Ümummilli Liderin anım günündə Çində xüsusi qayğıya ehtiyacı olan uşaqlar üçün xeyriyyə tədbiri keçirilib  

Ümummilli Lider Heydər Əliyevin anım günü ilə əlaqədar Azərbaycanın Çindəki səfirliyində tədbir keçirilib.

AZƏRTAC xəbər verir ki, əvvəlcə Ümummilli Lider Heydər Əliyevin səfirlikdəki büstü önünə əklil qoyulub, əziz xatirəsi bir dəqiqəlik sükut ilə yad edilib.

Səfir Bünyad Hüseynov ömrünü qüdrətli Azərbaycan dövlətinin yaradılmasına və inkişafına həsr etmiş görkəmli dövlət xadimi Ümummilli Lider Heydər Əliyevin həyat yolundan, Azərbaycan dövlətinin və dövlətçiliyinin möhkəmləndirilməsində əvəzsiz xidmətlərindən danışıb. Heydər Əliyevin tarixə müdrik rəhbər, böyük strateq və qlobal düşüncəli siyasi Lider kimi düşdüyünü deyib. Heydər Əliyevin Azərbaycan xalqını və dövlətini tarixin ağır və sərt sınaqlarından çıxardığını, işıqlı gələcəyin etibarlı bünövrəsini yaratdığını vurğulayıb.

Səfir bildirib ki, Ulu Öndər Azərbaycan-Çin münasibətlərinin inkişafına xüsusi diqqət yetirib. Heydər Əliyevin təşəbbüsü ilə Azərbaycanın Çində səfirliyi təsis edilib, onun 1994-cü ildə Çinə rəsmi səfəri isə iki ölkə əlaqələrində xüsusi əhəmiyyətə malikdir.

Qeyd olunub ki, Heydər Əliyev siyasi kursunun layiqli davamçısı Prezident İlham Əliyevin yürütdüyü praqmatik və uzaqgörən siyasət nəticəsində Azərbaycanın ərazi bütövlüyü və suverenliyi bərpa olunmaqla yanaşı, ölkəmiz regionun sürətlə inkişaf edən dövlətinə çevrilib. Azərbaycan ilə Çin arasında münasibətlər isə hərtərəfli strateji tərəfdaşlıq səviyyəsinə yüksəlib.

Sonra səfirliyin əməkdaşları Ulu Öndərin öz fəaliyyətində daim humanizm prinsiplərini əsas tutmasına istinad edərək, xüsusi qayğıya ehtiyacı olan uşaqlar üçün sosial reabilitasiya və adaptasiya xidmətləri göstərən, onların cəmiyyətə inteqrasiyasına dəstək verən Pekin Uşaq Rifah İnstitutunu ziyarət ediblər. Səfir Bünyad Hüseynov müəssisənin əməkdaşları ilə söhbətində bildirib ki, Azərbaycan xalqı mərhəməti və humanistliyi ilə tanınır. Ümummilli Lider Heydər Əliyev də fəaliyyətinin bütün dövrlərində mərhəməti, humanizmi və mənəvi dəyərləri hər şeydən uca tutub. Təsadüfi deyil ki, Heydər Əliyev Fondu da bu gün öz fəaliyyətini məhz Ümummilli Liderin sadiq olduğu humanizm prinsipləri əsasında qurub. Heydər Əliyev Fondunun prezidenti, Azərbaycanın birinci xanımı Mehriban Əliyeva genişmiqyaslı sosial və humanitar layihələr həyata keçirir və xeyriyyə tədbirləri təşkil edir. Bayram və əlamətdar günlərdə sağlamlıq imkanları məhdud olan uşaqlarla görüşür, onlar üçün maraqlı mədəni proqramlar təşkil edir. Heydər Əliyev Fondunun bu tədbirləri cəmiyyətdə humanizmin daha geniş vüsət almasına, insanlarda mərhəmət hissinin aşılanmasına xidmət edir.

Pekin Uşaq Rifah İnstitutunun rəhbəri səfirliyin xüsusi qayğıya ehtiyacı olan uşaqlara göstərdiyi diqqət və qayğını yüksək qiymətləndirib. “Mərhəmət dolu belə təşəbbüsə görə Azərbaycan xalqına və Azərbaycan səfirliyinə minnətdarıq. Mərhəmət sərhəd tanımır, dağları və çayları aşaraq buradakı uşaqlar üçün Azərbaycandan istilik gətirməyiniz insanda söz ilə ifadə olunmayan hisslər yaradır. Heydər Əliyev kimi dahi şəxsiyyətin adına göstərilən mehribanlıq müəssisəmizin sakinlərini sevindirir və onların özünəinam hissini artırır”, - deyə institutun rəhbəri qeyd edib.

Sonda müəssisədə müalicə alan uşaqların istifadəsi üçün zəruri olan gündəlik tələbat məhsulları təqdim edilib.