Ölkədə fövqəladə vəziyyət elan edilib
Venesuela paytaxtının qərbində 7,2 və 7,5 bal gücündə iki güclü zəlzələ baş verib. Zəlzələlər Karakasda binaların uçmasına səbəb olub və mütəxəssislər çoxlu sayda itki olacağını proqnozlaşdırırlar.
ABŞ Geoloji Xidmətinin (USGS) məlumatına görə, ikinci zəlzələ birincidən bir dəqiqədən az müddət sonra baş verib. Birinci zəlzələnin episentri ölkənin Karib dənizi sahilindəki Moron şəhərinin qərbində - Karakasdan təxminən 168 kilometr qərbdə, 22 kilometr dərinlikdə yerləşib. İkinci zəlzələnin episentri isə 10 kilometr dərinlikdə Morondan 16 kilometr cənub-qərbdə qeydə alınıb.
Karakasda ilkin hesablamalara görə, 164 nəfər ölüb, 1000-dən çox insan yaralanıb. Bildirilib ki, ölən və yaralananların sayı 10.000 ilə 100.000 nəfər arasında ola bilər.
Venesuela prezidentinin səlahiyyətlərini icra edən Delsi Rodrigez fövqəladə vəziyyət elan edib. O, həmçinin zəlzələnin vurduğu ziyana görə Karakas Beynəlxalq Hava Limanının bağlandığını bildirib. Rodrigez həmçinin ölkədəki bütün səhiyyə işçilərini zərərçəkənlərə kömək etmək üçün xəstəxanalara getməyə çağırıb.
Amerika qitəsində yerləşən digər ölkələrin səlahiyyətliləri Venesuelaya başsağlığı və dəstək verir. Onların arasında ABŞ Prezidenti Donald Tramp da var. o, "Truth Social" sosial şəbəkəsində yazıb:"Yenicə Venesuelanın böyük xalqını vuran iki böyük zəlzələ nəhəng miqyasdadır və çoxlu sayda insanın həyatına son qoyub. ABŞ kömək etməyə hazırdır, istəyir və qadirdir! Mən hökumətimizin bütün departamentlərinə təcili tədbirlər görməyə hazırlaşmağı tapşırmışam. Biz yeni və böyük dostlarımıza yaxın olacağıq".
Rizvan CƏFƏROV,
"Azərbaycan"
