Beynəlxalq təchizat zəncirlərində yaranan problemlər və ticarətin yeni marşrutlara ehtiyacı Orta Dəhlizin əhəmiyyətini artırır. Çin, Mərkəzi Asiya, Xəzər dənizi, Azərbaycan, Gürcüstan və Türkiyə vasitəsilə Avropanı birləşdirən bu nəqliyyat marşrutu alternativ yol olmaqla yanaşı, qlobal logistikanın əsas istiqamətlərindən biridir. Azərbaycan əlverişli coğrafi mövqeyi, müasir nəqliyyat infrastrukturu və həyata keçirdiyi məqsədyönlü dövlət siyasəti sayəsində Orta Dəhlizin əsas iştirakçılarından birinə çevrilib. Bakı Beynəlxalq Dəniz Ticarət Limanı, Bakı-Tbilisi-Qars dəmir yolu, yenilənən avtomobil və dəmir yolu şəbəkələri ölkəmizin tranzit imkanlarını əhəmiyyətli dərəcədə genişləndirib. Bunun nəticəsində Azərbaycan Şərqlə Qərb arasında etibarlı logistika körpüsü rolunu daha da möhkəmləndirir.
Bu sözləri AZƏRTAC-a açıqlamasında Milli Məclisin deputatı Könül Nurullayeva deyib.
O bildirib ki, son dövrlərdə Orta Dəhlizin inkişafı istiqamətində mühüm addımlar atılır. Belə ki, yükdaşımalar rəqəmsallaşdırılır, “vahid pəncərə” informasiya sistemi tətbiq olunur, gömrük prosedurları sadələşdirilir, liman və dəmir yolu infrastrukturu genişləndirilir, həmçinin Azərbaycan, Qazaxıstan, Gürcüstan və digər tərəfdaş ölkələr arasında koordinasiya gücləndirilir. Bu tədbirlər yükdaşımaların sürətini artırmaqla yanaşı, marşrutun rəqabət qabiliyyətini də yüksəldir. Təsadüfi deyil ki, Çindən Azərbaycana və əks istiqamətdə həcmlər artır. Söhbət dəniz limanının imkanlarının demək olar iki dəfə artırılmasından gedir. Orta Dəhlizin inkişafı Azərbaycanın iqtisadiyyatına da mühüm töhfə verir. Tranzit gəlirlərinin artması, logistika sektorunda yeni iş yerlərinin yaradılması, qeyri-neft sektorunun inkişafı və xarici investisiyaların cəlb olunması ölkənin iqtisadi dayanıqlığını gücləndirir. Eyni zamanda, Azərbaycanın beynəlxalq nüfuzu yüksəlir və ölkə regional əməkdaşlığın əsas mərkəzlərindən biri kimi statusunu möhkəmləndirir.
Könül Nurullayeva qeyd edib ki, Avropa üçün Orta Dəhliz enerji, xammal və kritik mineralların Mərkəzi Asiyadan təhlükəsiz şəkildə Avropaya çatdırılması baxımından böyük əhəmiyyət daşıyır. Təcrübə göstərir ki, Orta Dəhlizin əhəmiyyətinin gündən-günə artması Azərbaycanın strateji mövqeyini daha da gücləndirəcək. İnfrastruktur layihələrinin davam etdirilməsi, rəqəmsal texnologiyaların tətbiqi və beynəlxalq tərəfdaşlığın genişləndirilməsi sayəsində ölkəmiz gələcək illərdə Avropa ilə Asiya arasında əsas nəqliyyat və logistika mərkəzləri statusunu qoruyub saxlayacaq. Bu isə həm iqtisadi inkişaf, həm də regional sabitlik baxımından Azərbaycan üçün yeni imkanlar yaradacaq. Avropanın da ümumi yanaşması bundan ibarətdir ki, Orta Dəhliz XXI əsrdə Avropa ilə Asiyanı birləşdirən ən perspektivli nəqliyyat marşrutlarından biridir. Bu dəhliz Avropanın iqtisadi dayanıqlığını, enerji təhlükəsizliyini və təchizat zəncirlərinin etibarlılığını gücləndirən strateji layihə kimi qiymətləndirilir. Ən vacibi isə budur ki, bu dəhliz Azərbaycanın mühüm tranzit rolunu ön plana çıxarır.
