Azərbaycan Prezidenti İlham Əliyevin yanvarın 7-də yerli televiziya kanallarına verdiyi müsahibə Gürcüstan mətbuatının diqqət mərkəzində olub.
AZƏRTAC xəbər verir ki, “interpressnews.ge”, “1tv.ge”, “24news.ge”, “qafqazturk.com”, “ambebi.ge”, “resonancedaily.com” portalları və İctimai televiziya kanalı Prezident İlham Əliyevin müsahibəsindən materiallar yayıblar.
“İnterpressnews.ge” Azərbaycan Prezidentinə istinadla yazır: “Ermənistanın silahlanması, sadəcə olaraq, yeni gərginliyə gətirib çıxaracaq. Biz bunu istəmirik. Biz sülh istəyirik. Müstəqil Ermənistan dövləti, əslində, faşist dövlətdir. Çünki əgər bu ölkəyə 30 ilə yaxın faşist ideologiyasının daşıyıcıları rəhbərlik ediblərsə, bu ölkəni onlar elə özləri kimi də formalaşdırıblar. Ona görə faşizm məhv edilməlidir. Bunu ya Ermənistan rəhbərliyi məhv edəcək, ya da biz məhv edəcəyik. Bizim başqa çarəmiz yoxdur”.
İctimai televiziyada (“1tv.ge”) yayımlanan xəbərlərdə deyilir ki, Ermənistan Türkiyə ilə Azərbaycan arasında coğrafi maneə rolunu oynamamalı, Zəngəzur dəhlizi açılmalıdır
Televiziyanın digər xəbərində Azərbaycan Prezidentinin Cənubi Qafqazda sülhün tərəfdarı olması, Ermənistanın silahlanmasının məhz elə Ermənistan üçün yaradacağı ağır nəticələr, eləcə də Avropa Komissiyası ilə münasibətlərin inkişafı ilə bağlı fikirləri əksini tapıb.
“24news.ge” portalı dövlətimizin başçısının Zəngəzur dəhlizi ilə bağlı fikirlərini dərc edib. Materiallarda deyilir ki, Amerikada da Soros dövrü başa çatıb. Bayden administrasiyası, əslində, Soros idarə üsulu ilə idarə olunurdu. Sorosçuların faktiki olaraq mövqelərini itirdiklərini vurğulayan dövlətimizin başçısı deyib ki, Ermənistan rəhbərliyi bunu nəzərə almalıdır. “Nəzərə alsın ki, Yaxın Şərqdə onların yaxın müttəfiqi Əsəd diktaturası artıq tarixin zibilliyinə göndərilib və bu, davam edəcək, ona görə düzgün addım atsın. Biz Azərbaycan olaraq onlar üçün təhlükə mənbəyi deyilik. Biz istəyirik ki, Cənubi Qafqazda sülh olsun, əməkdaşlıq olsun, onlar bizə mane olmasınlar. Onlar Türkiyə ilə Azərbaycan arasında coğrafi maneə kimi fəaliyyət göstərməsinlər. Zəngəzur dəhlizi açılmalıdır və açılacaqdır. Onlar bunu nə qədər tez başa düşsələr, o qədər də yaxşıdır”, - deyə Prezident əlavə edib.
Bundan başqa, “qafqazturk.com”, “ambebi.ge”, “resonancedaily.ge” portallarında da Azərbaycan Prezidentinin Ermənistanın silahlanması, regionda yaratdığı problemlər, eləcə də, Avropa Komissiyası ilə bağlı fikirlərinə istinad edilərək xəbərlər dərc olunub.
