Hidrometeoroloqlar bu qışın Azərbaycanda sərt keçməyəcəyini, havanın orta temperaturunun çoxillik normaya yaxın olacağını proqnozlaşdırırlar.

Ötən gün saat 13:20:30-da ölkəmizə daxil olan qış fəslində yağıntının miqdarının da normaya yaxın, bəzi yerlərdə bir qədər az olacağı qeyd edilir. Hər il olduğu kimi, bu il də Bakıda əsasən yanvar və fevral aylarında qışın sərt üzü ilə qarşılaşa bilərik. Bu baxımdan bəzi dövrlərdə hava şəraitinin şaxtalı və qarlı keçməsi proqnozlaşdırılır.

Təbii ki, qarlı və şaxtalı hava şəraiti xüsusən meqapolislərdə müəyyən çətinliklər yaratmaqla hərəkəti məhdudlaşdırır. Bu baxımdan Bakıda payız aylarından etibarən kəskin hava şəraitinə hazırlıqlar görülür.

Paytaxtda qışa hazırlığın vəziyyəti ilə bağlı Bakı Şəhər İcra Hakimiyyətinin tapşırığına əsasən, şəhərin rayonlarında kommunal təsərrüfat xidmətlərinin, idarə və təşkilatların, təhsil müəssisələrinin, özəl sektorun nümayəndələrinin iştirakı ilə müşavirələr keçirilir. Müşavirələrin əsas məqsədi isə rayon təsərrüfat xidmətlərinin soyuq qışa, xüsusilə güclü qar yağmasına hazırlığının vəziyyətinin araşdırılmasıdır.

Bu il paytaxtda qışa hazırlıqla bağlı hansı işlərin görüldüyünü, qartəmizləyən texnikaların işləkliyi, həmçinin duz tədarükünün hansı həcmdə olduğunu, Bakının sərt hava şəraitinə necə hazırlaşdığını Bakı Şəhər İcra Hakimiyyəti Mənzil-Kommunal Təsərrüfatı Departamentinin Sanitariya və Texniki Təchizat İdarəsinin rəisi Mübariz Hüseynovdan  öyrəndik.

İdarə rəisi qəzetimizə açıqlamasında bildirdi ki, sentyabr ayından Bakı Şəhər İcra Hakimiyyəti tərəfindən paytaxtda qarlı havalara hazırlığın vəziyyəti ilə bağlı kommunal təsərrüfat xidmətləri, idarə və təşkilatların, təhsil müəssisələrinin, özəl sektorun nümayəndələrinin iştirakı ilə vaxtaşırı müşavirələr keçirilib və qışa hazırlıqla bağlı aidiyyəti üzrə hər birinə göstərişlər verilib: "Müşavirələrdə rayon xidmətlərinin soyuq qışa, xüsusilə güclü qar yağmasına hazırlığının vəziyyəti araşdırılıb, görülməsi zəruri işlər müzakirə edilib. O cümlədən Bakı Şəhər İcra Hakimiyyətinin Mənzil-Kommunal Təsərrüfatı Departamentinin Sanitariya və Texniki Təchizat İdarəsinə xüsusi təyinatlı texnikalar vasitəsilə Bakı şəhərinin əsas yollarının qar və buz örtüyündən duz səpilərək təmizlənməsi və kürünməsi tapşırılıb. Həmin vaxtdan idarənin balansında olan 60-dan çox qış texnikası təmir edilib, texniki baxışdan keçirilib və hər biri saz vəziyyətə gətirilib. Hazırda həmin maşın və mexanizmlər start xəttindədir".

M.Hüseynov qeyd etdi ki, müşavirələrdə əsas, köməkçi məhəllədaxili yolların, səkilərin qardan vaxtında təmizlənməsi üçün cavabdeh təşkilatlar müəyyənləşdirilib. Rayonlardakı küçə və məhəllələrin qardan təmizlənməsinə cavabdeh şəxslərin siyahıları hazırlanıb, bu işlərə kommunal qurumların texnikası ilə yanaşı, idarə, təşkilat, bələdiyyə və özəl qurumların da mövcud texnikalarının cəlb edilməsi qərara alınıb. Həmçinin rayonlardakı idarə, təşkilat və özəl qurumlar, bələdiyyələr, o cümlədən ictimai iaşə müəssisələrinin rəhbərlərinin, ictimaiyyət nümayəndələrinin qarlı günlərdə özlərinə aid ərazilərin təmizlənməsində yaxından iştiraklarına çağırış edilib.

İdarə rəisi söylədi ki, Mənzil-Kommunal Təsərrüfatı Departamentinin Sanitariya və Texniki Təchizat İdarəsi qarlı, şaxtalı havalarda sutkalıq növbəli iş rejimi ilə fəaliyyət göstərəcək: "Sutkalıq iş rejimində hər bir rayon üzrə vəziyyəti nəzarətdə saxıamaq üçün işçi qrupları yaradılıb. Xüsusi qış geyimi ilə təchiz edilmiş işçilərin hər biri təlimatlandırılıb. Onların qalması üçün idarədə kazarmalar əvvəldən mövcud olsa da, hər biri yenidən təmir edilərək, istilikverici aqreqatlar quraşdırılıb. Həmin operativ işçi qruplar Bakı Şəhər İcra Hakimiyyətində yaradılmış qərargahla mütəmadi olaraq əlaqə saxlaya bilirlər".

Hazırda kifayət qədər duz ehtiyatının olduğunu deyən M.Hüseynov bildirdi ki, şəhərdə müəyyən olunmuş dislokasiyalar üzrə maşınlar təyin edilib və hər bir rayon üzrə duz anbarları yaradılıb. Ərazidə işin operativ aparılması üçün xüsusi yükləyici texnikalar duz anbarlarının yanında dayanaraq, lazım olduğu təqdirdə yüklənərək, buz bağlamış, qar yağmış yollara duz səpirlər. "İşimizə adətən gecə saatlarından başlayırıq ki, bununla piyadaların və nəqliyyat vasitələrinin hərəkətinin intensivliyi pozulmasın. Beləliklə, səhərə qədər yolları qardan təmizləyərək nəqliyyat vasitələrinin maneəsiz hərəkətinə şərait yaradırıq".

Verilən məlumatlara əsasən deyə bilərik ki, Bakı qışın sərt üzünə artıq hazırdır. Amma hazırlıqla yanaşı, hərəkət iştirakçılarının da qarlı, şaxtalı havalarda diqqətli olması və məsuliyyətli davranmaları mütləqdir. Soyuğa, şaxtaya baxmayaraq, hər kəs kimi, Bakı sakinləri də paytaxtımızı ağ örpəyə bürüyəcək qarın yağmasını səbirsizliklə gözləyir. Qar təmizlik, saflıq, bərəkət rəmzidir. Yeni il ərəfəsində yağan qar isə insanlara bayram hədiyyəsi olacaq.

Əsmər QARDAŞXANOVA,

"Azərbaycan"