Azərbaycanın iqtisadi potensialı, əlverişli investisiya mühiti və sahibkarlara təqdim olunan dəstək mexanizmləri İstanbulda Türkiyə iş dünyasının nümayəndələrinə tanıdılıb. Görüşdə yeni əməkdaşlıq imkanları və birgə layihələrin perspektivləri müzakirə olunub.Bu barədə İqtisadiyyat Nazirliyi məlumat yayıb.
Azərbaycanla Türkiyə arasında iqtisadi əlaqələr yeni əməkdaşlıq istiqamətləri və investisiya perspektivləri ilə daha da genişlənir. Bu baxımdan İstanbulda təşkil olunan “Azərbaycana investisiya: təşviqlər və dəstək mexanizmləri” mövzusunda tədbir iki ölkənin işgüzar dairələrini bir araya gətirərək Azərbaycanın investisiya potensialının tanıdılması üçün mühüm platformaya çevrilib.
Azərbaycanın Türkiyədəki ticarət nümayəndəsinin aparatı, İstanbul Anadolu Yaxası Sənaye Zonası (İAYOSB) və İstanbul Türkiyə-Azərbaycan Həmrəylik və Mədəniyyət Dərnəyinin (İSTAD) təşkilatçılığı, Azərbaycanın İstanbul Baş Konsulluğunun iştirakı ilə baş tutan tədbirə Türkiyənin müxtəlif iqtisadi sektorlarını təmsil edən iş adamları qatılıblar.
Tədbirdə Azərbaycanın investisiya imkanları, ölkədə biznes fəaliyyəti üçün yaradılmış şərait, investorlar üçün nəzərdə tutulan təşviq və dəstək mexanizmləri barədə ətraflı məlumat verilib. Keçirilən təqdimat iştirakçıların marağına səbəb olub, Türkiyəli iş adamlarını düşündürən suallar cavablandırılıb, qarşılıqlı əməkdaşlığın genişləndirilməsi imkanları ətrafında fikir mübadiləsi aparılıb. Görüşün diqqətçəkən məqamlarından biri də Azərbaycanın Türkiyədəki ticarət nümayəndəsi Tamerlan Tağıyevin İAYOSB-nin İdarə Heyətinin sədri Murat Çökmezlə keçirdiyi görüş olub. Söhbət zamanı iki tərəf arasında iqtisadi əməkdaşlığın inkişafı, sənaye və investisiya sahələrində birgə həyata keçirilə biləcək layihələr müzakirə edilib.
Əslində bu cür görüşlər yalnız Azərbaycanın iqtisadi imkanlarının təqdimatı ilə məhdudlaşmır. Onlar həm də Türkiyə iş dünyasının Azərbaycan bazarını daha yaxından tanımasına, potensial tərəfdaşların bir araya gəlməsinə və yeni biznes təşəbbüslərinin formalaşmasına zəmin yaradır.
İstanbulda keçirilən tədbir bir daha göstərir ki, Azərbaycan-Türkiyə münasibətlərinin strateji müttəfiqlik səviyyəsi iqtisadi və investisiya əməkdaşlığının dərinləşdirilməsi üçün də geniş imkanlar açır. İndi əsas hədəf bu imkanları konkret layihələrə, qarşılıqlı sərmayələrə və uzunmüddətli biznes tərəfdaşlıqlarına çevirməkdir.
“Azərbaycan”