Yəqin ki, hamı kimi, Fərhad İslam oğlu Ağayev də uşaqlıq illərində, yeniyetmə çağlarında qəhrəman olmağı arzulayıb. Ürəyində özünə dərin yer etmiş bu arzuya çatmaq üçün daim öz üzərində çalışıb. Yorulmaq bilmədən məşq edib, hərbi dərsləri yaxşı oxuyub... Böyüyüb yaşa dolanda Qarabağı erməni işğalçılarından müdafiə etməyə yollanıb. Döyüşlərdə göstərdiyi igidliyə, cəsarətə görə Azərbaycanın Milli Qəhrəmanı fəxri adına layiq görülüb. Hələ gənc ikən uşaqlıq, yeniyetməlik arzularına çatıb.
Azərbaycanın Milli Qəhrəmanı Fərhad Ağayevin ömrü elə də uzun olmayıb, cəmi 20 il yaşayıb. Qısa, amma gələcək nəsillərə nümunə olacaq şərəf dolu bir ömür yolu keçib.
Fərhad İslam oğlu Ağayev 4 avqust 1975-ci ildə Lerik rayonunun Şivlə kəndində anadan olub. Sonralar ailə vəziyyəti ilə əlaqədar Sabirabad rayonunun Əlilənbəyli kəndinə köçüblər. Fərhad 1982-ci ildə böyük sevinc içində Əlilənbəyli kənd orta məktəbinin 1-ci sinfinə gedib. Nizam-intizamı, davranışı ilə başqa şagirdlərdən seçilib. Sanki on il tez ötüb arxada qalıb. Fərhad Ağayev ürəyində, qəlbində min bir arzu ilə 1992-ci ildə orta məktəbi bitirib. Bir il sonra, 1993-cü ilin yanvarında həqiqi hərbi xidmətə çağırılıb.
Həmin günlərdə erməni işğalçılarına qarşı Qarabağda, eləcə də Ermənistanla sərhəd bölgələrində gərgin döyüşlər gedirdi. Fərhad Ağayev 24 yanvar 1993-cü ildə Vətən qarşısındakı övladlıq borcunu yerinə yetirmək üçün böyük həvəslə ordu sıralarına gedib. Əsgər Fərhad Ağayev Azərbaycan Milli Qvardiyasında xidmətə başlayıb. Xidmətinin elə ilk günlərindən hərbi sirləri dərindən öyrənib. Ağır əməliyyatların getdiyi cəbhə bölgəsində vəziyyətin gərginləşdiyinə görə onları da Qarabağa döyüşməyə göndəriblər.
Fərhadın ilk döyüşü Füzuli rayonunun Seyidəhmədli kəndi uğrunda olub. O, döyüşdə qəhrəman kimi vuruşub, düşmənə sarsıdıcı zərbələr endirib. Füzuli istiqamətində bir neçə döyüş əməliyyatında iştirak etdikdən sonra onları ağır əməliyyatlar gedən Kəlbəcərə göndəriblər. Fərhad Murovdağ, Ömərdağ, Güzgü adlanan strateji əhəmiyyətə malik yüksəkliklər uğrunda gedən döyüşlərdə böyük cəsarət göstərib. O, cəbhə bölgəsində olduğu vaxtlarda iştirak etdiyi 27 döyüş əməliyyatında böyük şücaət və igidliklə vuruşub.
İgid əsgərin komandiri olmuş Azərbaycanın Milli Qəhrəmanı general Fəxrəddin Cəbrayılov Fərhad Ağayevin cəsarətindən söz açaraq deyib: "Fərhadgil 8 əsgər idilər. Hamısı da sərrast atırdılar, güllələri hədəfdən yayınmırdı. Düşmənə qan uddururdular. İşğalçılar onları zərərsizləşdirmək üçün daim izləyirdilər, axtarırdılar. Buna görə də tapşırmışdım ki, həmin əsgərlər çox qabağa getməsinlər. Çünki bu cəsur əsgərlərin elə uzaqdan erməni qəsbkarlarına endirdikləri dəqiq və məhvedici zərbələr düşmən üzərində üstünlüyümüzü təmin edirdi. Fərhad çox cəsarətli əsgər idi. Qarlı-şaxtalı qış günlərinin birində tapşırığı icra edərkən o, dizindən ağır yaralanmış qərargah rəisi mayor Sadilovla azaraq üç gün meşədə ac-susuz qalmışdı. Nəfəsi tükənmək üzrə olan mayor Sadilov ona demişdi ki, məni burada qoy get, özün xilas ol. Onsuz da mənim belə yaralı vəziyyətdə sağ qalmaq şansım yoxdur. Amma Fərhad dediklərinə məhəl qoymayaraq onu köməksiz qoymamışdı. Zabiti azdıqları meşədən sağ-salamat çıxarıb gətirmişdi. Yaxşı xatırlayıram ki, Murov ətrafında gərgin döyüş gedirdi. Vəziyyət olduqca ağır idi. Havadarları düşməni dayanmadan hərbi texnika və silah-sursatla təmin edirdilər. Təəssüf ki, həmin döyüşdə itkilərimiz oldu. Geri çəkiləndə atəş güclü olduğuna görə şəhidlərimizi çıxara bilmədik. Fərhad güllə yağışı altında qorxmadan bir-bir onların üzlərini papaqları ilə örtərək geri qayıtdı. Mən ondan niyə belə etdiyini soruşanda "Qurd-quş üzlərini dağıdıb tanınmaz hala salmasın" cavabını verdi. Gözlərim yaşardı, Fərhadı qucaqlayıb köksümə sıxdım".
1995-ci il martın 12-dən 13-nə keçən gecə ölkənin ən ucqar bölgəsində - Qazax və Ağstafada Xüsusi Təyinatlı Polis Dəstəsi silaha əl atdı, dövlətçiliyimiz əleyhinə çıxdı. Bu bölgələrdə yerləşən polis bölmələri tərəfindən dövlət idarələrinə silahlı hücum təşkil edildi. Ağır sınaq günləriydi, qardaş qardaşa güllə atır, qanını axıdırdı. Fərhad Ağayevin xidmət etdiyi taborun şəxsi heyəti bunun qarşısını almaq üçün Ağstafa rayonuna göndərildi. Erməni işğalçılarına qarşı ağır döyüşlərdən sağ çıxmış Fərhad Ağayev 1995-ci il martın 13-də qardaş gülləsindən ağır yaralandı. İki gün sonra, martın 15-də bu yaradan gözlərini əbədi olaraq yumdu. Yaxınlarının, doğmalarının və ictimaiyyət nümayəndələrinin iştirakı ilə Sabirabad rayonundakı Şəhidlər xiyabanında torpağa tapşırıldı.
Ulu Öndər Heydər Əliyevin 4 aprel 1995-ci il tarixli fərmanı ilə Fərhad İslam oğlu Ağayev ölümündən sonra Azərbaycanın Milli Qəhrəmanı fəxri adına layiq görüldü.
Xalq qəhrəmanlarının adını həmişə uca tutur, əbədiləşdirir. Bir zamanlar təhsil aldığı orta məktəb indi Fərhad Ağayevin adını daşıyır. Sabirabad və Lerik rayonlarında, eləcə də Əlilənbəyli kənd orta məktəbinin həyətində qəhrəmanın büstü ucaldılıb.
Vahid MƏHƏRRƏMOV,
"Azərbaycan"
