Ədalətli mövqe sərgilənməsə, münasibətlərin düzəlməsi sual altında olacaq
"Prezident İlham Əliyev yerli televiziya kanallarına müsahibəsində Avropa Komissiyası ilə əlaqələrə toxunaraq münasibətlərin necə inkişaf edəcəyini söyləməyin çətin olduğunu dedi. Dövlət başçısı qeyd etdi ki, ötən il məyusluqla dolu bir il olub. Belə ki, məhz keçən il Avropa İttifaqı normallaşma prosesində birmənalı olaraq Ermənistanın tərəfini tutub. Əlbəttə, Avropa İttifaqının qondarma müşahidə missiyasının fəaliyyət müddətinin uzadılması etimadı möhkəmləndirmədi, əksinə, sarsıtdı".
Bu sözləri "Azərbaycan" qəzetinə Milli Məclisin deputatı Kamran Bayramov deyib. Onun sözlərinə görə, dövlət başçısı xüsusi olaraq ötən il Avropa İttifaqının əldə etdiyi nəticənin Azərbaycan-Ermənistan trekinin normallaşması prosesindən tamamilə kənarlaşdırılmasından ibarət olduğunu bildirib. Əgər Ermənistanın silahlandırılmasının və qondarma Sülh Fondunun bundan sonra da davamı olacaqsa, bizim tərəfimizdən adekvat addımlar atılacaq.
"Otuz ilə yaxın bir dövrdə Azərbaycanın 20 faiz ərazisi Ermənistan tərəfindən işğalda saxlanılmasına baxmayaraq, Avropa təsisatlarının Fransa, Lüksemburq, İsveçrə kimi bir sıra aparıcı subyektləri Ermənistanın işğalçılıq və təcavüz siyasətinə, ərazimizdə erməni separatizminə birbaşa və dolayı yollarla dəstək veriblər. Xüsusən, Avropa Parlamenti məhz selektiv yanaşması ilə özünün nizamnaməsinə zidd davranmaqla ədalətli mövqedən uzaqlaşdığını və ayrı-ayrı qüvvələrin əlində alətə çevrildiyini hələ də göstərməkdədir", - deyə deputat qeyd edib.
Deputatın sözlərinə görə, Azərbaycan ötən illər ərzində bir dəfə belə bu qurumlardan faktiki işğal və təcavüz faktı ilə bağlı qətiyyətli mövqe görməyib. Nə Avropa Şurası, nə qurumun Parlament Assambleyası, nə Avropa Parlamenti bu məsələ ilə bağlı nəinki ədalətli mövqe tutub, əksinə, Ermənistanın işğalçılıq siyasəti mövzusunda, ümumiyyətlə, danışmamağa üstünlük verib. Təbii ki, bu tip davamlı riyakar və selektiv yanaşması ilə Avropa təsisatlarında, xüsusən Avropa İttifaqında, əslində, bəyan olunanlar sadəcə sənədləşmiş, lüzumsuz söz yığınağıdır: "Biz yenə də riyakar strukturun Azərbaycana çağırış edən, ermənilərin Qarabağa qayıdış hüququndan bəhs edən saxtakar bəyanatlarına şahidlik edirik. Azərbaycan çoxmillətli, çoxkonfessiyalı bir ölkədir. Ölkəmizdə bir çox etnik qruplar var. Bu etnik qrupların bir neçəsi və onlara mənsub olan insanlar Qarabağda yaşamış erməni əhalisindən qat-qat çoxdur. Əsl reallıq ondan ibarətdir ki, Ermənistanda yaşamış azərbaycanlıların sayı ermənilərin Azərbaycandakı sayından daha çoxdur".
K.Bayramov qeyd edib ki, 700 mindən artıq məcburi köçkünün, 300 mindən artıq qərbi azərbaycanlının qayıdış hüquqlarından bir dəfə də olsun bəhs etməyən, 1 milyondan artıq insanın hüquqlarını görməzdən gələn Avropa Parlamentini bu gün hansı maraqlar danışdırdığı bizə tam aydındır: "Azərbaycanla Ermənistan arasında münasibətlərin normallaşdırılması prosesində vasitəçiliyini davam etdirmək istəyən beynəlxalq aktorlardan biri də Avropa İttifaqı idi. İkinci Qarabağ müharibəsi bitdikdən sonra Cənubi Qafqazda sülhün təmin olunması üçün Avropa İttifaqı müəyyən təşəbbüslərlə çıxış edib. Aİ Şurasının Prezidenti Şarl Mişelin vasitəçiliyi ilə 2021-ci ilin dekabrında Brüsseldə Azərbaycan və Ermənistan liderlərinin ilk görüşü keçirildi. Bundan sonra Brüssel formatı çərçivəsində liderlərin bir neçə görüşü təşkil olundu. Lakin 2023-cü ilin sentyabrında ordumuzun Qarabağda həyata keçirdiyi lokal antiterror tədbirlərindən sonra Avropa İttifaqının mövqeyində ədalətsiz yanaşma özünü göstərməyə başladı".
Deputat dedi ki, Azərbaycan beynəlxalq öhdəliklərinə və beynəlxalq hüquqa sadiq olmaqla yanaşı, milli maraqlarına zidd olan hər hansı iddiaların və təhdidedici dilin legitimləşdirilməsi cəhdlərinin qarşısını qətiyyətlə alacaq. Avropa Komissiyası ədalətli mövqe sərgiləməsə, münasibətlərin düzəlməsi sual altında qalacaq.
Əsmər QARDAŞXANOVA,
"Azərbaycan"
