Hava və su da daxil olmaqla təbii sərvətlərdən yüz illərdən bəri kortəbii istifadə olunması nəticəsində ətraf mühit korlanmağa doğru dəyişikliyə məruz qalmış, elmi-texniki tərəqqi dövründə isə bu cür dəyişiklik daha da kəskinləşmişdir. 

Energetika, sənaye, kənd təsərrüfatı, nəqliyyat sahələrində yeni texnologiyalarn tətbiqi və istehsalının genişlənməsi, landşaftların antropogen dəyişməsi, beynəlxalq təsərrüfat əlaqələrinin mürəkkəbləşməsi və genişlənməsi ekoloji mühitin və  ətraf mühitin tarazlığının pozulmasına səbəb olmuşdur. 

Ekoloji mühitin pozulması, meşələrin, çəmənlərin, kənd təsərrüfatına yararlı torpaqların azalması, Kür, Araz və digər çayların, Xəzərin, torpağın, havanın çirklənməsi, zooloji və bioloji müxtəlifliyin pozulması və s. məhz iqlim dəyişmələrinin izləridir. İzlər təkcə bunlar deyil ki?! İqlim dəyişmələri həm regional, həm də qlobal səviyyədə insanların qida təhlükəsizliyini və suya çıxışını məhdudlaşdırır, aclıq, yoxsulluq və digər ağır sosial-iqtisadi nəticələrə, miqrasiyanın güclənməsinə səbəb olur, yoluxucu  və xroniki xəstəlikləri artırır. Elmi araşdırmalar göstərir ki, kənd təsərrüfatı, su resursları, sahilyanı zonalar, meşə, turizm və səhiyyə sektoru iqlim dəyişikliyinə çox həssasdır. Və bu sadalananlar ekologiya sahəsində  beynəlxalq səviyyədə təxirəsalınmaz tədbirlərin görülməsini tələb edir. 

BMT-nin İqlim Dəyişmələri üzrə Çərçivə Konvensiyasının Tərəflər Konfransının sessiyaları bu yöndə keçirilən tədbirlərin ən alisidir. Azərbaycanda da illərdir ətraf mühitin tarazlığını qorumaq istiqamətində analoji tədbirlər keçirilir. Onlardan biri də  COP29-un keçirildiyi günlərdə fəaliyyətə başlayan MAMA (Mother Nature) "Ana təbiət" beynəlxalq incəsənət sərgisidir. MAMA "Ana təbiət" beynəlxalq incəsənət layihəsinin ideya müəllifi Heydər Əliyev Fondunun vitse-prezidenti, IDEA (Ətraf Mühitin Mühafizəsi Naminə Beynəlxalq Dialoq) İctimai Birliyinin sədri Leyla Əliyevadır. Layihə debütünü 2024-cü il noyabrın 15-də etmişdi. Ətraf mühitin mühafizəsi mövzusunda Heydər Əliyev Mərkəzində  açılan "Öz töhfəni ver!" sərgisi  Birləşmiş Millətlər Təşkilatının Cenevrədəki ofisinin baş direktoru Tatyana Valovaya və IDEA İctimai Birliyinin rəhbəri Leyla Əliyevanın birgə təşəbbüsü ilə Heydər Əliyev Mərkəzi və İsveçrə Qadın və Gücləndirmə Assosiasiyası (Association of Swiss Women & Empowerment) tərəfindən təşkil olunmuşdu. 

Bir müddət əvvəl MAMA "Ana təbiət" iqlim dəyişmələri ilə mübarizə üzrə mesajlarını dünyaya vermək üçün "səyahət"ə başlayıb və ilk "dayanacaq" Bəhreyn Krallığı olub. Bəhreynin məşhur İncəsənət Mərkəzində MAMA "Ana təbiət" beynəlxalq incəsənət sərgisinin təqdimatı keçirilib. Leyla və Arzu Əliyevaların iştirakı, Heydər Əliyev Mərkəzi, IDEA İctimai Birliyi, Bəhreynin RAK İncəsənət Fondu və Bəhreyn Mədəniyyət və Qədim Əsərlər İdarəsinin birgə təşkil etdiyi bu sərginin məqsədi ictimaiyyətin diqqətini ətraf mühitin qorunmasının vacibliyinə bir daha yönəltməkdir.

Leyla Əliyeva  tədbirdə planetimizdə iqlim dəyişikliyi nəticəsində meydana gələn problemlərdən danışaraq MAMA "Ana təbiət" incəsənət layihəsi vasitəsilə mövcud problemlərin həllinə kreativ üslubda yanaşıldığını diqqətə çatdırıb.  Bildirib ki, qlobal istiləşmə dövründə dayanıqlıq çağırışı heç vaxt bu qədər zəruri olmamışdı. O, gələcək nəsillər naminə planetimizi qorumaq istiqamətində səylərin birləşdirilməsinin vacibliyini vurğulayıb. 

MAMA "Ana təbiət" beynəlxalq incəsənət sərgisi Bəhreyn İncəsənət Mərkəzində martın 25-dək davam edəcək. Bu müddətdə ziyarətçilər üzləşdiyimiz ətraf mühit problemləri ilə bağlı müxtəlif və vacib hekayələri özündə əks etdirən rəssamlıq, heykəltaraşlıq, instalyasiya və multimedia nümunələri ilə tanış ola biləcəklər.

Qeyd edək ki, Leyla Əliyeva Bəhreynə səfəri çərçivəsində Bəhreyn Krallığının Vəliəhdi və Baş naziri Salman bin Həməd Al Xəlifə ilə də görüşüb. Görüş zamanı ölkələrimiz və xalqlarımız arasında yüksəksəviyyəli münasibətlərdən danışılıb, ikitərəfli əməkdaşlığın bundan sonra da müxtəlif sahələr üzrə genişləndirilməsinin əhəmiyyəti qeyd olunub. Bəhreyn Krallığının Vəliəhdi Azərbaycanın hər zaman qlobal problemlərin həllinə dəstək olduğunu, bu çərçivədə ölkəmizin COP29-a yüksək səviyyədə evsahibliyi etdiyini bildirib, ətraf mühitin qorunması sahəsində təşəbbüslərin davamı olaraq, MAMA "Ana təbiət" sərgisinin Bəhreyndə təşkilinə görə təşəkkürünü çatdırıb. IDEA rəhbərinin ətraf mühitin qorunması istiqamətində Azərbaycanda və digər ölkələrdəki təşəbbüslərini yüksək qiymətləndirib.

Züleyxa ƏLİYEVA, 

"Azərbaycan"