Avropa İttifaqının ölkəmizə qarşı qərəzli mövqe tutması təzə xəbər deyil. Xeyli müddətdir ki, işğalçı Ermənistanı dəstəkləyən bu qurum anti-Azərbaycan təbliğatı ilə məşğul olan təşkilata çevrilib. Bu günə qədər ölkəmizin əleyhinə heç bir hüquqi əsası olmayan çoxsayda qətnamələr qəbul edib. 

Bu qətnamələrin ermənipərəst qüvvələrin təkidi ilə qəbul olunduğu da sirr deyil. Həmin kağız parçalarının qəbuluna səs verənlər Avropa Parlamentinə seçkilər zamanı erməni lobbisindən maliyyə və seçici dəstəyi alan şəxslərdir. Bu, bir daha göstərir ki, Avropa İttifaqının, bütövlükdə Qərb ölkələrinin Azərbaycana qarşı atdığı addımların arxasında yalnız şəxsi və maddi maraqlar dayanır. 

Avropa Parlamentində Azərbaycan əleyhinə qətnamələrin qəbul edilməsində yalnız bir qrup parlamentari xüsusi fəallıq göstərir. Onlar əsasən Fransanı təmsil edən deputatlardır. Bu addımları erməni lobbisini razı salmaq üçün atırlar.

Azərbaycan 2020-ci ildə 44 günlük Vətən müharibəsində qazandığı qələbəsi ilə yalnız işğalçı Ermənistanı məğlub etmədi. Ölkəmiz İkinci Qarabağ müharibəsində qazandığı zəfəri, qələbəsi ilə uzun illər rəsmi İrəvana müxtəlif formalarda dəstək verən ölkələrə və bəzi beynəlxalq təşkilatlara da sarsıdıcı zərbə vurdu. Odur ki, bu qüvvələr Azərbaycana qarşı hücuma keçiblər.

İkinci Qarabağ müharibəsi qələbəmizlə başa çatandan sonra Avropa İttifaqı müşahidəçilik missiyası məsələsini ortaya atdı. Rəsmi Bakı isə dəfələrlə bildirdi ki, Avropa İttifaqının mülki müşahidə  missiyasının Ermənistan tərəfdən Azərbaycan sərhədi yaxınlığında fəaliyyətinə ehtiyac yoxdur. Amma buna baxmayaraq, Avropa İttifaqı missiyasını daha da genişləndirdi. Bütün bunlar isə regionda vəziyyəti daha da gərginləşdirdi.

Son günlər Avropa İttifaqının Ermənistanın Azərbaycanla sərhədində yerləşdirilən "müşahidə missiyası" Zəngilan istiqamətində fəaliyyətini aktivləşdirib. Yayılan görüntülərdən də müşahidə olunur ki, Ermənistanla Azərbaycan arasındakı şərti sərhəddə yerləşdirilən Aİ-yə məxsus maşın karvanı sərhədə doğru irəliləyir. Xatırladaq ki, "missiya"nın təxribat xarakterli fəaliyyətləri ilə bağlı Azərbaycan tərəfi dəfələrlə öz narazılığını bildirib və bildirməkdə davam edir. Çünki "müşahidə missiyanın" gərginlik yaratmaqdan başqa heç bir işi yoxdur.

Bütün baş verən hadisələrdən, Azərbaycana qarşı qərəzli mövqedən aydın olur ki, regionda gedən sülh prosesləri Qərbin müəyyən strukturlarının ürəyincə deyil. Buna görə də bütün vasitələrlə gərginliyə səbəb ola biləcək addımlar atılır. Sirr deyil ki, Qərbin gizlin və açıq Ermənistan planında Moskvanın bölgədən sıxışdırılıb çıxarılması prioritetdir. Bundan başqa, hər vəchlə Ermənistanın Kollektiv Təhlükəsizlik Müqaviləsi Təşkilatından çıxarılmasına cəhd edilir. Amma görünən odur ki, bu istiqamətdə atılan addımlar çox uğursuzdur. Çünki Ermənistan hələ də KTMT-də qalmaqdadır. 

Azərbaycan Prezidenti İlham Əliyev yanvar ayının 7-də yerli televiziya kanallarına verdiyi müsahibəsində Avropa İttifaqının, Qərb ölkələrinin ölkəmizə qarşı qərəzli mövqe tutmağından, Ermənistanı silahlandırmağından bəhs edərək demişdir: "Mən onu da bildirmişdim ki, Ermənistan silahlanma yarışında bizimlə rəqabət apara bilməz. Ancaq biz burada bir məsələni də nəzərə almalıyıq. Ermənistana bu silahlar ya pulsuz verilir, ya da ki, kredit şəklində. O kreditlər də müəyyən dövrdən sonra silinir. Eyni zamanda Avropa İttifaqının dırnaqarası sülh fondundan. Dırnaqarası, çünki sülh fondu, əslində, sülh məqsədləri üçün istifadə olunmalıdır. Onların sülh fondu isə silahlanmaya istiqamətləndirilir. Oradan da birinci ödəmə edildi və bizdə olan məlumata görə, bu, son ödəmə deyil".

Dövlətimizin başçısı müsahibəsi zamanı aparılan sülh danışıqlarına toxunaraq demişdir ki, biz dörd ildən çoxdur ki, səbir göstəririk. Dörd ildən çoxdur istəyirik ki, bu, danışıqlar yolu ilə həll olunsun. Biz nə qədər gözləməli olacağıq və nə üçün gözləməliyik? Yəni onlar bütün bunları nəzərə almalıdırlar. Mən bir dəfə demişəm, onlar gərək bizi əsəbləşdirməsinlər və başa düşsünlər ki, burada söz sahibi bizik və Cənubi Qafqazda Azərbaycan aparıcı iqtisadiyyatdır, aparıcı hərbi gücdür və aparıcı dövlətdir. Bugünkü dünyada güc amili ön plandadır və bunu heç kim unutmasın.

Hadisələrin gedişi göstərir ki, Ermənistan regionda sülh istəmir. Avropa İttifaqının Ermənistandakı "müşahidə missiyası" sülhə, əmin-amanlığa xidmət etmir. Nəhayət, rəsmi İrəvan Avropa İttifaqının müşahidə missiyasının ölkədən çıxarılmasına qərar verməlidir. Əks halda bundan uduzan yenə Ermənistan olacaq. 

Vahid MƏHƏRRƏMOV,

"Azərbaycan"