Vergi ödəyicilərinin elektron və ənənəvi xidmətlərə marağı artmaqda davam edir. 2026-cı ilin yanvar-oktyabr aylarında xidmət mərkəzlərində 454 838 müraciət qəbul edilib, müraciətlər üzrə 752 331 xidmət göstərilib.
Vergi ödəyiciləri ilə dövlət qurumları arasında əlaqə artıq təkcə xidmət mərkəzlərindəki müraciətlərlə məhdudlaşmır. SMS bildirişlər, elektron məlumatlandırma, ünvanlı xidmətlər və Asan İmza sertifikatları vergi xidmətlərinin gündəlik həyatımızdakı rolunu daha da genişləndirir.
Dövlət Vergi Xidmətindən verilən məlumata görə, 2026-cı ilin yanvar-oktyabr aylarında vergi ödəyicilərinə xidmət mərkəzlərində ümumilikdə 454 838 müraciət qeydə alınıb. Bu müraciətlər əsasında 752 331 xidmət göstərilib. Vətəndaşların və sahibkarların məlumatlandırılması istiqamətində də geniş iş aparılıb. Belə ki, hesabat dövründə vergi ödəyicilərindən daxil olan 22,7 min yazılı müraciət cavablandırılıb, onlara 18,6 milyon məlumatlandırma xarakterli müxtəlif növ bildiriş və məktub göndərilib.
Maarifləndirmə və birbaşa ünsiyyət də diqqətdən kənarda qalmayıb. 4 348 vergi ödəyicisinin iştirakı ilə 318 görüş keçirilib, 5 379 vergi ödəyicisinə ünvanlı xidmət göstərilib. Bundan əlavə, preventiv tədbirlər və vaxtında məlumatlandırma məqsədilə vergi ödəyicilərinin mobil telefonlarına 3,6 milyon SMS göndərilib.
Rəqəmsal xidmətlərə tələbatın göstəricilərindən biri isə Asan İmza sertifikatlarının verilməsi ilə bağlı statistikadır. Yanvar-oktyabr aylarında 253 774 müraciət üzrə ümumilikdə 401 349 Asan İmza sertifikatı təqdim edilib.
Rəqəmlərin dili ilə desək, 10 ay ərzində vergi xidmətləri yüz minlərlə müraciəti əhatə etməklə yanaşı, milyonlarla məlumatlandırma mesajı vasitəsilə vergi ödəyiciləri ilə davamlı əlaqə yaradıb. Bu göstəricilər vergi xidmətlərinin əlçatanlığının, məlumatlandırma və rəqəmsal həllərin əhəmiyyətini bir daha ön plana çıxarır.
“Azərbaycan”