Azərbaycan-Almaniya Biznes Şurasının yaradılmasına dair
imzalanan Birgə Bəyannamə iki ölkə arasında iqtisadi əməkdaşlığın dərinləşməsini
vəd edir
Azərbaycan-Almaniya iqtisadi əlaqələri getdikcə genişlənir və
bundan hər iki tərəf faydalanır. İki ölkə arasında enerji, ticarət,
investisiya, texnologiya və digər sahələrdə əməkdaşlıq uğurla inkişaf edir. Ölkələrimiz
bir-birinin etibarlı tərəfdaşı olduğunu artıq təsdiqləyib.
Prezident İlham Əliyevin Almaniyaya rəsmi səfəri iqtisadi əməkdaşlığın
inkişafına yeni bir təkan verdi. Səfər çərçivəsində vacib məqamlardan biri
iyulun 21-də Berlində Almaniya-Azərbaycan sənədlərinin imzalanması oldu. Azərbaycan
Prezidenti və Almaniya Federativ Respublikasının Federal Kansleri "Azərbaycan
Respublikası və Almaniya Federativ Respublikası arasında ikitərəfli tərəfdaşlıq
üçün strateji gündəliyə dair Birgə Bəyannamə"ni imzaladılar. Tədbirdə
imzalanan digər mühüm sənəd isə Azərbaycan-Almaniya Biznes Şurasının
yaradılmasına və fəaliyyətinə dair Birgə Bəyannamədir.
Dövlətimizin başçısının Almaniya Federativ Respublikasının
Federal Kansleri ilə geniş tərkibdə görüşündə də məhz ölkələrimiz arasında
strateji gündəliyə dair imzalanmış sənədlərin əhəmiyyəti vurğulanıb. Həmçinin sənədlərdən
irəli gələrək müxtəlif sahələrdə əməkdaşlığın inkişaf etdirilməsi üçün işçi
qrupların yaradılması və bu istiqamətdə sistemli işin aparılmasının vacibliyi
qeyd edilib. Əslində bu, hər iki ölkənin şirkətlərinə əməkdaşlığı genişləndirmək
üçün verilən bir mesaj, yaradılan şərait və imkandır.
Azərbaycan-Almaniya iqtisadi əlaqələrində enerji sektorunun
özünəməxsus yeri var. Belə ki, ölkəmiz Almaniyaya neft və qaz ixrac edir. Bu,
"Cənub qaz dəhlizi" ilə Azərbaycan qazı alan 16 ölkədən, o cümlədən
Avropa İttifaqına üzv 10 ölkədən biridir. Ümumiyyətlə, Almaniya ilə bizim ümumi
ticarət dövriyyəmiz keçən il təqribən 1,5 milyard dollar ətrafında olub. Bunun
böyük hissəsi Almaniyanın Azərbaycana ixracıdır, qalan hissə isə ölkəmizin
ixracıdır. İxracımızın da əsas hissəsi xam neftdir. Azərbaycan təxminən bir neçə
yüz milyon dollar səviyyəsində xam neft təchiz edir. Dövlətimizin başçısı mətbuata
bəyanatı zamanı "Reuters" agentliyinin nümayəndəsinin sualını
cavablandırarkən bildirib ki, nə qədər neft lazımdır, o qədər də təchiz edə bilərik:
"Həm daxili mənbələrdən, həm də bizim enerji şirkətimiz SOCAR-ın treydinq
bölməsindən. Yəni burada hər hansı bir problem yoxdur. O ki qaldı təbii qaz məsələlərinə,
qeyd etdiyim kimi, biz bu ildən başlayaraq Almaniyaya təbii qaz satmağa
başlamışıq. Bizim keçən il ümumi qaz ixracımız 25 milyard kubmetr olub. Onun
yarısı Avropa İttifaqı ölkələrinə ixrac edilib. Bildiyimə görə, Almaniya şirkətləri
ilə 10 illik kontrakt imzalanmışdır və ilkin həcm 1,5 milyard kubmetrdir. Ancaq
bu, təbii ki, arta bilər".
Təsadüfi deyil ki, Almaniya Federativ Respublikasının
Federal Kansleri Fridrix Merts Almaniya ilə Azərbaycan arasında münasibətlərin
genişləndirilməsinə ciddi yanaşdıqlarını bildirərək bu məqamı da vurğulayıb:
"Hazırkı böhran şəraitində xam neftin və "Cənub qaz dəhlizi" ilə
təbii qazın təchizatında əməkdaşlıq xüsusi əhəmiyyət kəsb edir. Cənab
Prezident, biz bunları təfərrüatı ilə müzakirə etdik. Biz Azərbaycanla əməkdaşlıq
yolu ilə enerji təchizatımızı daha da şaxələndirmək istəyirik. Bu gün biz, həmçinin
bərpaolunan enerji və hidrogendən istifadənin genişləndirilməsini müzakirə
etdik".
