“Əsrin müqaviləsi” Bakı üçün meqalayihələrin başlanmasında mühüm rol oynayıb.
Bu barədə AZƏRTAC-a türkiyəli ekspert Mehmet Emir Aksoy məlumat verib.
Ekspertin sözlərinə görə, hər il sentyabrın 20-si Azərbaycanda Neftçilər Günü kimi qeyd olunur.
“Neftçilər Günü təkcə iqtisadi baxımdan deyil, həm də milli kimlik və müstəqillik baxımından böyük əhəmiyyət kəsb edir. Türkiyə və Azərbaycan dərin tarixi, mədəni bağları olan iki qardaş ölkədir. Bu əlaqələr dil, mədəniyyət və ortaq tarixlə möhkəmlənir. Xüsusilə son illərdə enerji sahəsində əməkdaşlıq Türkiyə-Azərbaycan əlaqələrinin mərkəzində dayanır və hər iki ölkənin inkişafında mühüm rol oynayır. Azərbaycan hökuməti 1990-cı illərin əvvəllərində öz enerji sektoruna xarici investisiyaları cəlb etmək qərarına gələndə müdriklik və uzaqgörənlik nümayiş etdirdi. “Əsrin müqaviləsi” bütün regionda tarixin və enerji geosiyasətinin gedişatını dəyişdi”, - deyə ekspert qeyd edib.
Onun sözlərinə görə, Azərbaycan Xəzər dənizində yerləşən zəngin neft və təbii qaz ehtiyatları ilə tanınır.
“XIX əsrdə Bakıda neft yataqlarının kəşfi ölkənin iqtisadi mənzərəsini kökündən dəyişdi. Sovet İttifaqı dövründə Azərbaycan mühüm enerji mərkəzinə çevrilmiş, 1991-ci ildə müstəqillik əldə etdikdən sonra beynəlxalq enerji bazarında öz yerini tapmağa başlamışdır. Ölkənin enerji sərvəti həm iqtisadi artıma nail olmağa, həm də beynəlxalq münasibətlərdə mövqelərini möhkəmləndirməyə imkan verib”, - deyə ekspert qeyd edir.
Mehmet Emir Aksoyun fikrincə, Azərbaycanın strateji tərəfdaşı olan Türkiyə bu resursların Avropa bazarına çatdırılmasında mühüm rol oynayır.
“Coğrafi mövqeyi və yüksək enerji ehtiyacına görə Türkiyə Azərbaycanın enerji resurslarına çıxış üçün körpü rolunu oynayır. Trans Anadolu Təbii Qaz Boru Kəməri (TANAP) kimi layihələr Türkiyənin enerji təhlükəsizliyini gücləndirir və Avropanı alternativ enerji mənbələri ilə təmin edir. Bu vəziyyət təkcə iqtisadi maraqların deyil, həm də milli mövqenin təzahürüdür. Neft qlobal iqtisadiyyatda strateji resursdur və ölkələrin iqtisadi inkişafında əsas rol oynayır. Neftçilər Günü Azərbaycanın milli kimliyi, müstəqillik mübarizəsi və beynəlxalq nüfuzu üçün rəmzi hadisəyə çevrilib. Bu gün nəinki enerji resurslarının əhəmiyyətini vurğulayır, həm də Azərbaycanın neft sənayesinin tarixini və inkişafını qeyd edir”, - o bildirib.
Ekspertin sözlərinə görə, müstəqillik əldə etdikdən sonra Azərbaycanın enerji sektoru ölkənin iqtisadi artımının aparıcı qüvvəsinə çevrilib: “Zəngin təbii qaz və neft ehtiyatlarına malik Azərbaycan həm regional, həm də beynəlxalq miqyasda mühüm oyunçuya çevrilib. Azərbaycanın enerji zənginliyi Türkiyəni öz enerji təhlükəsizliyini yaxşılaşdırmaq üçün mühüm addımlar atmağa sövq edib. Birgə enerji layihələri təkcə iqtisadi səmərə vermir, həm də iki ölkə arasında qardaşlıq əlaqələrini gücləndirir. Bu gün Azərbaycan neft müqavilələrinin uğurlu idarə olunması ilə yanaşı, qaz hasilatının həcmini ildən-ilə uğurla artırır. Son illər ölkə Avropanı təbii enerji ilə təmin etməkdə mühüm irəliləyişlər əldə edib. Azərbaycan 20-dən çox ölkəni və 40-dan çox beynəlxalq şirkəti əhatə edən, uzunluğu 3500 kilometrdən çox olan TAP və TANAP qaz kəmərlərinin şaxələndirilməsinə öz töhfəsini verib və hasil edilən qazın Avropa bazarına çatdırılmasına nail olub. Azərbaycan bu gün “Cənub Qaz Dəhlizi” layihəsində iştirakı sayəsində yeni uğur hekayəsi yazır”.
