Parlamenti uzun illərdir dünyadakı erməni təşkilatlarının lobbisinin əlində oyuncaq olub, korrupsiyalaşmış bir təşkilata çevrilib. Bir neçə il bundan əvvəl AP-nin rəhbər şəxsinin və deputatlarının rüsvətxorluqda ittiham edilərək həbs olunması təşkilatın əsl simasını üzə çıxardı.
Ekspert xatırladıb ki, 2020-ci ildən Avropa Parlamentinin Azərbaycana qarşı 10-dan çox bu cür qərəzli qətnamələr qəbul edib: “Avropalı parlamentarilər xalqımıza qarşı dəhşətli cinayətlər törətdiklərinə, Azərbaycan ərazisində separatizm və terrorçuluqla məşğul olduqlarına görə məhkum olunan şəxsləri "müharibə əsiri", "siyasi məhbus" kimi təqdim edirlər. Qətnamədə Qarabağdan ermənilərin guya zorla qovulması və ermənilərə məxsus dini abidələrin dağıdılması ilə bağlı səsləndirilən fikirlər siyasi avantüranın bariz nümunəsidir. Əslində 30 il torpaqlarımızı işğalda saxlayan ermənilər əsl barbarlıq etmişdilər. Şəhər və kəndlərimizi viran qoymuş, məscidlərimizi dağıdaraq tövləyə çevirmişdilər. Buraya səfər edən avropalı diplomatlar, siyasətçilər, jurnalistlər bütün bunları öz gözləri ilə görürdülər. Nədənsə nə AP, nə də AŞPA bu hərəkətləri qınayan bir qətnamə belə qəbul etmədilər”.
K.Əliyeva bu gün Azərbaycan dövlətinin işğaldan azad edilmiş ərazilərimizi yenidən qurduğunu, dağıdılmış bütün dini tarixi abidələrin bərpa olunduğunu qeyd edərək əlavə edib ki, AP isə bütün bunları görməzliyə vurur. Səbəbi məlumdur, onlar regionda sülhün, sabitliyin yaranması ilə barışmaq istəmirlər. Prezident İlham Əliyev çıxışlarında da bildirmişdi ki, Azərbaycanın öz torpaqlarını işğaldan azad etməsi, ərazisində separatizmin kökünü kəsməsini bir sıra qüvvələr qəbul edə bilməyəcək və bizə qarşı təzyiqlər davam edəcək.
Prezident İlham Əliyevin iradəsi və qətiyyəti sayəsində Cənubi Qafqazda sülh və sabitliyin təməli qoyulduğunu vurğulayan ekspert deyib ki, məhz bu reallığa söykənən tarixi Vaşinqton razılaşması nəticəsində Azərbaycanla Ermənistan böyük sülh sazişinə olduqca yaxındır: “Dünyada İlham Əliyevin bu təşəbbüsünün beynəlxalq səviyyədə dəstəklənməsi anti-Azərbaycan qüvvələrini bərk narahat edir. Azərbaycana qarşı yönəlmiş istənilən təzyiq kampaniyasına dövlətimiz tərəfindən siyasi, diplomatik və parlament səviyyəsində layiqli cavab verilir”.
Əsmər QARDAŞXANOVA,
“Azərbaycan”