"Siz enerji sahəsindəki əməkdaşlığa toxundunuz. Bu
istiqamətdə də müsbət nəticələr var, - deyə dövlətimizin başçısı bidirib. - Bu
ildən başlayaraq Azərbaycan öz təbii qazını Almaniyaya ixrac etməyə
başlamışdır. Beləliklə, bizim qazımız bu gün Avropa İttifaqına üzv 10 ölkəyə
çatdırılır və şübhəsiz, bu, enerji təhlükəsizliyi üçün çox böyük töhfədir. Nəzərə
alsaq ki, Azərbaycan öz neftini də Almaniyaya ixrac edir və gələcəkdə "yaşıl
enerji"sini də Avropa məkanına çatdırmaq əzmindədir, enerji sahəsində əməkdaşlıq
çox genişmiqyaslı olacaqdır".
Ölkələrimiz arasında iqtisadi əməkdaşlıq genişləndikcə Cənubi
Qafqazın Avropa ilə Asiya arasında körpü kimi əhəmiyyəti də artır. Federal Kansler
öz bəyanatında bunu da diqqətə çatdıraraq demişdir: "Yeni nəqliyyat və
ticarət dəhlizləri birgə istifadə etmək istədiyimiz iqtisadi potensialı
yaradır. Cənab Prezident, bildiyiniz kimi, kiçik və orta müəssisələr üçün uzun
məsafədə sərmayə yatırmaq çox zaman asan olmur. Yerlərdə münasib çərçivə şərtləri
hər zaman olduqca vacibdir. Həmin məsələləri biz bu gün müzakirə etdik. Bu gün
imzalanmış iki bəyannamə ilə biz irəliyə doğru böyük addım atdıq".
Bu gün Azərbaycanda bir çox Almaniya şirkəti çalışır. Fəal
iş görən şirkətlərin sayı 200-dən çoxdur. Prezidentimizin Almaniyaya indiki səfərindən sonra onların sayı daha da
artacaq. Çünki qarşılıqlı sərmayə qoyuluşu məsələləri müzakirə edilməkdədir.
Alman şirkətlərinin daha geniş çərçivədə Azərbaycanda fəaliyyəti üçün konkret təkliflər
irəli sürülüb.
Bağlantılarla
və tranzit imkanları ilə bağlı da Azərbaycan-Almaniya əməkdaşlığı böyük əhəmiyyət
daşıyır. Almaniya şirkətləri bu istiqamətdə də uğurlar əldə edib.
Məlumdur
ki, Azərbaycan öz nəqliyyat infrastrukturunu təkmilləşdirir. Keçən il Orta
Asiya məşvərət formatına tamhüquqlu üzv olmaqla, Azərbaycan bir növ Orta Asiya
ilə Avropa arasında körpü rolunu oynayır və bu rol getdikcə artacaq. Ümumiyyətlə,
bir çox istiqamət üzrə konkret fəaliyyət planı nəzərdə tutulur. Səfər çərçivəsində
imzalanmış bəyannamənin icrası ilə bağlı fikir mübadiləsi əsnasında konkret təkliflər
irəli sürülüb. Bir neçə işçi qrup yaradılacaq ki, imzalanmış sənədlər tezliklə
həyatda öz əksini tapsın.
Mətbuata bəyanatının
sonunda dövlətimizin başçısı demişdir: "Son olaraq, Avropa İttifaqı-Azərbaycan
əlaqələrinə toxunmaq istəyirəm. Bu il biz həm Avropa İttifaqı Şurasının
prezidenti cənab Koştanın, həm Avropa Komissiyasının prezidenti xanım fon der
Lyayenin Azərbaycana səfərlərinin şahidi olmuşuq. Bu səfərlərin çox böyük
siyasi mənası var. Bu, Avropa İttifaqı ilə Azərbaycan arasındakı əlaqələri daha
da gücləndirəcək. Almaniya Avropa İttifaqına üzv olan ölkələr arasında lider
olduğu üçün burada təbii ki, həm Almaniyanın rolu çox böyükdür, eyni zamanda gələcək
əməkdaşlıq üçün də əminəm ki, Almaniya öz səylərini göstərəcək".
Flora
SADIQLI,
"Azərbaycan"
jpeg_1784780523.jpeg)
