Ölkəmiz U-20 dünya çempionatına evsahibliyi edəcək
Beynəlxalq idman yarışlarının keçirilməsi hər ölkəyə etibar olunmur. Çünki bu, ilk növbədə böyük məsuliyyət tələb edir. Ölkəyə gələn idmançıların, məşqçi heyətinin və qonaqların təhlükəsizliyinin təminatı, eləcə də yüksək səviyyəli təşkilatçılıq, iqtisadi və kommunikasiya məsələlərinin həlli asan deyil.
Prezident İlham Əliyevin rəhbərliyi ilə bütün sahələrdə olduğu kimi, idmanın inkişafına yönəlmiş qərarların qəbulu, tədbirlərin reallaşması idmanda da ölkəmizin yüksək beynəlxalq nüfuz qazanmasına səbəb olub. Azərbaycanda keçirilən dünya və Avropa çempionatları sübut edir ki, ölkəmiz bu sahədə böyük təcrübəyə malikdir. Tarixinin ən qüdrətli Azərbaycanı bu gün dünyada elə bir tədbir yoxdur ki, onu reallaşdıra bilməsin. Bütün bu tədbirlərin təşkilatçılığı, idmançılara, qonaqlara göstərilən diqqət və qayğı uzun müddət yaddaşlardan silinmir.
I Avropa və IV İslam Həmrəyliyi oyunlarına, "Formula-1" yarışlarına, UEFA Avropa Liqasının finalına, minifutbol üzrə dünya çempionatına, 2021-ci ildə futbol üzrə Avropa çempionatının 4 oyununun (üç qrup və bir 1/4 oyunu) Bakıda keçirilməsinə, 42-ci Dünya Şahmat Olimpiadasına, Gəncə və digər 6 şəhərimizdə keçirilən III MDB Oyunlarına, eləcə də Avropa, dünya çempionatlarına yüksək səviyyədə evsahibliyi etmiş Azərbaycanda belə yarışların keçirilməsi onu göstərir ki, dünyanın qabaqcıl idman ölkələri sırasında layiqli yerimiz var. Ölkəmizin mötəbər idman yarışlarını keçirməsinin arxasında isə məhz Azərbaycanın inkişafı, müasir infrastrukturu və təhlükəsiz ölkə olması amili dayanır. Yüksək səviyyəli oyunların Azərbaycana həvalə edilməsi isə bu sahədə görülən işlərə verilən ən yüksək qiymətdir.
İndi budur, ölkəmizə daha bir nüfuzlu yarış həvalə edilib. FIFA İcraiyyə Komitəsinin qərarına əsasən, Azərbaycan Özbəkistanla birgə 2027-ci ildə keçiriləcək 20 yaşadək futbolçulardan ibarət milli komandalar arasında dünya çempionatının final mərhələsinə evsahibliyi edəcək.
Belə tədbirlərin keçirilməsi Azərbaycana həm iqtisadi, həm də strateji baxımdan böyük fayda gətirir. Etibarlı tərəfdaş kimi tanınması ölkəmizə əlavə investisiyaların yatırılmasına, yeni texnologiyaların gəlməsinə səbəb olur. Yarışlar həmçinin Azərbaycana milyonlarla turistin axınına yol açır. Belə beynəlxalq tədbirlər hər hansı bir kampaniyanın və ya onun istehsal etdiyi məhsulun yalnız reklam olunması demək deyil, bütövlükdə Azərbaycanın dünyaya geniş təqdimatıdır ki, bunun da nəticəsində ölkəmiz gələcək iqtisadi perspektivlərini müəyyənləşdirir, xarici investorların və böyük turist kütləsinin diqqətini cəlb edir.
Xəbər verildiyi kimi, 20 yaşadək kişi futbolçular arasında dünya çempionatının 2027-ci ildə həm də Azərbaycanda keçirilməsi ilə əlaqədar artıq Təşkilat Komitəsi yaradılıb. Prezident İlham Əliyev bununla bağlı sərəncam imzalayıb. Sərəncama əsasən, Baş nazirin müavini Samir Şərifov Təşkilat Komitəsinin sədri təyin edilib. Təşkilat Komitəsində gənclər və idman, fövqəladə hallar, maliyyə, mədəniyyət, iqtisadiyyat, daxili işlər, rəqəmsal inkişaf və nəqliyyat, elm və təhsil, xarici işlər, səhiyyə nazirlərinin müavinləri yer alıblar. Bundan başqa, Təşkilat Komitəsində Xankəndi şəhərində, Ağdərə və Xocalı rayonlarında Azərbaycan Respublikası Prezidentinin xüsusi nümayəndəsi, Bakı Şəhər İcra Hakimiyyətinin başçısı, Dövlət Turizm Agentliyinin sədri, Qida Təhlükəsizliyi Agentliyinin sədri, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri, Dövlət Gömrük Komitəsi sədrinin müavini, Dövlət Təhlükəsizliyi Xidməti rəisinin müavini, Dövlət Miqrasiya Xidməti rəisinin müavini, Dövlət Sərhəd Xidməti rəisinin müavini, Avtomobil Yolları Dövlət Agentliyi İdarə Heyətinin sədri, "Azərbaycan Hava Yolları" Qapalı Səhmdar Cəmiyyətinin prezidenti, "Azərişıq" Açıq Səhmdar Cəmiyyətinin sədri, "Azərenerji" Açıq Səhmdar Cəmiyyətinin prezidenti, Tibbi Ərazi Bölmələrini İdarəetmə Birliyinin icraçı direktoru, Milli Olimpiya Komitəsinin vitse-prezidenti, Azərbaycan Futbol Federasiyaları Assosiasiyasının (AFFA) prezidenti, Gəncə Şəhər İcra Hakimiyyətinin başçısı, Qəbələ Rayon İcra Hakimiyyətinin başçısı, Sumqayıt Şəhər İcra Hakimiyyətinin başçısı təmsil olunurlar.
Dünya çempionatı ilə bağlı Beynəlxalq Futbol Federasiyaları Assosiasiyası (FIFA) ilə əlaqələndirmə işlərinin aparılması AFFA-ya həvalə edilib. Təşkilat Komitəsinə mundialın 2027-ci ildə Azərbaycanda keçirilməsi ilə bağlı zəruri məsələləri, Nazirlər Kabinetinə isə bu sərəncamdan irəli gələn məsələləri həll etmək tapşırılıb.
Bir sözlə, Azərbaycanın belə mötəbər idman tədbirinə evsahibliyi etməsi onun idman ölkəsi kimi artan nüfuzunun daha da möhkəmlənməsinə, gələcəkdə belə mühüm tədbirlərin respublikamızda daha yüksək səviyyədə təşkilinə müsbət təsir göstərəcək. Şübhə yoxdur ki, Azərbaycan digər idman tədbirləri kimi, 20 yaşadək kişi futbolçular arasında dünya çempionatına da yüksək səviyyədə evsahibliyi edəcək və bununla ölkəmizin idman nüfuzu daha da artacaq.
Rəşad BAXŞƏLİYEV,
"Azərbaycan"
jpg_1765911397.jpg)
