Son dörd ildə Azərbaycanın sığorta bazarı təxminən iki dəfə böyüyüb. Bu inkişaf dövlət tərəfindən müəyyən edilmiş strateji hədəflərə, Mərkəzi Bankın həyata keçirdiyi islahatlara və bazar iştirakçılarının birgə səylərinə əsaslanır.
AZƏRTAC xəbər verir ki, bunu Azərbaycan Sığortaçılar Assosiasiyasının Müşahidə Şurasının sədri Ülviyyə Cabbarova 11-ci "Azərbaycan Beynəlxalq Sığorta Forumu"nda (AIIF-2026) deyib.
O qeyd edib ki, bütün bu nailiyyətlər sevindirici olsa da, qarşıda bizi daha böyük imkanlar gözləyir: “Azərbaycanda sığorta penetrasiyasının artırılması üçün geniş potensial mövcuddur və məqsədimiz bu potensialı tam reallaşdırmaqdır. Lakin bizim üçün əsas məsələ yalnız böyümə deyil. Ən böyük məqsədimiz sığortanın insanların həyatında daha çox yer tutması, cəmiyyətin və iqtisadiyyatın davamlı inkişafına daha böyük töhfə verməsidir. Bu gün dəyişən dünyada risklər artır, gözləntilər yenilənir və sığortanın rolu əvvəlkindən daha da önəmli olur. Sığorta artıq yalnız zərərin ödənilməsi mexanizmi deyil. O, insanların gələcəyə daha inamla baxmasına, ailələrin maliyyə dayanıqlılığının qorunmasına, bizneslərin isə gözlənilməz risklər qarşısında daha davamlı olmasına xidmət edir. Qlobal sığorta bazarında da əsas müzakirə mövzuları dəyişən risklər və bu risklərə uyğun yeni həllər ətrafında formalaşır. Son illərdə təbii fəlakətlərin intensivliyinin artması, kiberrisklərin genişlənməsi və əhalinin yaşlanması sığorta sektorunun qarşısında yeni vəzifələr yaradır. Bu çağırışlar bizdən daha çevik olmağı, innovativ məhsullar yaratmağı və müştərilərin dəyişən ehtiyaclarına daha sürətli uyğunlaşmağı tələb edir".
Ülviyyə Cabbarova bildirib ki, bu məqsədlə “2027–2030-cu illər üzrə Maliyyə İnklüzivliyinin Genişləndirilməsi Dövlət Proqramı” çərçivəsində sığorta sektorunun inkişafı üçün sığorta xidmətlərinin əlçatanlığının artırılması, rəqəmsal həllərin genişləndirilməsi, könüllü sığortaların inkişafı və maliyyə xidmətlərindən daha geniş istifadə imkanlarının yaradılması qarşıdakı dövr üçün əsas prioritetlər kimi müəyyən olunub: "Hesab edirəm ki, bu sənəd sadəcə dövlət proqramı deyil, həm də sığorta bazarının gələcək inkişafı üçün mühüm bir yol xəritəsidir. Bu hədəflərə çatmaq yalnız dövlət qurumlarının deyil, bütün bazar iştirakçılarının birgə məsuliyyətidir. Əminəm ki, əməkdaşlıq və birgə fəaliyyətin köməyi ilə biz sığorta sektorunun inkişafını daha da sürətləndirəcəyik. Azərbaycan Beynəlxalq Sığorta Forumu da məhz bu məqsədə xidmət edir. Bugünkü sürətlə dəyişən dünyada heç bir bazar təkbaşına inkişaf etmir. Beynəlxalq təcrübənin öyrənilməsi, yeni yanaşmalarla tanışlıq və peşəkar fikir mübadiləsi sektorun gələcək inkişafı üçün vacib amillərdəndir. İnanıram ki, növbəti iki gün ərzində aparılacaq müzakirələr, ekspertlərin bölüşəcəyi bilik və təcrübə hər birimiz üçün yeni imkanlar yaradacaq və sığorta sektorunun inkişafına öz töhfəsini verəcək".
