Bakıda keçirilən Ümumdünya Şəhərsalma Forumunun 13-cü Sessiyası (WUF13) çərçivəsində “Hamı üçün layiqli mənzil təminatı” üzrə sessiyalararası görüş baş tutub.
AZƏRTAC xəbər verir ki, BMT-nin Məskunlaşma Proqramının (UN-Habitat) Assambleyası tərəfindən yaradılmış Açıq Tərkibli İşçi Qrupunun görüşünə Azərbaycan və Somali həmsədrlik edib.
Tədbirdə əsas diqqət mənzil təsərrüfatının ekoloji davamlılığı və xarici təsirlərə qarşı dayanıqlılığı mövzusuna yönəldilib. İclasda sahə üzrə ekspertlər və rəsmi nümayəndələr bir araya gələrək mənzil siyasəti ilə bağlı tövsiyələrin hazırlanmasını müzakirə ediblər.
Görüş zamanı tikinti sektorunda ətraf mühitin qorunması, dünyadakı mövcud problemlər, yeniliklər və yeni imkanlardan bəhs olunub.
UN-Habitat-ın Qlobal Həllər Bölməsinin direktoru Rafael Tuts bildirib ki, WUF13 çərçivəsində aparılan müzakirələr zamanı formalaşdırılan sistemlər gələcək nəticələrin müəyyənləşdirilməsində mühüm rol oynayacaq. Onun sözlərinə görə, iqlim dəyişiklikləri mənzil təminatı, urbanizasiya və şəhərsalma kimi sahələrlə sıx şəkildə bağlıdır. Qeyd edib ki, 2015–2024-cü illər dövründə iqlim dəyişiklikləri nəticəsində dünyada ölkədaxili miqrantların sayı 248 milyona çatıb.
R. Tuts iqlimə həssaslıq məsələsinin təcili həll tələb etdiyini vurğulayıb və mövcud vəziyyətin əsasən imkan çatışmazlığından deyil, idarəetmədəki boşluqlardan qaynaqlandığını diqqətə çatdırıb. O, WUF13-ün maliyyələşmə, dayanıqlılıq və iqlim məsələləri üzrə qlobal müzakirələr üçün mühüm platforma yaratdığını bildirib.
png_1779198832.png)
jpg_1779195654.jpg)
