44 günlük Vətən müharibəsi yalnız döyüş meydanında deyil, informasiya cəbhəsində də böyük mübarizə idi. Azərbaycanın haqq səsinin dünyaya çatdırılması, Qarabağ həqiqətlərinin beynəlxalq ictimaiyyətə təqdim olunması, erməni yalanlarının ifşa edilməsi bu mübarizənin ən mühüm istiqamətlərindən biri idi.
Bu günlər Türkiyədə keçirilən təntənəli mərasimdə, o çətin və məsuliyyətli günlərdə peşə borcuna sadiq qalaraq Qarabağda baş verən hadisələri işıqlandıran, Azərbaycanın haqq səsini dünya ictimaiyyətinə çatdırmaq üçün çalışan jurnalistlərin xidmətləri yüksək qiymətləndirilib. Mükafata layiq görülənlər arasında “SABAH” qəzetinin əməkdaşı Uğur Yıldırım da olub. İctimai Siyasi Proseslər Beynəlxalq Araşdırmalar Mərkəzi (İSBAM) tərəfindən təsis edilən “Zəfər Media Medalı”na layiq görülən jurnalistlərə mükafatlar təntənəli mərasimdə təqdim olunub.
Mərasimdə çıxış edən Azərbaycanın İstanbul şəhərindəki baş konsulu Zaur Allahverdizadə və İSBAM-ın sədri Samir Adıgözəlli Azərbaycanın haqq səsinin dünyaya çatdırılmasında göstərdikləri xidmətlərə görə jurnalistlərə minnətdarlıqlarını bildiriblər. Medal, əslində, təkcə bir jurnalistin əməyinə verilən qiymət deyil. Bu, həqiqətin tərəfində dayanmağın, çətin anlarda susmamağın, informasiya müharibəsində qələmi ilə mübarizə aparmağın təcəssümüdür.
Çünki müharibələr yalnız silahlarla aparılmır. Bəzən bir fotoşəkil, bir reportaj, bir həqiqi xəbər minlərlə sözün edə bilmədiyini edir. Tarix yazılan zaman həmin tarixin şahidi olan və onu dünyaya çatdıran jurnalistlərin də öz yeri olur. “Zəfər Media Medalı” məhz bu fədakar əməyə, peşə məsuliyyətinə və Azərbaycanın haqq işinə göstərilən dəstəyə verilən mənəvi ehtiramın ifadəsidir.
“Zəfər Media” ilə Türkiyənin “Anadolu Agentliyi“, “TRT Haber”, “Haber Global”, “ATV”, “DHA”, “NTV“, “CNN Türk”, “A Haber”, “Habertürk”, “TRT”, “TV100”, “Süperhaber TV”, “Bengü Türk”, “Al Araby Tv” kanalları və “Hürriyət” qəzetlərinin əməkdaşları da təltif olunublar.
Mükafatçılardan “TV100” telekanalının əməkdaşı Ali Burak Ersemiz medalı şəhid jurnalistlər, AZƏRTAC-ın müxbiri Məhərrəm İbrahimov və Azərbaycan Televiziyasının operatoru Sirac Abışov adına aldığını bildirib.
Qələmi ilə həqiqətə xidmət edənlərin əməyi unudulmasın!
Züleyxa ƏLİYEVA,
“Azərbaycan”