Hong Kong Politexnik Universitetinin tədqiqatçıları həddindən artıq isti şəraitdə çalışanlar üçün ətraf mühitin temperaturuna avtomatik uyğunlaşan, nəfəs alan və istilik izolyasiyalı yumşaq robotik geyim hazırlayıblar. Yeni texnologiya istifadəçilərə hər şəraitdə optimal istilik rahatlığı təmin etməyi hədəfləyir.

Tədqiqatçılar göyərçinlərin lələklərindən istifadə edərək istilik itkisini necə tənzimlədiyinə diqqət yetiriblər. Hazırlanmış yumşaq robot parça insan bədəninə bənzər ekzoskelet kimi dizayn edilib və tərkibində toksik olmayan, alışmayan, aşağı qaynama nöqtəli bir mayeyə sahib yumşaq ötürücülər var. Ətraf mühitin temperaturu artdıqda maye qaza çevrilir, bu da ötürücülərin genişlənməsinə və parçanın qalınlaşmasına səbəb olur. Bu, hava boşluğunu artıraraq istilik müqavimətini 2 qat artırır.

Aparılan testlərdə xarici səthin temperaturu 120 dərəcəyə çatdıqda belə, qoruyucu geyimin iç səthinin istiliyini ənənəvi istiliyədavamlı geyimlərlə müqayisədə ən az 10 dərəcə daha aşağı saxladığı müşahidə edilib. Bundan əlavə, məsaməli toxuma quruluşu yüksək nəm keçiriciliyi təmin edərək istifadəçinin rahatlığını artırır. Termoelektrik çiplər və ya sirkulyasiya edən maye soyutma sistemləri tələb etməyən bu yüngül və yumşaq robot kostyum, heç bir enerji sərfiyyatı olmadan temperaturu effektiv şəkildə tənzimləyə bilir.

Tədqiqatçılar şişmə, nəfəs ala bilən gödəkçələr və isti paltarlar hazırlamaq üçün eyni texnologiyadan istifadə etməyi hədəfləyirlər.

Ülkər XASPOLADOVA,

“Azərbaycan”