"Qoca qitə"də terror hücumlarının və cəhdlərinin sayı dörd dəfə artıb

Almaniyanın  Maqdeburq şəhərində təşkil olunmuş Milad yarmarkasında terror aktı törədilib.  Meriya yaxınlığındakı köhnə bazarda bir nəfər avtomobilini  Yeni il hədiyyələri almağa gələn camaatın üstünə sürüb. Çoxlu sayda insanın yaralandığı bildirilir. Həlak olanlar da var.

Hücum faktını Almaniya hökumətinin sözçüsü Matias Şuppe təsdiqləyib. Polis 80 nəfərin yaralandığını bildirib. Onlardan 15-nin vəziyyəti ağırdır. Saksoniya-Anhalt federal əyalətinin baş naziri Rayner Haseloffun sözlərinə görə, terror aktı nəticəsində biri azyaşlı uşaq olmaqla iki nəfər dünyasını dəyişib. Terrorçu hücumdan dərhal sonra saxlanılıb.

"Die Welt" qəzetinin məlumatına görə, hücum edən 1974-cü il təvəllüdlü kişidir. O, Səudiyyə Ərəbistanından 2006-cı ildə Almaniyaya gəlmiş həkimdir.

Həftəlik "Der Spiegel"  50 yaşlı şübhəli Taleb əl-Abdulmohsenın psixiatr və psixoterapevt olduğunu aydınlaşdırıb. "Frankfurter Rundschau" qəzeti onun haqqında hələ 2019-cu ilin martında yazmışdı: "Taleb əl-Abdulmohsen 2006-cı ildən Almaniyada yaşayır. O, psixoterapevt  ixtisası almaq üçün Almaniyaya ziyarətçi həkim kimi gəlib və dindən uzaqlaşdıqdan sonra vətənində ölümlə hədələndiyi üçün  sığınacaq istəyib. 44 yaşlı həkimin siyasi qaçqın statusu var".

Ekspertlər baş verənləri ilk növbədə Yaxın Şərqdəki  hadisələrlə əlaqələndirirlər. Solingen şəhərində Almaniyaya sığınacaq üçün müraciət edən 26 yaşlı suriyalı gəncin avqustun 23-də şəhər festivalı zamanı 3 nəfəri bıçaqladığı və 8 nəfəri yaraladığı iddia edilən qırğından sonra İslam Dövləti (İD) terror qruplaşması bu hücum üçün məsuliyyəti öz üzərinə götürüb.

Bununla belə İŞİD-in məsuliyyətini üzərinə götürdüyü ən böyük terror aktı Qərbi Avropada deyil, 2024-cü ilin martında Moskvada baş verib, o zaman Crocus City Hall konsert zalında törədilən terror aktı nəticəsində 140-dan çox insan həlak olub.

Ekstremizmin qarşısını almaq və zorakı cinayətkarları deradikallaşdırmaq üçün işləyən Zorakılığın Qarşısının Alınması Şəbəkəsinin (VPN) eksperti Tomas Müke deyir: "Ekstremistlər Yaxın Şərqdəki mövcud münaqişədən qüvvələri səfərbər etmək üçün istifadə edirlər. 2023-cü il oktyabrın 7-dən etibarən Qərbi Avropada terror hücumlarının və hücum cəhdlərinin sayında dörd dəfə artım qeydə alınıb".

Solingen qətliamı bir neçə həftə ərzində Avropada baş verən bir sıra hücum və hücum cəhdlərindən biridir. Lakin İŞİD-in həmişə onların arxasında olub-olmadığı bəlli deyil və baş verən bütün hadisələrdə ancaq radikal islamçıları günahlandırmaq qərəzli mövqedir.

Solingen hücumu ilə eyni gündə Fransanın cənubunda iki minalanmış avtomobil partladılıb.

Amerikalı müğənni Teylor Sviftin avqustun əvvəlində Vyanada planlaşdırılan konsertindən bir müddət əvvəl Avstriya hakimiyyəti iki nəfəri həbs edib. Avstriya Dövlət Təhlükəsizlik və Kəşfiyyat İdarəsi bildirib ki, əsas şübhəli Şimali Makedoniya əsilli 19 yaşlı avstriyalı həbs edilərkən "özünü və mümkün qədər çox insanı öldürmək" istədiyini deyib. Sviftin konsertləri ləğv edilib.

Mayın sonunda Almaniyanın cənubundakı Mannheym şəhərində bir əfqan kişi  polis əməkdaşını öldürüb və daha beş nəfəri ağır yaralayıb.

7 oktyabr 2023-cü ildən bəri Qərbi Avropada 8 terror aktı və 21 cəhd və ya planlaşdırılan hücum rəsmi olaraq qeydə alınıb. Tomas Mükenin sözlərinə görə, bu dalğa gözlənilməz deyil: "İD təbii olaraq qorxu yaymaq və cəmiyyəti parçalamaq məqsədilə Qərbi Avropanı hədəfə alıb ki, onlar öz sıralarına daha çox insan cəlb etsinlər".

Ekspertlər hesab edirlər ki, Avropa artıq terrora təslim olub. Bunun əsas səbəblərindən biri də avropalıların miqrantların assimilyasiyasına töhfə vermək istəməməsidir. Bu, müsəlmanlara və digər dini  etiqadlı miqrantlara qarşı zülm və ayrı-seçkiliyə gətirib çıxarır, nəticədə onlar terrorçuya çevrilirlər.

Rizvan CƏFƏROV,

"Azərbaycan"