Dövlət başçısı İlham Əliyevin fərmanı ilə 2012-ci ildə yaradılan "ASAN xidmət" bu gün ölkəmizdə hər kəsin daha çox üz tutduğu quruma çevrilib. Üstünlükləri çoxdur. "ASAN xidmət"lərdə vətəndaşlar çoxsaylı dövlət xidmətlərindən daha əlçatan və şəffaf şəkildə istifadə edir, heç bir bürokrat məmurla üz-üzə gəlmir, təmasda olmurlar.
Əməkdaşlar da, əsasən, işlərinə məsuliyyətlə yanaşırlar. Könüllülər isə ünsiyyət zamanı çox mehriban və səmimidirlər. Gənclərimizin formalaşmasında, mədəniyyət və etik qaydaları mənimsəməklərində "ASAN könüllü"lük hər bir gənc üçün böyük təcrübə məktəbidir.
Mən də bir vətəndaş olaraq "ASAN xidmət"dən vaxtaşırı yararlanıram. Buradakı xidmətlərdən, əsasən, razıyam. Lakin istisna hallar da olur. Məsələn, elə xidmətlər var ki, çox vaxt itirirsən. Hər hansı problemin həlli, arayışın verilməsi də bəzən günlərlə, həftələrlə uzanır. Adi doğum haqqında itmiş şəhadətnamənin yeni nüsxəsini almaq üçün günlərlə gözləmək lazım gəlir. Yaxud ödəniş məsələsi. Açığını deyək ki, rüsumlar bahadır, aztəminatlı vətəndaşın büdcəsinə uyğun gəlmir. Halbuki bu və ya digər arayışı ucuz, yaxud ödənişsiz vermək mümkündür. Nəzərə alsaq ki, "ASAN xidmət"də dövlət qurumları fəaliyyət göstərir və həmin dövlət qurumları da dövlət büdcəsindən, yəni biz vətəndaşların ödədiyi vergilərdən maliyyələşir, onda hər hansı arayışın, yaxud sənədin verilməsinə rüsum, özü də yüksək rüsum almaq nə dərəcədə doğrudur?
Bütün bunlara rəğmən, müasir qurum olaraq dövlət-vətəndaş əlaqələrinin sadələşdirilməsi baxımından asan və əlçatanlığına görə "ASAN xidmət" artıq bir Azərbaycan brendidir. Arzu edirəm ki, ASAN öz işini çətinə salmasın, imicini qorusun, vətəndaşların narazılıqlarını, şikayətlərini nəzərə alsın.
İlhamə MƏHƏMMƏDQIZI,
Sumqayıt şəhər sakini
