Azərbaycanın işğaldan azad olunmuş ərazilərində mina təhlükəsi hələ də ölkəmizin üzləşdiyi ən ciddi humanitar problemlərdən biri olaraq qalır. Minalar insanların həyat və sağlamlığı üçün risk yaratmaqla yanaşı, keçmiş məcburi köçkünlərin doğma yurdlarına təhlükəsiz qayıdışını, yaşayış məntəqələrinin bərpasını, kənd təsərrüfatının inkişafını, yükdaşımaları və digər bağlantı layihələrinin gedişatını və ümumilikdə bölgənin sosial-iqtisadi dirçəlişini ləngidən əsas amillərdəndir. Bu baxımdan mina problemi artıq beynəlxalq humanitar gündəliyin önəmli məsələlərindən biri kimi qiymətləndirilməlidir.
Bu fikirləri AZƏRTAC-a açıqlamasında “Regional Hüquqi və İqtisadi Maarifləndirmə” İctimai Birliyinin sədri Arzu Bağırova səsləndirib.
O bildirib ki, təəssüf doğuran məqamlardan biri də bəzi beynəlxalq təşkilatların və insan hüquqları sahəsində fəaliyyət göstərən qurumların bu problemə münasibətdə nümayiş etdirdiyi ənənəvi susqunluqdur: “Dünyanın müxtəlif bölgələrində humanitar məsələlərə həssas yanaşan bəzi təsisatların Azərbaycan vətəndaşlarının mina terrorundan əziyyət çəkməsinə gərəkli diqqət göstərməməsi ikili standartlar barədə ciddi suallar yaradır. Əslində, humanitar hüququn prinsipləri coğrafiyaya və siyasi maraqlara görə dəyişməməlidir”.
Arzu Bağırova vurğulayıb ki, Azərbaycan dövləti bütün çətinliklərə baxmayaraq, genişmiqyaslı minatəmizləmə işlərini ardıcıl şəkildə davam etdirir. ANAMA-nın, aidiyyəti dövlət qurumlarının və beynəlxalq tərəfdaşların iştirakı ilə minlərlə hektar ərazi təmizlənir, yeni yaşayış məntəqələrinin, yolların, məktəblərin, xəstəxanaların və digər infrastruktur obyektlərinin təhlükəsiz istifadəsi təmin olunur. Böyük maliyyə və texniki resurslar tələb edən bu proses ölkənin öz imkanları hesabına həyata keçirilir: “Bu, bir model olaraq dünyanın ən iri humanitar minatəmizləmə proqramlarından biri hesab edilə bilər”.
İctimai Birliyin sədri qeyd edib ki, mina təhlükəsinə qarşı maarifləndirmə işləri də xüsusi önəm daşıyır: “Əhalinin, özəlliklə uşaqların və azad edilmiş ərazilərə səfər edən şəxslərin təhlükəsizlik qaydaları barədə davamlı bilgiləndirilməsi insan itkilərinin qarşısının alınmasında mühüm rol oynayır. Hüquqi, ictimai maarifləndirmə bu mübarizənin ayrılmaz tərkib hissəsidir. Düşünürəm ki, beynəlxalq ictimaiyyət mina probleminə yalnız bəyanatlar səviyyəsində münasibət bildirməməli, konkret texniki, maliyyə və institusional dəstək göstərməklə yanaşmalıdır. Ermənistan tərəfindən bütün mina xəritələrinin tam, dəqiq və qeyd-şərtsiz təqdim olunması istiqamətində beynəlxalq hüququn imkanlarından daha səmərəli istifadə edilməli, mülki insanların həyatına təhlükə yaradan bu humanitar problemə obyektiv və prinsipial münasibət sərgilənməlidir. Mina qurbanlarının sayı artdıqca bu məsələnin aktuallığı daha da yüksəlir. İnsan həyatının ali dəyər olduğu qəbul edilirsə, mina təhlükəsi ilə mübarizə də qlobal humanitar həmrəyliyin əsas istiqamətlərindən birinə çevrilməlidir. Azərbaycanın məqsədi öz torpaqlarını minalardan təmizləməklə həm də bölgədə təhlükəsiz, dayanıqlı və hüquqa əsaslanan barış mühitinin formalaşmasına töhfə verməkdir”.
jpg_1785417281.jpg)
