Əsgərin salamı başqa cür olur. O salamın içində bir ananın gecələr yol çəkən gözləri, bir atanın susaraq gizlətdiyi qüruru, bir uşağın atasına həsrət qalan baxışları var.
Mən də bir əsgər kimi "Salam, Vətən!" deyəndə, əslində, təkcə bir torpağa yox, xalqıma, doğma evimə, elimə, obama, doğulduğum Sumqayıtıma, uşaqlıq xatirələrimə salam göndərirəm. Vətən sözünün çəkisi, ağırlığı mənimçün hər şey deməkdir. Bilirəm ki, həmin hiss torpağın ağırlığından deyil, mənim ürəyimdən gəlir.
"Vətənə xidmət edirəm!" - bu, pafos deyil. Bu, mənim Vətən qarşısında məsuliyyətimi dərk etdiyimi bildirən anddır. Bu söz dilimdən səslənəndə isə həmin cümlənin arxasında xalqımın təhlükəsizliyi, ailəmin rahatlığı, mənim sabahım dayanır.
Vətənə xidmət təkcə sərhəddə keşik çəkmək deyil. Müəllimlərimizin öyrətdiyi hər doğru söz, həkimlərimizin xilas etdiyi hər həyat, zəhmətkeş insanların halal əməyi, ziyalılarımızın qoruduğu milli yaddaş da vətənə xidmətdir. Çünki vətən yalnız xəritədəki sərhəd yox, bizim dilimiz, tariximiz, yaddaşımız, ata-baba ocağımız və gələcək nəsillərə ötürəcəyimiz əmanətdir. Bu əmanəti qorumaq hər birimizin borcudur.
Mən 9 aydır Beyləqandakı "N" saylı hərbi hissədə qulluq edirəm. Çalışıram ki, komandirlərimin tapşırıqlarını yerinə yetirim, nümunəvi əsgər kimi vətən qarşısında borcumu ləyaqətlə verim. Burada çoxlu dost qazanmışam. Hamımız yaxşı dərk edirik ki, vətənə xidmət etmək - özündən böyük bir dəyərin qarşısında məsuliyyət daşımaqdır. Çalışacağam ki, həm hərbi xidmət zamanı, həm də sonradan bizə əmanət qalan vətəni qoruyaq, torpağa, yurda daha çox bağlı olaq.
Həsən HƏSƏNLİ,
Beyləqan rayonundakı "N" saylı hərbi hissənin sıravi əsgəri
jpg_1793052405.jpg)
