Tütünçülük şimal-qərb bölgəsinin əsas təsərrüfat sahələrindən sayılır. Cari il Oğuz, Şəki, Qax, Zaqatala, Balakən fermerləri bol məhsul yetişdiriblər. Hazırda plantasiyalarda bol məhsul var və hava şəraitinin əlverişli keçməsindən istifadə edən tütünçülər yaş yarpaqları toplayaraq qurutma kameralarına yerləşdirməklə məşğuldurlar.   

Şəkinin təsərrüfatlarında da tütün yığımının qızğın çağıdır. İndiyədək rayonda 3 min 256 ton quru tütün istehsal olunub. Qurudulmuş tütünün 2 min 712 tonu istehsalçılar tərəfindən tədarük məntəqələrinə satılıb və hazırda proses davam edir. Bu barədə  Şəki Dövlət Aqrar İnkişaf Mərkəzindən (DAİM) məlumat verilib. DAİM-dən bildiriblər ki, cari mövsüm Şəkidə quru tütün istehsalının 4,2 min tona çatacağı gözlənilir. "Hazırda rayonda 800-dək fermer tütünçülüklə məşğul olur. Bu il rayon təsərrüfatlarında 1601 hektar sahədə tütün əkilib. 2500-dən çox kənd sakininin məşğulluğu tütünçülük hesabına təmin olunub. Şəkili fermerlər cari mövsüm 1271 hektar sahədə "Virciniya botaniki", 330 hektarda yerli tütün sortları yetişdiriblər. Tütün əkini sahələri əvvəlki illə müqayisədə 134 hektar artıb", - deyə Şəki DAİM bitkiçilik sektorunun baş mütəxəssisi Sahib Abdulhəmidov əlavə edib.

Cumakənddən olan fermer Həsən Səfərov bu il rayon üzrə hamıdan çox - 180 hektarda tütün əkib. Şorsulu fermer Elxan Hacəliyev cari mövsüm 50, Coşqun Davudov 25 hektar sahədə tütün yetişdiriblər. Rayonda fəaliyyət göstərən tütün istehsalı və emalı məntəqələrində, həmçinin şəxsi təsərrüfatlarda 327 tütünqurutma kamerası var.

Xatırladaq ki, ötənilki mövsümdə şəkili fermerlər 1467 hektardan 4147 ton quru tütün əldə etmişlər.

Qurban MƏMMƏDOV,

"Azərbaycan"